డైరెక్ట‌ర్స్ డే స్పెష‌ల్: ద‌శ దిశ మార్చిన‌ సౌత్ సెన్సేష‌న్స్

భార‌తీయ సినిమా 100 ఏళ్లు పైగా పురోగ‌మించింది. ఇందులో టాలీవుడ్ అలాగే సౌతిండియ‌న్ సినిమా చ‌రిత్ర 90 ఏళ్లు పైబ‌డి ఉంది. ఇన్నేళ్ల‌లో ప‌రిశ్ర‌మ‌లో ఎంద‌రో దిగ్గ‌జ ద‌ర్శ‌కులు త‌మ సృజ‌నాత్మ‌క‌త‌తో అల‌రించారు. ఈ రోజు దక్షిణాదిలోని చాలా మంది ద‌ర్శ‌కులు సినిమా నిర్వ‌చ‌నాన్ని మార్చారు. పాన్ ఇండియా స్థాయిలో ప్ర‌భంజ‌నం సృష్టించే సినిమాను ఎలా ప్రదర్శించవచ్చనేది ప్రాక్టిక‌ల్ గా నిరూపించ‌గ‌లిగారు.. తెలుగు, తమిళం, మలయాళం లేదా కన్నడ భాషల నుంచి వచ్చినా, ప్రతి పరిశ్రమకు చెందిన దర్శకులు తమ ప్రత్యేకమైన అద్భుతమైన కథలను అందించగలిగారు. ఒక సినిమాకి దర్శకనిర్మాత పేరు పెట్టినప్పుడు ఆ దర్శకుడి నుంచి ఎలాంటి మేకింగ్ స్టైల్‌ను ఆశించవచ్చో కూడా ప్రేక్షకులకు తెలుసంటే ద‌ర్శ‌కుల‌ స్థాయి ఎంత‌గా పెరిగిందో అర్థం చేసుకోవ‌చ్చు.

ప్రతిభావంతులైన ద‌ర్శ‌కులు గొప్ప‌ ఆలోచనలతో అద్భుత‌ కథలను తెర‌పై ప్రదర్శించడంలో వారి సృజనాత్మకత కార‌ణంగానే బాక్సాఫీస్ సంచ‌ల‌నాలు సాధ్య‌మ‌య్యాయి. వెట‌ర‌న్ మణిరత్నం, శంక‌ర్, రాజ‌మౌళి వంటి దూరదృష్టి గల దర్శకులు ప్రేక్షకులను విస్మయానికి గురిచేసే చిత్రాలను అందించగలిగారు. బాహుబలి ఫ్రాంచైజీ, RRR, KGF డ్యుయాలజీ , పుష్ప, కాంతార‌ వంటి పాన్-ఇండియా సినిమాలు భారతీయ సినిమా కథనాన్ని పూర్తిగా మార్చగలిగాయి. జాతీయ అంత‌ర్జాతీయ స్థాయిలో ఈ సినిమాలు సాధించిన విజయం ప్రతి ప‌రిశ్ర‌మ‌లో స్ఫూర్తిని నింపాయి. ఈ సినిమాల దర్శకులు లార్జ‌ర్ దేన్ లైఫ్ పాత్ర‌ల‌తో సృజనాత్మకతను ప్రదర్శించడమే కాకుండా మాస్ కమర్షియల్ సినిమాల జానర్‌కు కొత్త నిర్వచనం ఇచ్చారు.

పాన్-ఇండియన్ ప్రాజెక్ట్‌లను తెర‌కెక్కించే ప్రాంతీయ దర్శకుల విజయం కేవలం అనుభవజ్ఞులైన వారికి మాత్రమే పరిమితం కాకుండా కేవ‌లం ఒక‌టి రెండు సినిమాల‌ విద్యార్థులు కూడా పాన్ ఇండియాలో సంచ‌ల‌నాలు సృష్టించారు. సందీప్ రెడ్డి వంగా అలాంటి ఒక సంచ‌ల‌నం. అర్జున్ రెడ్డి, క‌బీర్ సింగ్, యానిమ‌ల్ చిత్రాల‌తో జాతీయ అంత‌ర్జాతీయ స్థాయిలో వేవ్స్ క్రియేట్ చేసాడు సందీప్ వంగా. చిన్న ఏజ్ లో పెద్ద పేరు తెచ్చుకున్న ద‌ర్శ‌కుడిగా అట్లీ పేరు మార్మోగుతోంది. తమ మాతృభాషలో అత్యంత విజయవంతమైన సినిమాలను రూపొందించడం ద్వారా వీరంతా తమ సామర్థ్యాన్ని నిరూపించుకున్నారు. యానిమ‌ల్, జ‌వాన్ లాంటి భారీ పాన్ ఇండియా బ్లాక్ బ‌స్ట‌ర్ల‌ను వీరు తెర‌కెక్కించారు.

