తెలుగులో 100 కోట్లు కొట్టిన పరభాషా నటుడు!

తెలుగు ప్రేక్షకులకు సినిమాలు నచ్చితే చాలు, భాషతో సంబంధం లేకుండా అదరిస్తుంటారు. కంటెంట్ ఉండే పరభాషా నటులను కూడా నెత్తిన పెట్టుకుంటారని అనేక సందర్భాల్లో ప్రూవ్ అయింది. మలయాళ చిత్ర పరిశ్రమ నుండి వచ్చిన హీరో దుల్కర్ సల్మాన్ ఇప్పుడు టాలీవుడ్ ఇండస్ట్రీలో బ్యాక్ టూ బ్యాక్ హిట్లు కొడుతున్నారంటే, అతన్ని తెలుగు ఆడియన్స్ ఎంతలా ఓన్ చేసుకున్నారనేది అర్థం అవుతోంది. ఇప్పుడు లేటెస్టుగా దుల్కర్ 100 కోట్ల క్లబ్ లో చేరి మరో అరుదైన ఫీట్ సాధించారు.

దుల్కర్ సల్మాన్ ఇటీవల 'లక్కీ భాస్కర్' సినిమాతో ప్రేక్షకుల ముందుకు వచ్చారు. ఇది ఆయనకు స్ట్రెయిట్ తెలుగు మూవీ. వెంకీ అట్లూరి దర్శకత్వం వహించిన ఈ చిత్రాన్ని సితార నాగవంశీ నిర్మించారు. దీపావళి సందర్భంగా రిలీజైన ఈ సినిమా బాక్సాఫీస్ వద్ద బ్లాక్ బస్టర్ హిట్టయ్యింది. ప్రపంచ వ్యాప్తంగా 100 కోట్లకి పైగా కలెక్షన్స్ రాబట్టింది. తెలుగులో చాలామంది హీరోలు వంద కోట్ల మార్క్ టచ్ చేయాలని కష్టపడుతుంటే, ఒక మాలీవుడ్ హీరో తెలుగు సినిమాతో ఆ ప్రతిష్టాత్మక క్లబ్ లో చేరడం మామూలు విషయం కాదు.

'ఓకే బంగారం' లాంటి డబ్బింగ్ సినిమాతో టాలీవుడ్ జనాలకు పరిచయమైన దుల్కర్ సల్మాన్.. 'మహానటి' మూవీతో నేరుగా తెలుగులోకి వచ్చారు. ఇది ₹85 కోట్లకు పైగా వసూళ్లు సాధించింది. దీని తర్వాత చేసిన 'సీతా రామం' సినిమా ₹95 కోట్లకు పైగానే కలెక్ట్ చేసింది. ఇదే క్రమంలో వచ్చిన 'లక్కీ భాస్కర్' చిత్రం 100 కోట్లను క్రాస్ చేసింది. దుల్కర్ కెరీర్ లోనే మొదటి వంద కోట్ల క్లబ్ సినిమాగా, అత్యధిక వసూళ్లు చేసిన చిత్రంగా నిలిచింది.

దుల్కర్ సల్మాన్ తన మాతృభాష మలయాళంలో ఇప్పటికే చాలా సినిమాలు చేశారు కానీ, ఒక్కటి కూడా వంద కోట్ల మార్క్ ను అధిగమించలేదు. ఇప్పుడు తెలుగు చిత్రంతో మైలురాయి క్లబ్ ను టచ్ చేశారు. అతని కెరీర్ లో హయ్యస్ట్ కలెక్షన్స్ సాధించిన మొదటి మూడు చిత్రాలూ తెలుగులో చేసినవే కావడం విశేషం. ఇండియన్ సినిమాలో తమ సొంత భాషలో కాకుండా, పక్క ఇండస్ట్రీలో ఇలాంటి అరుదైన ఘనత దక్కించుకున్న ఏకైక హీరోగా దుల్కర్ నిలిచారు.

ఎన్నో ఏళ్లుగా ఎందరో తమిళ, మలయాళ, కన్నడ స్టార్ హీరోలు స్ట్రెయిట్ తెలుగు సినిమాల్లో నటించారు కానీ.. దుల్కర్ సల్మాన్ మాదిరిగా ఎవరూ ఇలాంటి రికార్డును సాధించలేదు. ఇది కచ్ఛితంగా చాలా కాలం పాటు చిరస్మరణీయంగా నిలిచిపోయే అపూర్వమైన రికార్డు అని చెప్పాలి. దుల్కర్ ప్రస్తుతం 'ఆకాశంలో ఒక తార' 'కాంత' వంటి మరో రెండు తెలుగు చిత్రాల్లో నటిస్తున్నారు. ఇవి రెండూ టాలీవుడ్ లోని పెద్ద ప్రొడక్షన్స్ లో రూపొందుతున్న సినిమాలే. వీటితో మలయాళ నటుడు తన సక్సెస్ ట్రాక్ ను కంటిన్యూ చేస్తాడని ఫ్యాన్స్ భావిస్తున్నారు.