ఆ ఒక్క విషయంలో సుక్కును మించలేకపోయిన రాజమౌళి!

ఏ వృత్తిలోనైనా గురు శిష్యుల అనుబంధం ప్రత్యేకమైనది. శిష్యుడు ఉన్నత స్థాయికి ఎదిగితే ఆ గురువుకు వచ్చే ఆనందం మాటల్లో చెప్పలేం. అయితే అలాంటి ఆనందాన్ని ఫిల్మ్ ఇండస్ట్రీలో దర్శకుడు సుకుమార్ కు మాత్రమే దక్కిందని చెప్పాలి. ఆయన స్కూల్ నుంచి వచ్చిన శిష్యులంతా చాలా వరకు సూపర్ సెక్సెస్ లను అందుకున్నారు. కానీ ఇండస్ట్రీలో దర్శకధీరుడుగా గుర్తింపు పొందిన రాజమౌళి మాత్రం ఈ విషయంలో సుకుమార్ ను అధిగమించలేకపోయారు.

జక్కన్న బాహుబలి, ఆర్ఆర్ఆర్ తో పాన్ ఇండియా, పాన్ వరల్డ్ సినిమాలంటూ ట్రెండ్ సెట్ చేస్తున్నారు కాని, తన శిష్యులను మాత్రం ఉన్నత స్థాయికి తీసుకెళ్లలేకపోతున్నారనే వాదన చిత్ర సీమలో ఉంది. ఆయన దగ్గర పని నేర్చుకున్న శిష్యులంతా ఇప్పటివరకు పెద్దగా సక్సెస్ లను అందుకోలేకపోయారు. ప్రేక్షకుల్లో పెద్దగా గుర్తింపును తెచ్చుకోలేకపోయారు. అదే సుకుమార్ అసిస్టెంట్లు మాత్రం దర్శకులుగా దుమ్ముదులిపేస్తున్నారు.

ఉప్పెనతో బుచ్చి బాబు వచ్చి రాగానే వందకోట్ల డైరెక్టర్ గా మారిపోయాడు. ఇప్పుడు ఏకంగా మెగా పవర్ స్టార్ తో సినిమా చేస్తున్నాడు. దసరాతో శ్రీకాంత్ ఓదెలా కూడా సూపర్ సక్సెస్ ను అందుకున్నారు. మరో సుక్కు శిష్యుడు సూర్యప్రతాప్ కూడా గతంతో కుమారి 21 ఎఫ్ , 18 పేజెస్ తో హిట్స్ మెట్టెక్కారు. ఇలా ఆల్మోస్ట్ సుక్కు శిష్యులంతా చాలామందే క్లిక్ అయ్యారు.

కానీ బిగ్గెస్ట్ హిట్స్ అందుకున్న జక్కన్న నుంచి అలాంటి శిష్యుడు ఒక్కరు కూడా లేకపోవడం షాకింగ్ అనే చెప్పాలి. రాజమౌళి శిష్యుల్లో కరుణ కుమార్ గతంలో నితిన్ తో ద్రోణ అనే సినిమా చేశారు. అది అట్టర్ ఫ్లాప్ గా నిలిచింది. ఆ తర్వాత పలువురు జక్కన్న అసిస్టెంట్ డైరెక్టర్లు కూడా తమ అదృష్టాన్ని పరీక్షించుకున్నారు. జువ్వ, దిక్కులు చూడకు రామయ్య వంచి చిత్రాలను త్రికోటి చేశారు. కానీ ఏదీ వర్కౌట్ అవ్వలేదు. ఇక నవీన్ గాంధీ తెరకెక్కించిన గాలీపటం, మహాదేవ్ దర్శకత్వంలో వచ్చిన మిత్రుడు, జీఆర్ కృష్ణ రూపొందించిన ఇద్దరి లోకం ఒకటే, రీసెంట్ గా ఆశ్విన్ గంగరాజు డైరెక్ట్ చేసిన ఆకాశవాణి ఏదీ హిట్ అవ్వలేదు. అన్నీ బాక్సాఫీస్ వద్ద నిరాశ పరిచాయి.

ఇలా రాజమౌళి స్కూలు నుంచి వచ్చిన శిష్యులంతా పెద్దగా సక్సెస్ కాకపోవడంతో.. ఈ ఒక్క విషయంలో జక్కన్న.. సుకుమార్ ను అధిగమించలేకపోయారని అంటుంటారు. చూడాలి మరి భవిష్యత్ లోనైనా దర్శకధీరుడు శిష్యులు హిట్ సినిమాలు తెరకెక్కించి జక్కన్న పేరును నిలబెడతారో లేదో.. ఇకపోతే ప్రస్తుతం రాజమౌళి సూపర్ స్టార్ మహేశ్ బాబుతో చేయబోయే పాన్ వరల్డ్ సినిమా కోసం కసరత్తులు చేస్తున్నారు. ఇది త్వరలోనే సెట్స్ పైకి వెళ్లనుంది.