ట్రెండీ టాక్‌: గౌత‌మ్ మీనన్ స్ట్రైక్స్ ఎగైన్?
క్లాసిక్ చిత్రాల ద‌ర్శ‌కుడిగా గౌత‌మ్ మీనన్ కి ఉన్న ఇమేజ్ అద్భుత‌మైన‌ది. కానీ అతడు ఇటీవ‌ల రేసులో వెన‌క‌బ‌డిన సంగ‌తి తెలిసిందే.
By: Tupaki Desk | 24 Sep 2023 8:30 AM GMT
క్లాసిక్ చిత్రాల ద‌ర్శ‌కుడిగా గౌత‌మ్ మీనన్ కి ఉన్న ఇమేజ్ అద్భుత‌మైన‌ది. కానీ అతడు ఇటీవ‌ల రేసులో వెన‌క‌బ‌డిన సంగ‌తి తెలిసిందే. బ‌హుభాషా చిత్రాల పేరుతో అతడు భారీ సెటప్ తో సినిమాల్ని ప్రారంభించినా అవ‌న్నీ మిడిల్ డ్రాప్ అవ్వ‌డం అభిమానుల‌ను నిరాశ‌ప‌రుస్తోంది. కొన్నేళ్ల క్రిత‌మే చియాన్ విక్రమ్ క‌థానాయ‌కుడిగా ధృవ‌న‌క్ష‌త్రం లాంటి భారీ చిత్రాన్ని ప్రారంభించారు గౌత‌మ్ మీనన్. ఈ సినిమా పూర్తి కావ‌డం ఆలస్యమైంది. రిలీజ్ మ‌రింత ఆలస్యమైంది. దీంతో ఫ్యాన్స్ నిరాశ‌లో కూరుకుపోయారు.
ఎట్ట‌కేల‌కు గత కొంత కాలంగా విడుదలకు పెండింగ్‌లో ఉన్న `ధృవ నచ్చతిరమ్` ఇప్పుడు నవంబర్ 24న థియేటర్లలో విడుదల కానుంది. ఆ మేర‌కు చిత్ర నిర్మాతలు అధికారికంగా రిలీజ్ డేట్ ని ప్రకటించారు. ఈ సినిమా ట్రైల‌ర్ ఇప్ప‌టికే రిలీజై ఆక‌ట్టుకుంది. విక్రమ్ జాన్ అనే కాప్ పాత్ర‌లో న‌టించారు. కొన్ని యాక్షన్ సన్నివేశాలు ఆస‌క్తిని క‌లిగిస్తున్నాయి. విడుదల తేదీని ప్రకటించే చిన్న వీడియోను కూడా మేకర్స్ విడుదల చేయ‌గా ఇందులో చియాన్ ఎంతో స్టైలిష్ గా క‌నిపించారు. యుఎ సర్టిఫికేట్‌తో ఈ చిత్రం సెన్సార్ ఫార్మాలిటీస్‌ను పూర్తి చేసుకుంది.
2016లో ధృవ నచ్చతిరమ్ నిర్మాణం మొద‌లైంది. నిర్మాణ ఇబ్బందుల‌తో సినిమా విడుదల చాలా సార్లు వాయిదా ప‌డింది. ఎట్ట‌కేల‌కు లైన్ క్లియ‌రైంది. ధృవ నచ్చతిరమ్‌లో రీతూ వర్మ, పార్తిబన్, సిమ్రాన్, రాధిక శరత్‌కుమార్ త‌దిత‌రులు న‌టిస్తున్నారు. ఈ చిత్రానికి ఒండ్రాగా ఎంటర్‌టైన్‌మెంట్ - ఒరు ఊరిలే ఒరు ఫిల్మ్ హౌస్‌లు నిర్మిస్తున్నాయి. మనోజ్ పరమహంస, జోమోన్ టి జాన్, సంతాన కృష్ణన్, రవిచంద్రన్ సినిమాటోగ్రఫీ అందించగా, ఎడిటింగ్: ప్రవీణ్ ఆంటోని చేసారు. ఈ చిత్రానికి హారిస్ జయరాజ్ సంగీతం అందించారు.
