సైలెంట్ కిల్ల‌ర్‌లా టాలీవుడ్‌లో క‌న్నడ బ్యూటీ

ఇటీవ‌లి కాలంలో నిధి అగ‌ర్వాల్, ర‌ష్మిక మంద‌న్న, న‌భా న‌టేష్‌, కృతి శెట్టి లాంటి క‌న్న‌డ‌ భామ‌లు తెలుగు సినీప‌రిశ్ర‌మ‌లో వ‌రుస‌గా అవ‌కాశాలు అందుకుంటున్న సంగ‌తి తెలిసిందే. మ‌ల‌యాళీ భామ‌ల‌తో పోటీప‌డుతూ క‌న్న‌డం నుంచి క‌థానాయిక‌ల హ‌వా టాలీవుడ్ లో పెరిగింద‌న‌డానికి ఇది సూచిక‌. ఇప్పుడు మ‌రో క‌న్న‌డ బ్యూటీ టాలీవుడ్‌లో ఆరంగేట్రంతోనే వేవ్స్ క్రియేట్ చేస్తోంది. సైలెంట్ కిల్ల‌ర్ లా దూసుకొస్తున్న‌ ఈ బ్యూటీ పేరు రుక్మిణి వ‌సంత్.

2023లో కన్నడ దర్శకుడు హేమంత్ రావ్ తెర‌కెక్కించిన 'సప్త సాగరదాచే ఎల్లో (SSE)- సైడ్ A అండ్ SSE సైడ్ B చిత్రాలలో రుక్మిణి తన చక్కటి నటనతో ప్రేక్షకులను ఆశ్చర్యపరిచింది. ఆ త‌ర్వాత కేజీఎఫ్‌ ప్ర‌శాంత్ నీల్ క‌థ అందించిన భ‌గీర‌లోను న‌టించింది. ఈ చిత్రం ఇటీవ‌లే విడుద‌లైంది. న‌టిగా రుక్మిణికి మంచి మార్కులు ప‌డ్డాయి. అదే క్ర‌మంలో రుక్మిణి వసంత్‌కి టాలీవుడ్ లో విజయ్ దేవరకొండ సహా ప‌లువురి సినిమాల్లో ఆఫర్లు వచ్చాయి. అయితే ఇంత‌లోనే రామ్ పోతినేని స‌ర‌స‌న న‌టించేందుకు ఓకే చెప్పింద‌ని క‌థ‌నాలొచ్చాయి. రుక్మిణి వసంత్‌ను పలువురు చిత్రనిర్మాతలు సంప్రదించారని, వాస్తవానికి దాదాపు డజను స్క్రిప్ట్‌లు విన్నా కానీ దేనికీ సంతకం చేయడానికి పెద్దగా ఆసక్తి చూపలేదని తెలిసింది. కానీ చివ‌రికి రామ్ పోతినేనితో కలిసి ఒక చిత్రానికి సంతకం చేసిందని సమాచారం. రవికిరణ్ కోలాతో కలిసి విజయ్ దేవరకొండ చిత్రంలో ఆమె నటిస్తుందని పుకార్లు వచ్చాయి.. కానీ ఆమె దానిని తిరస్కరించింద‌ని కూడా క‌థ‌నాలొచ్చాయి.

తమిళంలో టాప్ స్టార్స్ విజయ్ సేతుపతి, శివకార్తికేయన్‌లతో సినిమాలకు సంత‌కాలు చేసింది. శివ రాజ్‌కుమార్ భైరతి రణగల్, భగీరా సహా ప‌లు కన్నడ చిత్రాలలోను రుక్మిణి న‌టిస్తోంది. సేతుప‌తి సినిమా త్వ‌ర‌లో విడుద‌ల‌కు రానుంది. ఇందులో త‌న షూటింగ్‌ను రుక్మిణి ముగించింది. శివకార్తికేయన్‌తో దర్శకుడు ఏఆర్‌ మురుగదాస్‌ తెరకెక్కిస్తున్న చిత్రం ప్రస్తుతం సెట్స్‌పై ఉంది. శివ‌రాజ్ కుమార్ భైర‌తి ర‌ణ‌గ‌ల్ అనే చిత్రంలోను రుక్మిణి క‌థానాయిక‌. ఈ సినిమా ట్రైల‌ర్ ఇటీవ‌లే విడుద‌లై ఆక‌ట్టుకుంది.

రుక్మిణి వ్య‌క్తిగ‌త విష‌యాలు ప‌రిశీలిస్తే ఆస‌క్తిక‌రం. అశోక చక్ర గ్రహీత కల్నల్ వసంత్ వేణుగోపాల్ కుమార్తె ఈ ప్ర‌తిభావ‌ని. లండన్‌లోని రాయల్ అకాడమీ ఆఫ్ డ్రామాటిక్ ఆర్ట్స్ నుండి నటన నుండి పట్టభద్రురాలైంది.