విశ్వక్ గామి కోసం కల్కి డైరెక్టర్ వెయిటింగ్

టాలీవుడ్ మాస్ కా దాస్, యంగ్ హీరో విశ్వక్ సేన్ ప్రస్తుతం చేతి నిండా సినిమాలతో బిజీగా ఉన్నారు. గతేడాది దాస్ కా ధమ్కీ మూవీతో వచ్చి సూపర్ హిట్ కొట్టిన ఈ కుర్ర హీరో.. ఈ ఏడాది వరుస చిత్రాలతో సందడి చేయనున్నారు. నాలుగేళ్లుగా చిత్రీకరణ జరుపుకుంటున్న గామి మూవీ రిలీజ్ డేట్ ను మేకర్స్ తాజాగా ప్రకటించిన విషయం తెలిసిందే. శివరాత్రి కానుకగా మార్చి 8న సినిమా విడుదల చేయనున్నట్లు తెలిపారు.

ఇప్పటి వరకు స్టైలిష్, మాస్ రోల్స్ లో కనిపించిన విశ్వక్ సేన్.. గామి మూవీలో వైవిధ్యమైన పాత్రలో సందడి చేయనున్నారు. అఘోర శంకర్ గా కనిపించనున్నారు. ఇప్పటికే ఈ సినిమా నుంచి రిలీజైన పోస్టర్లు, మేకింగ్ వీడియో సినిమాపై మరింత క్యూరియాసిటీ పెంచేశాయి. మానవ స్పర్శను అనుభవించలేని అరుదైన వ్యాధితో బాధపడుతున్న ఓ అఘోర ప్రయాణమే ఈ చిత్రమని తెలుస్తోంది.

తాజాగా గామి మూవీ గురించి ఇన్ స్టాగ్రామ్ లో ఇంట్రెస్టింగ్ పోస్ట్ పెట్టారు దర్శకుడు నాగ్ అశ్విన్. ఈ సినిమా కోసం ఈగర్లీ వెయిట్ చేస్తున్నట్లు తెలిపారు. సినిమా పోస్టర్లు, కాన్సెప్ట్ చూసి ఆశ్చర్యపోయినట్లు చెప్పారు. "వావ్.. ఈ కుర్రాళ్లు ఏం సాధించారు! చాలా ఓపికగా.. చాలా ప్రేమగా.. ఇంక వెయిట్ చేయలేం.. #గామి మార్చి 8వ తేదీన థియేటర్లలోకి వస్తుంది" అంటూ చెప్పుకొచ్చారు. పాన్ ఇండియా స్టార్ ప్రభాస్ తో నాగ్ అశ్విన్ కల్కి సినిమా చేస్తున్న విషయం తెలిసిందే.

అడ్వెంచరస్ ఫాంటసీ ఫిల్మ్‌ గా వస్తున్న గామి మూవీని విద్యాధర్ డైరెక్షన్‌ లో కార్తీక్ శబరీష్ నిర్మిస్తున్నారు. ఈ మూవీలో చాందినీ చౌదరి హీరోయిన్ గా నటిస్తున్నారు. ఎంజీ అభినయ, మహ్మద్ సమద్, దయానంద్ రెడ్డి, హారిక కీలక పాత్రల్లో నటిస్తున్నారు. హిమాలయాలు, వారణాసి వంటి ప్రాంతాల్లో సినిమా షూట్ చేసినట్లు సమాచారం. కుంభమేళాలో కూడా షూటింగ్ చేశారు.

దర్శకుడు విద్యాధర్‌ గామి కోసం చాలా రీసెర్చ్‌ చేశారట. ప్రతి ఎలిమెంట్‌ ను లోతుగా అధ్యయనం చేసి రాసుకున్నారట. ఈ చిత్రం కోసం నాలుగేళ్లుగా పని చేస్తున్నామని ఇటీవలే విశ్వక్ చెప్పారు. అయితే గామి సినిమా షూటింగ్ దాదాపు పూర్తయినట్లు తెలుస్తోంది. పోస్ట్ ప్రొడక్షన్ పనులు కూడా ఇటీవలే షురూ అయ్యాయని సమాచారం. సినిమాకు సింగిల్ టేక్ లో 8 గంటల్లో డబ్బింగ్ పూర్తి చేశారట విశ్వక్. మరి ఈ సినిమా ఎలాంటి హిట్ కొడుతుందో చూడాలి.