రివ్యూ రాస్తానంటున్న దిల్ రాజు

ఈ రోజుల్లో కొత్త సినిమాలకు రివ్యూలు చాలా కీలకంగా మారిపోయాయి. బాగున్న సినిమాకు పాజిటివ్ రివ్యూల వల్ల ఎంత మేలు జరుగుతుందో.. బాలేని సినిమాకు నెగెటివ్ రివ్యూల వల్ల అంత చేటూ జరుగుతుంది. ఐతే ఇండస్ట్రీలో బాగున్న సినిమాలు ఎప్పుడో ఒకసారే వస్తాయి కాబట్టి.. రివ్యూల పట్ల ఎక్కువగా ఇండస్ట్రీ జనాల నుంచి వ్యతిరేకతే కనిపిస్తుంటుంది. రివ్యూలను తరచుగా విమర్శిస్తుంటారు. అగ్ర నిర్మాత దిల్ రాజు సైతం రివ్యూల పట్ల వ్యతిరేకత చూపించిన వారే. కాకపోతే మరీ ఘాటు వ్యాఖ్యలు చేయరు. ఐతే రివ్యూలు వీకెండ్ అయ్యే వరకు ఆపే ప్రయత్నం చేయాలన్న ఆలోచనను కూడా ఆయన గతంలో పంచుకున్నారు. అలాంటి వ్యక్తి ఇప్పుడు ఓ సినిమాకు తనే రివ్యూ రాస్తానని పేర్కొనడం విశేషం. ఆ చిత్రమే.. రేవు.

ఫిలిం జర్నలిస్టులైన ప్రభు, పర్వతనేని రాంబాబు ఈ చిత్రానికి ప్రొడక్షన్ సూపర్ వైజర్లుగా వ్యవహరించారు. వారి ఆహ్వానం మేరకే ‘రేవు’ ప్రమోషనల్ ఈవెంట్‌కు రాజు ముఖ్య అతిథిగా వచ్చారు. ఈ సందర్భంగా ఆయన మాట్లాడుతూ.. ప్రభు, రాంబాబు లాంటి వాళ్ల వల్లే తాను ఈ స్థాయికి వచ్చానని చెప్పారు. ఇలాంటి సినిమా తీయడం కంటే ప్రేక్షుకులను థియేటర్లకు తీసుకురావడం గొప్ప అని.. ప్రభు, రాంబాబు వెనుక ఉండి ఈ సినిమా తీశారని.. ఇప్పుడు తాను ముందుకొచ్చి సినిమాను నడిపించాలని అనుకుంటున్నానని రాజు తెలిపారు. ఇన్నాళ్లూ ప్రభు, రాంబాబు తమ సినిమాలను చూసి రివ్యూలు రాశారని.. ఇప్పుడు తాను వాళ్ల సినిమా చూసి రివ్యూ రాస్తానని రాజు అన్నారు. మరి రాజు నిజంగా ఈ మాటకు కట్టుబడి ‘రేవు’ మూవీ రివ్యూ రాస్తాడేమో చూడాలి. హరినాథ్ పులి రూపొందించిన ఈ చిత్రంలో వంశీ రామ్ పెండ్యాల, అజయ్, స్వాతి భీమిరెడ్డి, ఏపూరి హరి ముఖ్య పాత్రలు పోషించారు.