బిగ్ ఫ్లాప్ హీరో 10 వేల కోట్ల కంపెనీ అధినేత‌?

చాలామంది న‌ట‌వార‌సులు వెండితెర‌కు ప‌రిచ‌యమ‌వుతున్నారు. కానీ వారిలో స‌క్సెస‌య్యేవారు చాలా అరుదు. ఇటీవ‌లి కాలంలో న‌ట‌వార‌సుల స‌క్సెస్ శాతం చాలా కిందికి ప‌డిపోయింది. ఇక ఇండ‌స్ట్రీలో టి సిరీస్ లాంటి బ్రాండ్ ఇమేజ్ ఉన్న ఫ్యామిలీ నుంచి వ‌చ్చిన ఒక డెబ్యూ న‌టుడు అనూహ్యంగా ఆరంభంలోనే న‌ట‌న‌ను వ‌దిలేసి వ్యాపారాల్లోకి వెళ్లాల్సి వ‌చ్చింది. కేవ‌లం 2 సినిమాలకే ఇండ‌స్ట్రీని వ‌దిలేసి రూ.10,000 కోట్ల కంపెనీని నడుపుతున్న ఈ ఫ్లాప్ హీరో గురించి వివ‌రాల్లోకి వెళితే ఆస‌క్తిక‌ర విష‌యాలెన్నో.

టిప్స్ ఇండస్ట్రీస్ యజమాని, నిర్మాత కుమార్ తౌరాని కుమారుడు గిరీష్ కుమార్ తౌరాని బాలీవుడ్‌లో బంధుప్రీతి వైఫల్యానికి మరొక పెద్ద‌ ఉదాహరణ. అత‌డు 2013లో విడుదలైన `రామయ్య వస్తావయ్యా`లో క‌థానాయ‌కుడిగా ఆరంగేట్రం చేసాడు. శ్రుతి హాసన్ ఈ చిత్రంలో క‌థానాయిక‌గా న‌టించింది. ప్రభుదేవా దర్శకత్వం వహించిన ఈ చిత్రం బాక్సాఫీస్ వద్ద ఒక మోస్తరుగా ఆడింది. ఈ చిత్రం రూ.50 కోట్ల వ‌ర‌కూ వసూళ్లు సాధించింది. ఆ తర్వాత మూడు సంవత్సరాలకు గిరీష్ కుమార్ తౌరాని తన రెండవ చిత్రంలో న‌టించాడు. ఈ సినిమాని కూడా త‌న తండ్రి కుమార్ తౌరాని నిర్మించారు. గిరీష్ రెండవ చిత్రం `లవుష్‌డా` 2016లో విడుదలైంది. కానీ అది జాడ లేకుండా మునిగిపోయింది. `లవుష్‌డా` బాక్సాఫీస్ వద్ద ఘోర పరాజయం పాలైంది. దీంతో అత‌డి నట జీవితానికి ముగింపు కార్డ్ ప‌డింది.

అయితే ఇండ‌స్ట్రీలో వైఫ‌ల్యం త‌ర్వాతే అస‌లు క‌థ మొద‌లైంది. గిరీష్ ప్రస్తుతం టిప్స్ ఇండస్ట్రీస్ చీఫ్ ఆపరేటింగ్ ఆఫీసర్ (సీవోవో)గా సేవ‌లందిస్తున్నారు. భారతదేశంలో అతిపెద్ద చిత్ర నిర్మాణ, పంపిణీ సంస్థ‌, సంగీత సంస్థలలో ఒకదానికి వారసుడిగా ఉన్నాడు. పొన్నియిన్ సెల్వన్ సిరీస్, శ్రీరామ్ రాఘవన్ థ్రిల్లర్ `మెర్రీ క్రిస్మస్` వంటి చిత్రాల పంపిణీని నిర్వ‌హించాడు. గిరీష్ ఇప్పుడు కెమెరా వెనుక నుండి పనిచేస్తున్నాడు. డిసెంబర్ 2024 నాటికి టిప్స్ మార్కెట్ క్యాపిటలైజేషన్ రూ. 10,517 కోట్లుగా ఉంది. అంత పెద్ద సంస్థ‌ను స‌వ్యంగా న‌డిపించే బాధ్య‌త‌ను గిరీష్ తీసుకున్నాడు.

రహస్యంగా వివాహం:

త‌న కెరీర్ రెండో చిత్రం లవ్‌షుడా(2016) విడుదల సమయంలో, గిరీష్ తన చిన్ననాటి ప్రియురాలు, ప్ర‌స్తుత‌ భార్య కృష్ణను వివాహం చేసుకున్నాడు. అయితే గిరీష్ ఏడాది పాటు వివాహాన్ని రహస్యంగా ఉంచాడు. 2017లో ఇన్‌స్టాగ్రామ్ పోస్ట్‌లో మాత్రమే దానిని వెల్లడించాడు. వివాహితుడు అనే ట్యాగ్ రొమాంటిక్ హీరోగా తన అవకాశాలను ప్రభావితం చేస్తుందని భావించి తన కెరీర్‌ను కాపాడుకోవడానికి తాను ఇలా చేశానని గిరీష్ పేర్కొన్న‌ట్టు ప్ర‌ముఖ మీడియా క‌థ‌నం ప్ర‌చురించింది.