బిబి బ్యూటీ 'పుష్ప 2' డబ్బింగ్‌ పూర్తి

అల్లు అర్జున్‌ హీరోగా సుకుమార్‌ దర్శకత్వంలో భారీ బడ్జెట్‌తో రూపొందిన పుష్ప 2 సినిమాను డిసెంబర్‌ 5న ప్రపంచ వ్యాప్తంగా విడుదల చేయడం కోసం దాదాపు అన్ని పనులు పూర్తి అయ్యాయి. డబ్బింగ్‌కు సంబంధించి ఒకరు ఒకరు చొప్పున అంతా పూర్తి చేసినట్లుగా తెలుస్తోంది. తాజాగా బిగ్‌బాస్ బ్యూటీ దివి సైతం పుష్ప 2 కోసం తన డబ్బింగ్‌ను పూర్తి చేసినట్లుగా ఇన్‌స్టాగ్రామ్ ద్వారా షేర్‌ చేసి అందరి దృష్టిని ఆకర్షించింది. పుష్ప పార్ట్‌ 1 లో దివి కనింపించలేదు. మరి పుష్ప 2 లో ఈమె కనిపించబోతుందా అనే ఆసక్తి అందరిలోనూ మొదలు అయింది.

పుష్ప 2 సినిమాకి దివి డబ్బింగ్‌ చెప్పడంతో ఆమె పాత్ర ఏమై ఉంటుంది అంటూ అంతా ఆసక్తిగా ఎదురు చూస్తున్నారు. దివి ఈ సినిమాలో చిన్న పాత్రలో నటించిన కచ్చితంగా పెద్ద అవకాశం అన్నట్లుగా చెప్పవచ్చు. సోషల్‌ మీడియాలో పుష్ప పార్ట్‌ 2 లో భాగం అయినందుకు గాను దివికి అభినందనలు శుభాకాంక్షలు పెద్ద ఎత్తున తెలియజేస్తూ సోషల్‌ మీడియా ద్వారా కామెంట్స్ చేస్తున్నారు. పుష్ప పార్ట్‌ 2 లో భాగం అయినందుకు తనుకు చాలా సంతోషంగా ఉందని దివి చెప్పడంను బట్టి చూస్తూ ఉంటే ఆమె ఈ సినిమాలో నటించి ఉంటుంది అంటూ చాలా మంది అభిప్రాయం వ్యక్తం చేస్తున్నారు.

దివికి బిగ్ బాస్ ద్వారా మంచి గుర్తింపు దక్కింది. అంతకు ముందు పలు సినిమాల్లో చిన్న పాత్రలు, డైలాగ్‌ పాత్రలు చేసినా గుర్తింపు రాలేదు. కానీ బిగ్‌బాస్‌ ద్వారా ఒక్కసారిగా దివి బ్యూటీని అంతా గుర్తించారు. హీరోయిన్‌ రేంజ్ అందం అయినా పాపం తెలుగు అమ్మాయి కావడం వల్ల ఆఫర్లు రావడం లేదు అంటూ కొందరు ఆమె గురించి మాట్లాడుకుంటూ ఉంటారు. ఆ మధ్య చిరంజీవి తన సినిమాలో ఛాన్స్ ఇస్తాను అంటూ హామీ ఇచ్చారు. అన్నట్లుగానే చిరు సినిమాలో దివి నటించింది. కానీ ఆ పాత్రతో దివికి పెద్దగా గుర్తింపు రాలేదు. హీరోయిన్‌గా సినిమాలు చేస్తూనే ఇలా పెద్ద హీరోల సినిమాల్లో చిన్న పాత్రల్లో కనిపిస్తోంది.

పుష్ప 2 సినిమాకు పాన్‌ ఇండియా స్థాయిలో క్రేజ్ ఉంది. కనుక ఈ సినిమా హిట్‌ అయితే కచ్చితంగా ఈ అమ్మడికి ఇతర భాషల్లోనూ గుర్తింపు దక్కే అవకాశాలు ఉన్నాయి. అదే జరిగితే దివికి ఇతర భాషల్లో ఆఫర్లు రావచ్చు అంటూ కొందరు అభిప్రాయం వ్యక్తం చేస్తున్నారు. మొత్తానికి దివికి పుష్ప 2 ఛాన్స్ కెరీర్‌కి యూటర్న్‌గా నిలుస్తుందా లేదంటే ఇలా వచ్చి అలా వెళ్లి పోయే పాత్ర చేయడం వల్ల మరింత విమర్శలు ఎదుర్కోవాల్సి వస్తుందా అనేది చూడాలి. ప్రస్తుతానికి పుష్ప 2 సినిమా బాక్సాఫీస్ వద్ద సందడికి రెడీ అవుతోంది. రూ.2000 కోట్ల వసూళ్ల టార్గెట్‌తో పుష్ప 2 విడుదల కాబోతుంది.