పాట్నాలో పుష్ప ఫ్యాన్స్ ర‌చ్చ‌.. పోలీసుల‌పైకి చెప్పులు!

అల్లు అర్జున్, రష్మిక మందన్న జంటగా న‌టించిన మోస్ట్ అవైటెడ్ చిత్రం పుష్ప 2 డిసెంబ‌ర్ 5న ప్ర‌పంచ‌వ్యాప్తంగా విడుద‌ల‌కు సిద్ధ‌మ‌వుతోంది. తాజాగా పుష్ప 2: ది రూల్ ట్రైలర్ విడుద‌లైంది. పాట్నాలోని గాంధీ మైదాన్‌లో సాయంత్రం 5 గంటల నుంచి గ్రాండ్ ఈవెంట్ ప్రారంభం కాగా వేడుక వ‌ద్ద పుష్ప ఫ్యాన్స్ ర‌చ్చ మ‌రో స్థాయికి చేరుకుంది. ఈవెంట్ కోసం భారీగా అభిమానులు త‌ర‌లి రావ‌డంతో కొంత తోపులాట జ‌రిగింది.

వేదిక వ‌ద్ద‌కు ఊహించ‌ని రీతిలో పుష్ప అభిమానులు త‌ర‌లి రావ‌డంతో కొంత గందరగోళం నెల‌కొంది. గాంధీ మైదాన్‌లో పెద్ద ఎత్తున గుమిగూడిన అల్లు అర్జున్ అభిమానులు చెప్పులు విసిరారు. పోలీసు అధికారులు జనాన్ని అదుపు చేయడం కనిపించింది.

అభిమానులు ఈ ట్రైల‌ర్ రాక కోసం కొన్ని నెల‌లుగా ఎంతో ఉత్కంఠ‌గా ఎదురుచూసారు. ట్రైల‌ర్ ఇప్ప‌టికే విడుద‌లై అంత‌ర్జాలంలో వైర‌ల్ గా దూసుకెళుతోంది. ట్రైల‌ర్ ప్రామిస్సింగ్ గా ఉందంటూ ఉత్త‌రాది మీడియా నుంచి ఇప్ప‌టికే స‌మీక్ష‌లు వ‌చ్చాయి. దీంతో ఇప్పుడు పుష్ప 2 కోసం ఎదురుచూపులు మ‌రింత పెరిగాయి.

ట్రైల‌ర్ వేడుక‌లో మైత్రీ మూవీ మేకర్స్ నిర్మాత నవీన్ యెర్నేని మాట్లాడుతూ, ''భారతదేశంలో అత్యంత కష్టపడి పనిచేసే హీరోలలో అల్లు అర్జున్ ఒకరు. అతడు ప్రతిరోజూ ఆలోచించే ఏకైక విషయం చిత్రం - పుష్ప 2. అతడితో ఇన్ని రోజులు ప్రయాణించడం మా అదృష్టం. ఈ ఈవెంట్‌ను సాధ్యపడేందుకు సహకరించిన మీడియాకు, పోలీసు బలగాలకు కృతజ్ఞతలు'' అని అన్నారు.

బ‌న్ని - ర‌ష్మిక‌కు ఘ‌న‌స్వాగ‌తం

వేదిక వ‌ద్ద‌కు విచ్చేస్తున్న అల్లు అర్జున్, ర‌ష్మిక‌కు అభిమానులు ఘ‌న స్వాగ‌తం ప‌లికారు. శ్రీవల్లి వ‌చ్చింది! అంటూ పుష్ప అభిమానులు గాంధీ మైదాన్ వ‌ద్ద సంద‌డి చేసారు. స్లీవ్‌లెస్ వెల్వెట్ బ్లౌజ్‌తో జత చేసిన మనీష్ మల్హోత్రా సిల్క్ చీరలో ర‌ష్మిక ఎంట్రీ అదిరిపోయింది. ఈవెంట్ కి పుష్పరాజ్ పాత్ర‌ధారి అల్లు అర్జున్ పూర్తి భద్రత మధ్య పాట్నాలోని గాంధీ మైదాన్‌కు చేరుకున్నారు. నలుపు రంగు సీక్విన్ సూట్ ధరించి అతడు స్మార్ట్ గా కనిపించాడు. పుష్ప స్వాగ్‌ని బ‌న్ని ఎలివేట్ చేసాడు. ఆస‌క్తిక‌రంగా పుష్ప 2 ట్రైలర్‌కు ముందు ఈ మూవీ టీజర్‌ను పాట్నాలో ప్రదర్శించారు.