'దసరా' మిస్‌ చేసుకున్న స్టార్‌ ఎవరో తెలుసా..!

నాని హీరోగా శ్రీకాంత్‌ ఓదెల దర్శకత్వంలో రూపొంది ప్రేక్షకుల ముందుకు వచ్చిన 'దసరా' సినిమాకు మంచి స్పందన దక్కింది. పాన్ ఇండియా రేంజ్‌లో విడుదలైన దసరా సినిమా ఇతర భాషల్లో మెప్పించలేక పోయిన తెలుగులో మాత్రం భారీ వసూళ్లు సాధించడం ద్వారా నాని కెరీర్‌లో పెద్ద సినిమాల జాబితాలో చేరింది. దసరా సినిమాలో నాని పాత్రకు స్నేహితుడి పాత్రలో నటించి మెప్పించిన నటుడు దీక్షిత్‌ శెట్టి. తెలుగులో పెద్దగా గుర్తింపు లేనప్పటికీ దీక్షిత్‌ నటనకు మంచి మార్కులు పడ్డాయి. ఆ పాత్ర కోసం మొదట దీక్షిత్‌ ను కాకుండా మరో స్టార్‌ ని సంప్రదించడం జరిగిందట.

పూర్తి వివరాల్లోకి వెళ్తే... దసరా సినిమా కథను నాని ఓకే చేసిన వెంటనే స్నేహితుడి పాత్రకు గాను పలువురు నటుల పేర్లను పరిశీలించిన దర్శకుడు శ్రీకాంత్‌ ఓదెల చివరకు తమిళ సంగీత దర్శకుడు కమ్‌ హీరో అయిన జీవి ప్రకాష్ ను సంప్రదించడం జరిగిందట. కథ నచ్చినా బిజీ షెడ్యూల్‌ కారణంగా సినిమాను చేయలేను అంటూ చెప్పాడట. దాంతో ఆ పాత్రకు దీక్షిత్ శెట్టిని సినిమాలో నటింపజేయడం జరిగిందట. ఈ విషయాన్ని స్వయంగా సంగీత దర్శకుడు జీవి ప్రకాష్‌ ఒక ఇంటర్వ్యూలో చెప్పుకొచ్చాడు. ప్రస్తుతం సోషల్‌ మీడియాలో ఇందుకు సంబంధించిన వీడియో తెగ చక్కర్లు కొడుతోంది.

నానితో దసరా వంటి ఒక మంచి సినిమాలో నటించే అవకాశం దక్కినా బిజీ షెడ్యూల్‌ వల్ల నటించలేక పోయాను, మళ్లీ తెలుగులో అలాంటి ఆఫర్ వస్తే తప్పకుండా నటించేందుకు తాను సిద్ధంగా ఉన్నాను అన్నారు. ప్రస్తుతం నానితో దర్శకుడు శ్రీకాంత్‌ ఓదెల పారడైజ్ అనే సినిమాను చేస్తున్న విషయం తెల్సిందే. ఆ సినిమా కోసం జీవి ప్రకాష్ ను సంప్రదించాలని కొందరు అభిప్రాయం వ్యక్తం చేస్తున్నారు. కానీ పారడైజ్‌ లో జీవి ప్రకాష్ కి సెట్‌ అయ్యే పాత్ర ఉందా... ఒకవేళ ఉన్నా దసరా కు నో చెప్పిన శ్రీకాంత్‌ ఓదెల ఆయన్ను సంప్రదించేనా అనేది చూడాలి.

రహమాన్‌ మేనల్లుడిగా ఇండస్ట్రీలో అడుగు పెట్టిన జీవి ప్రకాష్‌ తక్కువ సమయంలోనే తనకంటూ ప్రత్యేక బ్రాండ్‌ ఇమేజ్ ను సొంతం చేసుకోవడం జరిగింది. కోలీవుడ్‌ తో పాటు టాలీవుడ్‌లోనూ పలు సినిమాలకు జీవి ప్రకాష్ సంగీతాన్ని అందించి విమర్శకుల ప్రశంసలు దక్కించుకోవడంతో పాటు కమర్షియల్‌ హిట్స్ ను సొంతం చేసుకోవడం జరిగింది. సుదీర్ఘ కాలంగా సంగీత దర్శకుడిగా కొనసాగుతున్న జీవి ప్రకాష్ హీరోగానూ సినిమాల్లో నటిస్తూ మెప్పిస్తూ ఉన్నారు. నటుడిగా టాలీవుడ్‌లో ఇప్పటి వరకు మంచి గుర్తింపు దక్కలేదు. కానీ దసరా వంటి సినిమాలో నటించి ఉంటే తప్పకుండా మంచి ఇమేజ్ దక్కేది అనే అభిప్రాయం వ్యక్తం అవుతోంది. నిజంగానే దసరా ను మిస్‌ చేసుకోవడం జీవి ప్రకాష్ కెరీర్‌లో బిగ్‌ మిస్టేక్‌ అనే అభిప్రాయం వ్యక్తం అవుతోంది.