గాంధారిగా ఝ‌డిపించ‌బోతున్న హ‌న్సిక‌

హార‌ర్ జాన‌ర్ ఎప్పుడూ మినిమం గ్యారెంటీ. హన్సిక ఇప్పుడు మ‌రోసారి హార‌ర్ సినిమాలో నటించింది. శ్రీ గాంధారి అనేది టైటిల్. మసాలా పిక్స్ బ్యానర్‌పై ఆర్ కన్నన్ దర్శకత్వం వహిస్తూ నిర్మించారు. ఇక ఈ చిత్రాన్ని సరస్వతి డెవలపర్స్‌తో కలిసి లచ్చురం ప్రొడక్షన్స్ బ్యానర్ మీద రాజు నాయక్ తెలుగులో రిలీజ్ చేస్తున్నారు. వీకేఆర్ (విక్రమ్ కుమార్ రెజింతల) సమర్పిస్తున్నారు.

ఈ చిత్రంలో హిందూ ట్రస్ట్ కమిటీ హెడ్ పాత్ర‌లో హన్సిక నటించారు. గంధర్వ కోట పురాతన స్మారకానికి సంబంధించిన పరిశోధన ప్రాజెక్ట్‌ను చేపట్టడంతో అసలు కథ మొదలవుతుంది. ఒక రాజు నిర్మించిన శతాబ్దాల నాటి ఈ కోటలో ఎన్నో రహస్యాలుంటాయి. ఆ రహస్యాల్ని ఎలా బయటకు తీసుకు వచ్చారు? అన్నది కథ. శ్రీ గాంధారి కథను తొల్కప్పియన్, స్క్రీన్ ప్లేని ధనంజయన్ అందించారు. ఈ సినిమాకు సినిమాటోగ్రాఫర్‌గా బాల సుబ్రమణియన్, మ్యూజిక్ కంపోజర్‌గా ఎల్వీ గణేష్ ముత్తు, ఎడిటర్‌గా జిజింత్ర, సిల్వా స్టంట్ డైరెక్టర్‌గా పని చేశారు. మిస్టరీ, సస్పెన్స్, హారర్, థ్రిల్లర్‌గా తెరకెక్కిన ‘శ్రీ గాంధారి’ చిత్రాన్ని డిసెంబర్‌లో గ్రాండ్‌గా విడుదల చేసేందుకు రాజు నాయక్ సన్నాహాలు చేస్తున్నారు.

పెళ్లి త‌ర్వాత జీవితం..

హ‌న్సిక త‌న స్నేహితుడిని పెళ్లాడిన సంగ‌తి తెలిసిందే. దుబాయ్ కి చెందిన బిజినెస్‌మేన్ సోహెల్ ఖ‌తురియాతో అనుబంధం ప్రేమాయ‌ణం గురించి హ‌న్సిక ఓ డాక్యు సిరీస్ లో వెల్ల‌డించింది. త‌న‌పై ఎన్నో పుకార్లు ఉన్నా.. వాట‌న్నిటికీ స‌మాధాన‌మిచ్చే ప్ర‌య‌త్నం చేసింది హ‌న్సిక‌. అదంతా అటుంచితే స్నేహితుడు ఖ‌తురియాతో వివాహంలో అన్నిర‌కాలుగా సంసార స‌రిగ‌మ‌ల్ని ఆస్వాధిస్తోంది. పెళ్లి అనంత‌రం 10 ఆగ‌స్ట్ 2023న హన్సిక మోత్వానీ తన 32వ పుట్టినరోజును తన భర్త సోహెల్ ఖతురియాతో కలిసి టర్కీలోని అద్భుతమైన ప్రకృతి దృశ్యాల న‌డుమ‌ విలాసవంతమైన క్రూయిజ్ షిప్‌లో జ‌రుపుకున్న ఫోటోలు వైర‌ల్ అయ్యాయి.

హన్సిక మోత్వాని చివ‌రిగా సందీప్ కిషన్ స‌ర‌స‌న `తెనాలి రామకృష్ణ BA` అనే తెలుగు చిత్రంలో న‌టించింది. ఆ సినిమా ఆశించిన విజ‌యాన్ని ద‌క్కించుకోలేదు. అంత‌కుముందు మంచు కాంపౌండ్ నాయిక‌గాను ఆశించిన విజ‌యాల్ని అందుకోవ‌డంలో త‌డ‌బ‌డింది. త‌దుప‌రి త‌మిళంలో వ‌రుస చిత్రాల‌తో బిజీ అయింది. ఇంత‌లోనే సోహెల్ ని పెళ్లాడి లైఫ్ లో సెటిలైంది.