విశ్వక్ గామి.. జాహ్నవి ఎవరు?

టాలీవుడ్ మాస్ కా దాస్ విశ్వక్ సేన్ ప్రస్తుతం చేతి నిండా సినిమాలతో బిజీబిజీగా ఉన్నారు. అందులో మోస్ట్ అవైటెడ్ మూవీ గామి ఒకటి. నాలుగేళ్లుగా చిత్రీకరణ జరుపుకుంటున్న ఈ సినిమా.. శివరాత్రి కానుకగా రిలీజ్ కానుంది. మానవ స్పర్శను అనుభవించలేని అరుదైన వ్యాధితో బాధపడే అఘోర పాత్రలో విశ్వక్‌ సేన్‌ నటిస్తున్న ఈ చిత్రం.. మార్చి 8వ తేదీన విడుదల కానుంది.

ఇప్పటికే ఈ సినిమా నుంచి విడుదలైన ప్రమోషనల్ కంటెంట్.. గామిపై మంచి హైప్ క్రియేట్ చేసింది. ఇటీవల రిలీజ్ అయిన క్యారెక్టర్ ఇంట్రడ్యూసింగ్ గ్లింప్స్.. బజ్ మరింత పెంచేసింది. ఈ అడ్వెంచర్ థ్రిల్లింగ్ డ్రామా థియేట్రికల్ ట్రైలర్ ను మరో వారంలో ఫిబ్రవరి 29న తేదీన రిలీజ్ చేస్తున్నట్లు మేకర్స్ ఇటీవల ప్రకటించిన విషయం తెలిసిందే. మూవీ రిలీజ్ డేట్ దగ్గరపడుతుండటంతో మేకర్స్.. ప్రమోషన్ల స్పీడ్ పెంచారు.

తాజాగా ఈ మూవీలో లీడ్ రోల్ లో నటిస్తున్న హీరోయిన్ చాందినీ చౌదరి ఫస్ట్ లుక్ ను మేకర్స్ గురువారం రిలీజ్ చేశారు. చాందిని కళ్లజోడు పెట్టుకుని పెక్యులర్‌ గా ఉన్న ఫస్ట్‌ లుక్‌ సినీ ప్రియులను ఎంతగానో ఆకట్టుకుంది. అయితే పోస్టర్ లో చాందిని వీధుల్లో నడుచుకుని వెళ్తున్నట్టు గా చూపించారు. చాందినిని జాహ్నవిగా పరిచయం చేశారు. విశ్వక్ తోపాటు ఆమె చేసిన సాహస యాత్ర సినిమాలో ఉన్నట్లు టీజర్ చూస్తే అర్థమవుతోంది.

ఈ సినిమాకు దర్శకత్వం వహించిన విద్యాధర్ చాలా కష్టపడ్డారు. కార్తీక్ కుల్ట్ క్రియేషన్స్ బ్యానర్ పై కార్తీక్ శబరీష్ నిర్మించారు. వి సెల్యులూయిడ్ సమర్పిస్తోంది. అయితే ఈ మూవీకి క్రౌడ్ ఫండింగ్ చేశారు. వారణాసి, కుంభమేళాలో షూటింగ్ నిర్వహించారు. హారిక పేడాడ, మహ్మద్ సమత్ తదితరులు కీలక పాత్రలు పోషించారు. నరేష్ కుమారన్ మ్యూజిక్ అందించారు. ప్రత్యూష్ వత్యం స్క్రీన్‌ప్లే బాధ్యతలను నిర్వర్తించారు.

అయితే ఇటీవల రిలీజైన గ్లింప్స్ లో గామి వరల్డ్ లోని క్యారెక్టర్లను పరిచయం చేశారు మేకర్స్. అందులో ఒక మ్యాప్‌ ను కూడా హైలైట్ చేశారు. దాని బట్టే కథ నడుస్తుందని అర్థం అవుతోంది. అఘోర అయిన హీరో విశ్వక్ సేన్ ఏం సాధించబోతున్నారనేది ఈ చిత్ర నేపథ్యమని తెలుస్తోంది. ఇప్పటికే టాలీవుడ్ లో విభిన్న ప్రయోగాలు చేసే విశ్వక్ సేన్.. అఘోర పాత్రలో ఎలా ఆకట్టుకుంటారో తెలియాలంటే మూవీ విడుదలయ్యే వరకు ఆగాల్సిందే.