టాలీవుడ్‌లో పాగా వేసిన మలయాళ హీరో!

తెలుగులో మంచి క్రేజ్ ఉన్న పరభాషా హీరోలలో మలయాళ స్టార్ దుల్కర్ సల్మాన్ ఒకరు. ఒకప్పుడు డబ్బింగ్ చిత్రాలతో టాలీవుడ్ ప్రేక్షకులను ఆకట్టుకున్న ఈ హీరో.. స్ట్రెయిట్ సినిమాలతో తనకంటూ ఓ మార్కెట్ క్రియేట్ చేసుకున్నారు. మన హీరోలతో పోటీగా చిత్రాలను రిలీజ్ చేసే స్థాయికి చేరుకున్నారు. దుల్కర్ చేతిలో ఇప్పుడు నాలుగు తెలుగు ప్రాజెక్ట్స్ ఉన్నాయి. ఇవన్నీ కూడా టాప్ ప్రొడక్షన్ హౌసెస్ లో రూపొందుతోన్న భారీ చిత్రాలే కావడం విశేషం.

దుల్కర్ సల్మాన్ ప్రస్తుతం సితార ఎంటర్‌టైన్‌మెంట్స్‌ బ్యానర్ లో 'లక్కీ బాస్కర్' అనే సినిమా చేస్తున్న సంగతి తెలిసిందే. సార్ ఫేమ్ వెంకీ అట్లూరి దర్శకత్వంలో తెరకెక్కుతున్న ఈ చిత్రంలో మీనాక్షి చౌదరి హీరోయిన్ గా నటిస్తోంది. నిర్మాతలు ఈ పాన్ ఇండియా మూవీ కోసం భారీగానే ఖర్చు చేశారు. ఇది 1980-90స్ బ్యాక్ డ్రాప్ లో రూపొందే పీరియాడిక్ డ్రామా కావడంతో.. ఆ కాలం నాటి ముంబై నగరాన్ని తలపించే భారీ సెట్స్ ను హైదరాబాద్‌లో నిర్మించారు. ఈ చిత్రాన్ని తెలుగు, మలయాళం, తమిళం, హిందీ భాషల్లో ఆగస్టు 15న ప్రపంచ వ్యాప్తంగా విడుదల చేయబోతున్నారు.

దుల్కర్ సల్మాన్ తెలుగులో మరో పెద్ద ప్రాజెక్ట్ కమిట్ అయ్యారు. గీతా ఆర్ట్స్, స్వప్న సినిమాస్, లైట్ బాక్స్ మీడియా వంటి మూడు సంస్థలు కలిసి ఈ చిత్రాన్ని నిర్మించనున్నాయి. ఇది కూడా మల్టీలాంగ్వేజ్ మూవీ. దీని కోసం అల్లు అరవింద్, స్వప్న దత్, గుణ్ణం సందీప్ లాంటి ముగ్గురు నిర్మాతలు చేతులు కలిపారు. ప్రేమ ఇష్క్ కాదల్, సేనాపతి ఫేమ్ పవన్ సాధినేని డైరెక్షన్ లో ఈ సినిమా రూపొందనుంది. దుల్కర్ పుట్టినరోజు సందర్భంగా 'మేఘాలు తొలగిపోతాయి' అంటూ ఈరోజు ఆదివారం ఈ మూవీని అధికారికగా ప్రకటించబోతున్నారు. దీంతో పాటుగా SLV సినిమాస్‌ బ్యానర్ లో ఓ సినిమా చేస్తారని సమాచారం.

ఇదిలా ఉంటే దుల్కర్ సల్మాన్, రానా దగ్గుబాటి కలిసి ‘కాంత’ అనే సినిమా చేస్తున్నారు. లాస్ట్ ఇయర్ బర్త్ డేకే ఈ ప్రాజెక్ట్ ను అఫిషియల్ గా అనౌన్స్ చేశారు. ఇందులో దుల్కర్ హీరోగా నటించనుండగా, రానా కీలక పాత్ర పోషిస్తున్నారని సమాచారం. ఇద్దరు హీరోల హోమ్ బ్యానర్స్ స్పిరిట్ మీడియా, వేఫారర్ ఫిల్మ్స్ సంయుక్త నిర్మాణంలో ఈ సినిమా రూపుదిద్దుకుంటోంది. భారీ బడ్జెట్ తో పాన్ ఇండియా రేంజ్‍లో తీస్తున్నారు. దీనికి నీలా ఫేమ్ సెల్వమణి సెల్వరాజ్ దర్శకత్వం వహిస్తున్నారు.

'ఓకే బంగారం' అనే డబ్బింగ్ మూవీతో తెలుగు ప్రేక్షకుల దృష్టిని ఆకర్షించిన దుల్కర్ సల్మాన్.. ఇప్పుడు నాలుగు పెద్ద సినిమాలతో టాలీవుడ్ లో సందడి చేసే స్థాయికి చేరుకున్నారు. 'మహానటి', 'సీతా రామం' సినిమాలు బిగ్గెస్ట్ బ్లాక్ బస్టర్ అయిన తర్వాతే తెలుగులో మాలీవుడ్ స్టార్ క్రేజ్ మారిపోయింది. ఇటీవలే 'కల్కి 2898 AD' మూవీలో క్యామియో రోల్ తో సర్ప్రైజ్ చేసారు. ఈ క్రమంలో బ్యాక్ టూ బ్యాక్ సినిమాలతో అలరించడానికి రెడీ అవుతున్నారు.