యూట్యూబ్‌లో దుమ్మురేపుతున్న 'డబుల్ ఇస్మార్ట్' ట్రైలర్!

ఉస్తాద్ రామ్ పోతినేని, డైనమిక్ డైరెక్టర్ పూరి జగన్నాధ్ కాంబినేషన్ లో రూపొందిన లేటెస్ట్ మూవీ "డబుల్ ఇస్మార్ట్". ఇందులో కావ్య థాపర్‌ హీరోయిన్ గా నటించగా.. సంజయ్‌ దత్‌ విలన్ పాత్ర పోషించారు. ఇండిపెండెన్స్ డే స్పెషల్ గా థియేటర్లలోకి రాబోతున్న ఈ సినిమాకి సంబంధించిన ప్రమోషన్స్ జోరుగా సాగుతున్నాయి. తాజాగా మేకర్స్ ఈ పాన్ ఇండియా మూవీ థియేట్రికల్ ట్రైలర్ ను రిలీజ్ చేశారు. దీనికి అన్ని భాషల్లోనూ అనూహ్య స్పందన లభిస్తోంది.

పూరీ, రామ్ కాంబోలో వచ్చిన బ్లాక్ బస్టర్ 'ఇస్మార్ట్ శంకర్' చిత్రానికి సీక్వెల్ గా "డబుల్ ఇస్మార్ట్" తెరకెక్కింది. ఫస్ట్ పార్ట్ కి మించి, డబుల్ ఎంటర్టైన్మెంట్ & డబుల్ మాస్ మ్యాడ్ నెస్ తో రాబోతున్నట్లు ట్రెయిలర్ తోనే హింట్ ఇచ్చారు. దాదాపు రెండున్నర నిమిషాలకు పైగా నిడివితో కట్ చేసిన ఈ ట్రైలర్.. ప్రారంభం నుండి చివరి వరకు పూర్తిగా ఎంటర్టైనింగ్ గా, ఎంగేజింగ్ గా సాగింది. పూరీ జగన్నాథ్ టేకింగ్, రామ్ పెర్ఫార్మెన్స్, ఎమోషన్, యాక్షన్ వంటి అంశాలు హైలైట్ గా నిలిచాయి.

ఉస్తాద్ ఇస్మార్ట్ శంకర్ అలియాస్ డబుల్ ఇస్మార్ట్ గా తిరిగివచ్చిన రామ్.. ఎనర్జిటిక్ క్యారక్టర్ తో, తన మెంటల్ మాస్‌ యాక్షన్‌ హంగామాతో ఆకట్టుకున్నారు. కావ్య థాపర్ అందంగా కనిపించింది. రామ్, కావ్యల మధ్య నడిచే లవ్‌ ట్రాక్‌, వాళ్లిద్దరి కెమిస్ట్రీ అలరించింది. బాలీవుడ్ యాక్టర్ సంజయ్‌ దత్‌ బిగ్‌ బుల్‌ అనే పవర్ ఫుల్ విలన్ పాత్రలో కనిపించారు. ట్రైలర్ లో రామ్ - సంజూ భాయ్ లు తలపడే సీన్స్ స్పెషల్ అట్రాక్షన్ గా నిలిచాయి.

పూరి జగన్నాధ్ డిఫరెంట్ స్టోరీతో పాటుగా మెయిన్ క్యారెక్టర్స్ ను తీర్చిదిద్దిన విధానం ఆకట్టుకుంటుంది. పూరీ నుంచి ఆశించే అన్ని అంశాలు ఈ సినిమాలో ఉండేలా చూసుకున్నాడని ట్రైలర్ తోనే అర్థమవుతోంది. కమర్షియల్ ఎలిమెంట్స్‌తో పాటు మనసుకు హత్తుకునే మదర్ ఎమోషన్ కూడా ఉంటుందని స్పష్టం చేశారు. మణిశర్మ బ్యాగ్రౌండ్ స్కోర్.. సామ్‌ కె.నాయుడు & జియాని జియాన్నెలి సినిమాటోగ్రఫీ సినిమాకి తగ్గట్లుగా కుదిరాయి. పూరి కనెక్ట్స్‌ బ్యానర్ లో రూపొందిన ఈ చిత్రానికి కార్తీక శ్రీనివాస్ ఎడిటింగ్ వర్క్ చేశారు.

"డబుల్ ఇస్మార్ట్" మూవీ ట్రైలర్ యూట్యూబ్ లో 8+ మిలియన్ వ్యూస్‌తో టాప్ ట్రెండింగ్‌లో దూసుకుపోయింది. ట్రైలర్ తో ఆడియన్స్ లో అంచనాలు రెట్టింపు చేసిన ఈ సైన్స్ ఫిక్షన్ యాక్షన్ మూవీ.. సరిగ్గా మరో 10 రోజుల్లో థియేటర్లలోకి రానుంది. ఆగస్ట్ 15వ తేదీన తెలుగు, హిందీ, తమిళ, కన్నడ, మలయాళ భాషల్లో ప్రపంచ వ్యాప్తంగా భారీ స్థాయిలో విడుదల కానుంది.