కథల్ని చెప్ప‌డంలో విప్లవం అంటే ఏమిటో చూపించారు సౌత్ డైరెక్ట‌ర్స్. కేవలం మాస్ కమర్షియల్ సినిమాలకు లేదా లార్జ‌ర్ దేన్ లైఫ్ పాత్రలకు మాత్రమే పరిమితం కాదు. రిషబ్ శెట్టి `కాంతార` వంటి అందమైన జాన‌ప‌ద థ్రిల్ల‌ర్ క‌థ‌ను అద్భుతంగా చెప్పాడు. ఖైదీ (కైథీ), విక్ర‌మ్ లాంటి యాక్షన్ థ్రిల్లర్ ల‌తో లోకేష్ క‌న‌గ‌రాజ్ గొప్ప సంచ‌ల‌నాలు సృష్టించాడు. మంజుమ్మెల్ బాయ్స్ వంటి సర్వైవల్ థ్రిల్లర్ సౌత్ నుంచి వ‌చ్చింది. ఆయా సినిమాలు దేశవ్యాప్తంగా భాష‌ స‌రిహ‌ద్దుల‌తో సంబంధం లేకుండా రికార్డులు బద్దలు కొట్టాయి.

అటువంటి వినూత్న‌మైన‌ కంటెంట్‌ను వెత‌క‌డం, వాస్తవిక క‌థ‌ల‌ను ఉప‌యోగించుకుని క‌మ‌ర్షియ‌లైజ్ చేయ‌డంలో ద‌ర్శ‌కులు పెద్ద విజ‌యాలు సాధించారు. నేటిత‌రం ద‌ర్శ‌కులు మరింత ప్రభావవంతంగా సినిమాల‌ను తెర‌కెక్కిస్తున్నార‌న‌డంలో సందేహం లేదు. చందు మొండేటి- కార్తికేయ, కార్తికేయ 2 వంటి విల‌క్ష‌ణ సినిమాల‌తో జాతీయ స్థాయిలో గుర్తింపు తెచ్చుకున్నారు. కార్తికేయ 2 పాన్ ఇండియా విజ‌యం అందుకుంది. అలాగే ఇటీవ‌లే విడుద‌లైన ప్ర‌శాంత్ వ‌ర్మ హ‌నుమాన్ పాన్ ఇండియాలో సంచ‌ల‌న విజ‌యం సాధించింది. మేజ‌ర్ తో శ‌శికిర‌ణ్ తిక్క‌- అడివి శేష్ లాంటి ప్ర‌తిభావంతులు పాన్ ఇండియాలో సంచ‌ల‌నాలు సృష్టించారు. హిందీ బెల్ట్ లో తెలుగు ద‌ర్శ‌కుల హ‌వా ఒక రేంజులో కొన‌సాగుతోంది. రాజ‌మౌళి, ప్ర‌శాంత్ నీల్ వంటి సీనియ‌ర్ ప్ర‌తిభావంతుల‌తో పాటు చందు మొండేటి, ప్ర‌శాంత్ వ‌ర్మ, అడివి శేష్, శశికిర‌ణ్ తిక్కా లాంటి యువ ప్ర‌తిభావంతులు సౌత్ లేదా టాలీవుడ్ నుంచి వెల్లువెత్త‌డం ఆశ్చ‌ర్య‌ప‌రిచింది. ప్రేక్షకులు వీరి నుంచి వ‌చ్చిన‌ విభిన్న శైలి సినిమాల‌ను గొప్ప‌గా ఆద‌రించారు.

సంవత్సరాలుగా భారతీయ సినిమా వివిధ ర‌కాల‌ ఆలోచ‌న‌లు ఉన్న ప్రేక్షకులను ఎదుర్కొంది. కాలంతో పాటు, నేటి ప్రేక్షకులు భాష లేదా సమాజంలోని వర్గాలతో సంబంధం లేకుండా విభిన్న క‌థ‌ల‌తో సినిమాలను అంగీకరించే గొప్ప పరిణతిని ప్రేక్ష‌కులు సాధించారు. ప్రేక్షకులు వారి స్వ‌స్థ‌లాల‌తో సంబంధం లేకుండా వివిధ రకాల కంటెంట్‌ను అంగీకరించే ఈ పరిణామం ఈ రోజు మ‌న ద‌ర్శ‌క‌నిర్మాతలు చేసే సాహసోపేతమైన వినూత్నమైన సృజనాత్మక ప్ర‌క్రియ‌ల‌ను గొప్ప విజ‌యాలుగా మ‌లుస్తున్నాయ‌న‌డంలో సందేహం లేదు.