ఈగల్.. ఇదేదో పత్తి యాపరమే..

టాలీవుడ్ లో హిట్లు ఫ్లాపులతో ఏమాత్రం సంబంధం లేకుండా వరుస సినిమాలు చేసుకుంటూ వెళ్లే హీరోలు అతి తక్కువ మంది మాత్రమే ఉన్నారు. అందులో మాస్ మహారాజా రవితేజ ఒకరు. కెరీర్ స్టార్టింగ్ నుంచి కూడా అదే విధానాన్ని ఫాలో అవుతున్నరాయన. గతేడాది ఏకంగా మూడు సినిమాలతో ప్రేక్షకులను అలరించిన రవితేజ.. లేటెస్ట్ గా ఈగల్ మూవీలో నటించిన విషయం తెలిసిందే.

టాలెంటెడ్ కార్తీక్ ఘట్టమనేని దర్శకత్వం వహించిన ఈ సినిమా.. ఫుల్ లెంగ్త్ యాక్షన్‌ తో రూపొందింది. షూటింగ్ ఎప్పుడో పూర్తి చేసుకున్న ఈ మూవీని సంక్రాంతికి విడుదల చేయాలని మేకర్స్ అనుకున్నారు. కానీ ఊహించని విధంగా అప్పుడు ప్రేక్షకుల ముందుకు తీసుకురాలేకపోయారు. దీంతో ఫిబ్రవరి 8వ తేదీన ఈ చిత్రాన్ని రిలీజ్ చేస్తున్నట్లు అనౌన్స్ చేశారు. రిలీజ్ డేట్ దగ్గరపడడంతో మూవీ యూనిట్ ప్రమోషన్ల స్పీడ్ పెంచింది. నిన్ననే ప్రీరిలీజ్ ఈవెంట్ ఘనంగా జరిగింది.

ఇక ఈగల్ సినిమాకు సంబంధించి ఇప్పటికే ఎన్నో ఇంట్రెస్టింగ్ విషయాలు ఒక్కొక్కటిగా బయటకు వచ్చాయి. రవితేజ లవ్ ట్రాక్ హైలెట్ గా ఉండబోతుందని ఇటీవలే టాక్ వచ్చింది. ఏ తెలుగు సినిమాలో చూడని విధంగా మేకర్స్ డిజైన్ చేసినట్లు తెలుస్తోంది. తాజాగా మరో క్రేజీ అప్డేట్ చక్కర్లు కొడుతోంది. ఈ మూవీలో పత్తి పండించే వ్యవసాయదారుడిగా రవితేజ కనిపిస్తారట. పత్తి రైతుల సమస్యలపై పోరాడుతారట. పత్తి మాఫియాను అంతం చేస్తారట.

ఇప్పటి వరకు మేకర్స్.. విడుదల చేసిన అన్ని పోస్టర్లలో పత్తి మెయిన్ గా కనిపిస్తోంది. ట్రైలర్ లో కూడా అనుపమ... వీళ్ల అందరినీ కంగారు పెట్టింది పత్తి, ప్రాంతం కాదు.. దాన్ని పండించేవాడు అని చెబుతోంది. దీంతో ఫ్యాన్స్ ఫిక్స్ అయిపోయారు. పత్తి రైతుగా రవితేజ కనిపించి.. మాఫియాకు చుక్కలు చూపిస్తారని అంటున్నారు. కానీ ప్రమోషన్లలో ఎక్కడా ఈ విషయాన్ని బయటపెట్టడం లేదు మేకర్స్. డైరెక్ట్ గా స్క్రీన్ పై చూస్తేనే థ్రిల్ ఉంటుందని ఇలా చేస్తున్నారేమో.

వరుస ప్లాపులతో సతమతమవుతున్న రవితేజ ప్రస్తుతం సాలిడ్ హిట్ కోసం ఎదురుచూస్తున్నారు. గతేడాది చిరంజీవి వాల్తేరు వీరయ్యలో గెస్ట్ రోల్ లో అలరించిన రవితేజ.. ఆ తర్వాత టైగర్ నాగేశ్వరరావు, రావణాసుర మూవీలతో ప్రేక్షకుల ముందుకు వచ్చారు. కానీ ఆ రెండు సినిమాలు నిరాశపరిచాయి. దీంతో ఈగల్ తో గట్టి కమ్ బ్యాక్ ఇవ్వాలని ట్రై చేస్తున్నారు. మరి స్టార్ హీరోలు డ్రైగా భావించే ఫిబ్రవరిలో వస్తున్న రవితేజ.. హిట్ కొడతారో లేదో చూడాలి.