ఎక్స్‌ట్రార్డినరీ మ్యాన్ ట్రైల‌ర్: త‌న‌లో న‌టుడిని బ‌య‌టికి తీసిన నితిన్

యూత్ స్టార్ నితిన్ హీరోగా వక్కంతం వంశీ ద‌ర్శ‌క‌త్వం వ‌హిస్తున్న చిత్రం 'ఎక్స్‌ట్రార్డినరీ మ్యాన్‌'. శ్రీలీల క‌థానాయిక‌. హారిస్ జైరాజ్ సంగీతం అందిస్తున్నారు. ఈ సినిమా సంగీతంపై భారీ అంచనాలు ఉన్నాయి. ఇప్ప‌టికే విడుద‌లైన సింగిల్స్, టీజ‌ర్ ఆక‌ట్టుకున్నాయి.

'నా పేరు సూర్య' లాంటి భారీ యాక్ష‌న్ సినిమా తెర‌కెక్కించిన వ‌క్కంతం ఇప్పుడు అందుకు పూర్తి భిన్న‌మైన నేప‌థ్యాన్ని ఎంచుకుని నితిన్ లాంటి ఎన‌ర్జిటిక్ హీరోతో ఫ్యామిలీ ఓరియెంటెడ్ మూవీని తెర‌కెక్కిస్తుండ‌డం ఆస‌క్తిని క‌లిగిస్తోంది. తాజాగా ట్రైల‌ర్ విడుద‌లైంది. ట్రైల‌ర్ ఆద్యంతం నితిన్ ఎక్స్ ట్రార్డిన‌రీ పెర్ఫామెన్స్ ఆక‌ట్టుకుంది. ట్రైల‌ర్ లో నితిన్ పూర్తిగా విల‌క్ష‌ణ‌మైన పాత్ర‌లో న‌టిస్తున్నాడ‌ని అర్థ‌మ‌వుతోంది. అత‌డి న‌డ‌క న‌డ‌త మాట తీరు ప్రతిదీ టోన్ డౌన్ గా క‌నిపిస్తున్నాయి. డైలాగ్స్ లో ఫ‌న్, ఫ్యామిలీతో ఎపిసోడ్స్ లో నితిన్ ఎక్స్ ట్రార్డిన‌రీగా క‌నిపిస్తున్నాడు. కానీ అత‌డు కొన్ని యాక్ష‌న్ బ్లాక్స్ లో న‌టుడిగాను క‌నిపిస్తున్నాడు. సింపుల్ గా క‌నిపిస్తూనే అసాధార‌ణ విష‌యాన్ని డీల్ చేసేవాడిగా అత‌డిని ఆవిష్క‌రిస్తున్నారని ట్రైల‌ర్ చెబుతోంది.

చిన్న త‌నం నుంచి అత‌డు పెరిగిన తీరు వేరు. ప్ర‌తి ఫ్రేమ్‌లోను అతడు గుంపులో వెన‌కాలే క‌నిపిస్తున్నాడు. ఎందుకంటే అత‌డు జూనియ‌ర్ ఆర్టిస్టుగా ఇందులో క‌నిపించ‌నున్నాడు. ఇక త‌న త‌ల్లితో బాల‌కుడిగా ఉన్న‌ప్పుడు అత‌డు మాట్లాడే మాట‌ల్లో పెద్ద అర్థ‌మే ఉంది. నీలో యాక్ట‌ర్ ఉన్నాడ‌నుకుంటున్నాను రా! అంటూ నితిన్ త‌ల్లి పాత్ర‌ధారి రోహిణి ఆశ్చ‌ర్యం వ్య‌క్తం చేస్తుంది. దానికి త‌గ్గ‌ట్టే నితిన్ ఓ వైపు న‌టుడిగా ప్ర‌య‌త్నిస్తున్న విజువ‌ల్స్ ఆక‌ట్టుకున్నాయి. ర‌క‌ర‌కాల గెట‌ప్పుల్లో నితిన్ త‌న‌లోని న‌టుడిని బ‌య‌టికి తీస్తున్నాడు. అయితే సినిమా సీరియ‌స్ టోన్ తీసుకునే క్ర‌మంలో నితిన్ లోని కొత్త యాంగిల్ ని కూడా తెర‌పై చూడాల్సి ఉంటుంద‌ని ట్రైల‌ర్ ఫినిషింగ్‌లో వెల్ల‌డైంది. డైలాగ్స్ సింపుల్ గా క్లీన్ గా ఆక‌ట్టుకుంటున్నాయి. ఇక శ్రీలీల‌తో నితిన్ ఫ‌న్ ఎపిసోడ్స్ ప్లెజెంట్ గా ఉన్నాయి. ట్రైల‌ర్ చివ‌రిలో ఖైదీగా సీనియ‌ర్ న‌టుడు రాజ‌శేఖ‌ర్ ఎంట్రీని ఫ‌న్నీగా ఆవిష్క‌రించారు. జీవితంపై వేదాంతం అత‌డి నోట న‌వ్వులు పూయిస్తోంది.

నిష్ణాతుడైన రచయిత-దర్శకుడు వక్కంతం వంశీ తెర‌కెక్కిస్తున్న సినిమా అన‌గానే 'నా పేరు సూర్య‌'లోని బ‌ల‌మైన క్యారెక్ట‌రైజేష‌న్ గుర్తుకు వ‌స్తుంది. కానీ ఇప్పుడు అందుకు భిన్న‌మైన యువ‌కుడిని క‌థానాయ‌కుడిగా చూపిస్తున్నాడు. ఒక జూనియ‌ర్ ఆర్టిస్టుగా నితిన్ ని ఆవిష్క‌రిస్తున‌నాడు. మొద‌టి ప్ర‌య‌త్నానికి, ద్వితీయ ప్ర‌య‌త్నానికి వ‌క్కంతం వేరియేష‌న్ స్ప‌ష్ఠంగా అర్థ‌మ‌వుతోంది. ఈసారి అతడు పూర్తిగా హాస్యం, వినోదానికి పెద్ద పీట వేసాడ‌ని అర్థం చేసుకోవ‌చ్చు. ఆదిత్య మూవీస్ అండ్ ఎంటర్‌టైన్‌మెంట్స్ -రుచిరా ఎంటర్‌టైన్‌మెంట్స్ సహకారంతో శ్రేష్ట్ మూవీస్ బ్యానర్‌పై సుధాకర్ రెడ్డి - నికితారెడ్డి ఈ చిత్రాన్ని నిర్మిస్తున్నారు. ఈ చిత్రం 8 డిసెంబర్ 2023న ప్రపంచవ్యాప్తంగా థియేటర్లలో విడుదల కానుంది.