ఎట్ట‌కేల‌కు 'గేమ్ ఛేంజ‌ర్' బిగ్ అప్‌డేట్

గ్లోబల్ స్టార్ రామ్ చరణ్ - ప్రముఖ దర్శకుడు శంకర్ షణ్ముగం 'గేమ్ ఛేంజర్' కోసం జతకట్టారు. ఇది పొలిటికల్ డ్రామా. దిల్ రాజు- శిరీష్ సంయుక్తంగా నిర్మిస్తున్నారు. సంక్రాంతి కానుక‌గా 10 జనవరి 2025న బ‌హు భాషల్లో ఈ చిత్రం గ్రాండ్ రిలీజ్ కాబోతోంది. కియారా అద్వానీ కథానాయికగా న‌టించిన ఈ చిత్రంలో భారీ తారాగ‌ణం న‌టించారు.

తాజాగా దీపావ‌ళి కానుక కోసం వేచి చూస్తున్న మెగా ఫ్యాన్స్ కి అద్భుత‌మైన వార్త‌ను అందించింది శంక‌ర్ టీమ్. గేమ్ ఛేంజర్ టీజర్ నవంబర్ 9న విడుదల కానుంద‌ని ప్ర‌క‌టించారు. ఈ సినిమా నుంచి మాస్ పోస్ట‌ర్ ని రిలీజ్ చేసి టీజ‌ర్ డేట్ ని దానిలో రివీల్ చేసారు. రైల్వే ట్రాక్ పై ఆరుగురిని ప‌డుకోబెట్టి ఒక చెక్క‌పై కూచుని చ‌ర‌ణ్ తీక్ష‌ణంగా వారి వైపు చూస్తున్నాడు. అతడు గ‌ళ్ల పంచె, బ‌నియ‌న్ ధ‌రించి మాసీగా క‌నిపిస్తున్నాడు. రైలు వ‌చ్చే ముందు ఆ ఆరుగురి ప‌రిస్థితిని ఊహించ‌వ‌చ్చు. ఈ స‌న్నివేశంతోనే అత‌డు గూస్ బంప్స్ తెప్పించ‌డం ఖాయంగా క‌నిపిస్తోంది. అయితే టీజ‌ర్ లో దీనిని చూపిస్తారా లేదా? సంద‌ర్భం ఏమిట‌న్న‌ది వేచి చూడాలి.

ఐఏఎస్ ట‌ర్న్ డ్ ముఖ్య‌మంత్రిగా రామ్ చ‌ర‌ణ్ ఈ చిత్రంలో న‌టిస్తున్నాడ‌ని ఇప్ప‌టికే క‌థ‌నాలొచ్చాయి. ఇందులో SJ సూర్య ప్ర‌ధాన విల‌న్ గా న‌టిస్తున్నారు. శ్రీకాంత్, అంజలి, సముద్రఖని, నవీన్ చంద్ర కీల‌క పాత్ర‌ధారులు. థమన్ ఈ ప్రాజెక్ట్‌కి సంగీతం అందించారు. సంక్రాంతి పందెంలో క్రేజ్ ఉన్న చిత్రంగా వ‌స్తోంది. చ‌ర‌ణ్ పాన్ ఇండియా ఆశ‌లు ఫ‌లిస్తాయా లేదా? ఆర్.ఆర్.ఆర్ త‌ర్వాత శంక‌ర్ ని ఎంపిక చేయ‌డం అనే అత‌డి ఎత్తుగ‌డ స‌రైన‌దేనా కాదా? అన్న‌దానికి కాల‌మే స‌మాధానం చెప్పాలి.