ఖుషిలో మణిరత్నం విజువల్స్..!

విజయ్ దేవరకొండ సమంత ప్రధాన పాత్రలుగా శివ నిర్వాణ దర్శకత్వంలో తెరకెక్కిన సినిమా ఖుషి. మైత్రి మూవీ మేకర్స్ నిర్మించిన ఈ సినిమాకు మలయాళ మ్యూజిక్ డైరెక్టర్ హెషం అబ్దుల్ వాహబ్ సంగీతం అందించారు. సెప్టెంబర్ 1న పాన్ ఇండియా రిలీజ్ అవుతున్న ఈ సినిమా సెన్సార్ నుంచి U/A సర్టిఫికెట్ అందుకుంది. ఈ సినిమాకు సినిమాటోగ్రాఫర్ గా జి మురళి పనిచేశారు. ఖుషి టీజర్, ట్రైలర్స్ లో విజువల్స్ చాలా ప్రత్యేకంగా అనిపించాయి.

ఈ క్రమంలో ఖుషి సినిమాటోగ్రాఫర్ కూడా తన సినిమా ఎక్స్ పీరియన్స్ మీడియాతో పంచుకున్నారు. పుట్టి పెరిగిందంతా చెన్నైలోనే చదువు తర్వాత పెయింటింగ్, సోషల్ ఇష్యూస్, పాలిటిక్స్ మీద తనకు ఇంట్రెస్ట్ ఉండేదని అన్నారు జి మురళి. స్టూడెంట్ గా ఉన్నప్పుడే కమ్యూనిస్టు ఆర్గనైజేషన్స్ లో పని చేశానని చెప్పారు. కొన్నాళ్లకు సినిమా ఇండస్ట్రీ వైపు రావాలని ఇంట్రెస్ట్ కలిగిందని అందుకే 2005 లో ఇండస్ట్రీకి వచ్చానని అన్నారు జి మురళి. అందాల రాక్షసి సినిమాకు సినిమాటోగ్రఫీ అందించిన మురళి ఆ తర్వాత తను చేసిన లవ్ ఫ్యామిలీ సినిమా ఖుషినే అంటున్నారు. ఈ సినిమాలోకి మైత్రి రవి గారి ద్వారా వచ్చానని చెప్పిన ఆయన సినిమాకు నిర్మాతలు బ్యాక్ బోన్ గా నిలిచారని అన్నారు.

సినిమాల మీద వారికి ఉన్నంత ప్యాషన్ మరే ప్రొడ్యూసర్ లో తాను చూడలేదని అన్నారు. సినిమా బాగా వచ్చేందుకు ఏది కావాలన్నా సరే అది సమాకూర్చుతారని చెప్పారు. శివ గారు కథ చెప్పగానే ఆయన ప్రీవియస్ మూవీస్ గురించి తెలుసుకున్నా అలాంటి మంచి అభిరుచి గల దర్శకుడితో కలిసి పనిచేసే అవకాశం రావడం సంతోషంగా అనిపించిందని అన్నారు జి మురళి.

ప్రేమ గురించి కలలు కంటున్న యువకుడి లైఫ్ లో లవ్, ఆఫ్టర్ మ్యారేజ్ లైఫ్ ఇలా మన ఊహలకు అనుగుణంగా ఉండదనే తెలిసి వచ్చేలా చేయడమే ఈ సినిమా నేపథ్యమని మురళి అన్నారు. మణిరత్నం సినిమాల్లో సినిమాటోగ్రాఫర్ గా పీసీ శ్రీరామ్ చూపించే విజువల్ బ్యూటీ శివ నిర్వాణ దర్శకత్వంలో తన విజువల్స్ చూస్తారని అన్నారు. అలా అని తామేమి కాపీ కొట్టలేదని అలా ఫీల్ కలిగించేలా విజువల్స్ ఉంటాయని అన్నారు మురళి.

డైరెక్టర్ శివ నిర్వాణ వ్యక్తిగతంగా చాలా మంచివాడు. సినిమా మేకింగ్ మీద ఆసక్తి కలిగిన వ్యక్తి. తను చేసే సినిమాకు సంబంధించిన ప్రతి విషయంలో జాగ్రత్త పడతాడు. ఎప్పుడూ సినిమా గురించే ఆలోచిస్తాడని అన్నారు జి మురళి. డైరెక్టర్ కి ఉన్న మ్యూజిక్ సెన్స్ సినిమాకు చాలా ప్లస్ అవుతుందని అన్నారు. ఖుషి మ్యూజిక్ ఇంత పెద్ద హిట్ అవడానికి కారణం డైరెక్టర్ శివనే అన్నారు మురళి.

తను చేసిన సినిమాల్లో కాలా, సర్పట్టా రా అండ్ రస్టిక్ గా ఉంటాయి. ఖుషి మాత్రం ఒక బ్యూటిఫుల్ విజువల్స్ తో ఫీల్ గుడ్ అనిపిస్తుంది. సినిమా తప్పకుండా ప్రేక్షకులకు ఒక కొత్త అనుభూతి కలిగిస్తుందని అన్నారు. కెమెరా ద్వారా కూడా ఎమోషన్ తీసుకొచ్చే ప్రయత్నం తాను చేశానని చెప్పారు జి మురళి. మణిరత్నం సినిమాల్లాంటి విజువల్ బ్యూటీ తో ఖుషి మంచి ఎంటర్టైనర్ గా వస్తుందని అన్నారు. లైఫ్ లో ఊహించుకోవడం కంటే వాస్తవిక జీవితంలో ఉండటానికి ఇష్టపడటం తనకు అలవాటు. సినిమాటోగ్రఫీ చేసే సినిమాలు కూడా అలానే రియల్ లైఫ్ కు దగ్గరగా ఉండేలా చూసుకుంటానని చెప్పారు కెమెరా మెన్ జి మురళి.