'హనుమాన్‌' కాన్సెప్ట్‌తో మరోటి..!

తేజ సజ్జా హీరోగా ప్రశాంత్ వర్మ దర్శకత్వంలో రూపొంది సంక్రాంతి కానుకగా ప్రేక్షకుల ముందుకు వచ్చిన హనుమాన్‌ సినిమా హిట్ టాక్ దక్కించుకుని ఇప్పటికే వంద కోట్ల వసూళ్లు క్రాస్ చేసింది. ముందు ముందు మరింత భారీ వసూళ్లను ఈ సినిమా దక్కించుకునే అవకాశాలు ఉన్నాయని బాక్సాఫీస్ వర్గాల వారు అంటున్నారు.

హనుమాన్ కాన్సెప్ట్‌ తో సినిమా అంటే హిట్ ఖాయం అన్నట్లుగా ఈ సినిమా నిరూపించింది. అందుకే ఇక ముందు బ్యాక్ టు బ్యాక్ హనుమాన్ కాన్సెప్ట్‌ తో సినిమాలు వచ్చే అవకాశాలు ఉన్నాయని ఇండస్ట్రీ వర్గాల ద్వారా తెలుస్తోంది. ఇప్పటికే అందుకు సంబంధించిన కథలు రెడీ అవుతున్నాయి.

చిరంజీవి చేయబోతున్న విశ్వంభర సినిమాలో హనుమాన్‌ నేపథ్యం ఉంటుందని తెలుస్తోంది. అంతే కాకుండా నిఖిల్‌ హీరోగా భరత్ కృష్ణమాచారి దర్శకత్వంలో రూపొందుతున్న 'స్వయంభూ' సినిమా కథ లో కూడా ఆంజనేయుడి ఇన్పుట్స్‌ ఉండబోతున్నాయి అంటూ యూనిట్ సభ్యుల ద్వారా సమాచారం అందుతోంది.

నిఖిల్ గత చిత్రం కార్తికేయ 2 సినిమా మంచి విజయాన్ని సొంతం చేసుకుంది. ఆ సినిమా కూడా భక్తి కాన్సెప్ట్‌ తో ఉంటుంది. ఇప్పుడు స్వయంభూ సినిమా కూడా అదే లైన్ తో ఉండటం వల్ల కచ్చితంగా నిఖిల్ కు ఇది మరో విజయాన్ని తెచ్చి పెట్టడం ఖాయం అన్నట్లుగా ఇండస్ట్రీ వర్గాల వారు అభిప్రాయం వ్యక్తం చేస్తున్నారు.

హనుమాన్ కాన్సెప్ట్‌ తో కాస్త కమర్షియల్‌ ఎలిమెంట్స్ జోడించి సినిమాను వీఎఫ్‌ఎక్స్ తో కన్నుల విందుగా మార్చితే కచ్చితంగా భారీ విజయం సొంతం చేసుకోవచ్చు అంటూ ప్రశాంత్ వర్మ నిరూపించాడు. కనుక ముందు ముందు కూడా హనుమాన్ తరహా సినిమాలు వస్తాయని అంతా భావిస్తున్నారు.