మెగా అప్డేట్.. 'గేమ్ ఛేంజర్' టీజర్ ఎప్పుడంటే?

మెగా పవర్ స్టార్ రామ్ చరణ్ హీరోగా నటిస్తున్న లేటెస్ట్ మూవీ 'గేమ్ ఛేంజర్'. శంకర్ దర్శకత్వం వహిస్తున్న ఈ చిత్రాన్ని వచ్చే సంక్రాంతి కానుకగా ప్రేక్షకుల ముందుకు తీసుకురానున్నారు. అయితే ఈ సినిమా నుంచి ఇప్పటి వరకూ సరైన ప్రమోషనల్ కంటెంట్ బయటకు రాలేదని మెగా అభిమానులు నిరాశకు గురవుతున్నారు. టీజర్ రిలీజ్ చేస్తే ఆటోమేటిక్ గా బజ్ క్రియేట్ అవుతుందని నమ్మకంగా ఉన్నారు. వారి కోసం మేకర్స్ నుంచి ఓ గుడ్ న్యూస్ రాబోతోంది.

'గేమ్ ఛేంజర్' మూవీ టీజర్‌ను దీపావళికి విడుదల చేస్తారని టాక్ వచ్చింది. కానీ టీమ్ నుండి అధికారిక ప్రకటన లేదు. మ్యూజిక్ డైరెక్టర్ ఎస్. థమన్ త్వరలో అప్‌డేట్‌లు రాబోతున్నాయని చెప్పారు కానీ, ఎప్పుడనేది చెప్పలేదు. 'వాట్ ఎ లైన్ అప్' అంటూ రామ్ చరణ్ తో దిగిన ఓ ఫోటోని మాత్రం ఎక్స్ లో పోస్ట్ చేశారు. టీజర్ ను ఎప్పుడు విడుదల చేస్తారనేది వెల్లడించలేదు. ఇన్సైడ్ టాక్ ప్రకారం, దీపావళి రోజున టీజర్ కు సంబంధించిన ప్రకటన వస్తుందని తెలుస్తోంది.

'గేమ్ ఛేంజర్' టీజర్ ను నవంబర్ 4న టీజర్ ను లాంఛ్ చేస్తారని టాక్ వినిపిస్తోంది. దీని కోసం గ్రాండ్ గా ఈవెంట్ నిర్వహించబోతున్నారని సమాచారం. ఇకపోతే శంకర్ అండ్ టీమ్ ఈ మూవీ కోసం నాలుగు టీజర్‌లను కట్ చేశారట. అందుకో ఒకటి ఫైనలైజ్ చేశారని, థమన్ బ్యాగ్రౌండ్ స్కోర్ నెక్స్ట్ లెవల్ లో ఉంటుందని సోషల్ మీడియాలో వార్తలు వస్తున్నాయి. ఇప్పటికే జరగండి, రా మచ్చా పాటల్ని విడుదల చేయగా.. రాబోయే రెండు నెలల్లో మిగిలిన నాలుగు సాంగ్స్ ను కూడా రిలీజ్ చేయనున్నారు.

'గేమ్ ఛేంజర్' అనేది శంకర్ మార్క్ పొలిటికల్ యాక్షన్ మూవీ. ఇందులో తండ్రీకొడుకులుగా రామ్ చరణ్ రెండు పాత్రల్లో కనిపించనున్నారు. కియారా అద్వానీ, అంజలి హీరోయిన్లుగా నటించారు. ఎస్.జె. సూర్య, సముద్రఖని, శ్రీకాంత్, సునీల్ ఇతర ప్రధాన పాత్రలు పోషించారు. శ్రీ వెంకటేశ్వర క్రియేషన్స్ బ్యానర్ లో దిల్ రాజు భారీ బడ్జెట్ తో ఈ సినిమాని నిర్మిస్తున్నారు. పోస్ట్ ప్రొడక్షన్ పనులు జరుపుకుంటున్న ఈ చిత్రం 2025 జనవరి 10న వరల్డ్ వైడ్ గా గ్రాండ్ గా రిలీజ్ కాబోతోంది.

RRR సినిమాతో గ్లోబల్ స్టార్ డమ్ సంపాదించుకున్న రామ్ చరణ్.. 'గేమ్ ఛేంజర్' తో బ్లాక్ బస్టర్ హిట్టు కొట్టి సక్సెస్ ట్రాక్ ను కొనసాగించాలని ఫ్యాన్స్ కోరుకుంటున్నారు. దీని తర్వాత బుచ్చిబాబు సానా దర్శకత్వంలో చ‌ర‌ణ్ ఓ పాన్ ఇండియా సినిమా చేయనున్నారు. ఇది ఉత్తరాంధ్ర బ్యాక్ డ్రాప్ లో రూపొందే రా అండ్ ర‌స్టిక్ ఎమోషనల్ స్పోర్ట్స్‌ డ్రామా అని టాక్. ఇందులో చెర్రీ కొత్త లుక్ లో కనిపించనున్నారు. 'RC 16' అనే వర్కింగ్ టైటిల్ తో అనౌన్స్ చేయబడిన ఈ చిత్రం, త్వరలోనే సెట్స్ మీదకు వెళ్లనుంది.