డాన్ గురించి మీకు ఈ విషయం తెలుసా..!

హిందీ ప్రేక్షకులతో పాటు, సౌత్ సినీ ప్రేక్షకులకు కూడా 'డాన్‌' సినిమా సుపరిచితం. అమితాబచ్చన్ డాన్ సినిమాను ఇండియన్ సినిమా పరిశ్రమకు పరిచయం చేశాడు. ఆ సినిమా ఎంతటి విజయాన్ని సొంతం చేసుకుందో ప్రత్యేకంగా చెప్పనక్కర్లేదు. ఆ సినిమాకు రీమేక్ గా బాలీవుడ్ బాద్‌ షా షారుఖ్ ఖాన్ హీరోగా డాన్‌ సినిమాను చేసిన విషయం తెల్సిందే. 'డాన్‌' తో పాటు 'డాన్‌ 2' కూడా విడుదల అయ్యి సంచలన విజయాన్ని సొంతం చేసుకుంది. చాలా సంవత్సరాలుగా ఉత్తరాది సినీ ప్రేక్షకులు డాన్‌ 3 కోసం వెయిట్‌ చేస్తున్నారు. అందుకు సంబంధించిన చర్చలు జరుగుతున్నాయనే వార్తలు ఆ మధ్య వచ్చాయి.

డాన్ 3 ఎలాంటి అప్‌డేట్ లేదు.. కానీ డాన్ సినిమాకు మొదట షారుఖ్ ఖాన్‌ ను అనుకోలేదు అంటూ దర్శకుడు ఫర్హాన్‌ తాజా ఇంటర్వ్యూలో చేసిన వ్యాఖ్యలు అందరి దృష్టిని ఆకర్షిస్తున్నాయి. ఫర్హాన్ ఆ ఇంటర్వ్యూలో మాట్లాడుతూ... నేను హృతిక్‌ రోషన్ తో లక్ష్య సినిమాను చేస్తున్న సమయంలో డాన్‌ సినిమా రీమేక్ గురించిన ఆలోచన వచ్చింది. అమితాబ్‌ సర్‌ చేసిన ఆ సినిమా ని హృతిక్ రోషన్ తో చేస్తే కచ్చితంగా మంచి ఫలితం వస్తుందని నేను భావించాను. లక్ష్య సినిమా సమయంలోనే హృతిక్ కి ఆ విషయం చెప్పడం, ఆయన చాలా ఎగ్జైట్‌ అయ్యి చేసేందుకు ఆసక్తి చూపించడం జరిగింది.

రీమేక్‌ కోసం స్క్రిప్ట్‌ రెడీ చేయమని, వెంటనే చేద్దామని కూడా హృతిక్ అన్నాడు. దాంతో నేను లక్ష్య సినిమా తర్వాత కొన్నాళ్లకు డాన్‌ రీమేక్ కోసం స్క్రిప్ట్‌ ను రెడీ చేయడం మొదలు పెట్టాను. ఆ సమయంలో నాకు డాన్‌ పాత్రకి హృతిక్ కంటే కూడా షారుఖ్ ఖాన్‌ ఎక్కువ న్యాయం చేస్తాడు అనిపించింది. ఆ విషయాన్ని హృతిక్ కు చెప్పాను. షారుఖ్ ఖాన్‌ బాడీ లాంగ్వేజ్ తో పాటు, అతడి ఇమేజ్‌ డాన్‌ సినిమాకు బాగా సెట్‌ అవుతుందని తాను భావిస్తున్నాను అంటూ హృతిక్ కి చెప్పిన సమయంలో మీరు మీ సినిమాలను ప్రేక్షకుల అభిరుచికి తగ్గట్లుగా, అందరి కంటే ఉత్తమంగా తీస్తారు. డాన్ పాత్రకు షారుఖ్ కచ్చితంగా న్యాయం చేయగలడు అని మీరు నమ్మితే ఆయనతో సినిమా చేయడం ఉత్తమ నిర్ణయం అన్నాడు.

నాతో సినిమా గురించి ఆలోచించకుండా, సినిమాకి తగ్గ నటుడిని, ఆ పాత్రకు సెట్‌ అయ్యే హీరోను ఎంపిక చేసుకోవడం మంచి నిర్ణయం. కనుక నువ్వు షారుఖ్ తో డాన్‌ రీమేక్ ను మొదలు పెట్టు అన్నట్లుగా హృతిక్‌ రోషన్ నాతో అన్నారు. అప్పుడే షారుఖ్ వద్దకు వెళ్లడం, ఆయన కూడా చాలా ఎగ్జైట్‌ అయ్యి సినిమాను చేసేందుకు గ్రీన్‌ సిగ్నల్‌ ఇవ్వడం చకచక జరిగి పోయాయి అంటూ ఫర్హాన్‌ ప్రకటించాడు.

ఆ సినిమా భారీ విజయాన్ని సొంతం చేసుకోవడంతో షారుఖ్ ఆసక్తితో డాన్‌ 2 ను కూడా చేసినట్లుగా దర్శకుడు ఫర్హాన్‌ పేర్కొన్నాడు. భవిష్యత్తులో డాన్‌ 3 ఉంటుందా అనే విషయమై దర్శకుడు స్పందిస్తూ తప్పకుండా ఉంటుంది అన్నట్లుగా చెప్పుకొచ్చాడు. అందుకు సంబంధించిన విషయాలు త్వరలోనే అందరికీ తెలుస్తాయని అన్నాడు. డాన్ 3 లో షారుఖ్ ఖాన్‌ కాకుండా రణ్వీర్ సింగ్‌ నటించే అవకాశాలు ఉన్నాయి.