బాలయ్య.. ఈ లుక్కుతో ఒక సినిమా పడితే..

నందమూరి నటసింహం బాలకృష్ణ ఏడాదికి ఒక సినిమాతో ప్రేక్షకుల ముందుకి వస్తున్నారు. ఆయన నుంచి చివరిగా వచ్చిన అఖండ, వీర సింహారెడ్డి, భగవంత్ కేసరి బ్లాక్ బస్టర్ హిట్ అయ్యాయి. హ్యాట్రిక్ హిట్స్ తో జోరు మీద ఉన్న బాలకృష్ణ యంగ్ దర్శకులతో సినిమాలు చేయడానికి ఎక్కువ ఆసక్తి చూపిస్తున్నారు. ప్రస్తుతం బాబీ దర్శకత్వంలో బాలయ్య పవర్ ఫుల్ మాస్ కథాంశంతో మూవీ చేస్తున్నారు.

ఈ సినిమా షూటింగ్ దశలో ఉంది. సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ ఈ చిత్రాన్ని నిర్మిస్తున్నాయి. ఇదిలా ఉంటే వచ్చే ఏడాది సంక్రాంతి కానుకగా ఈ సినిమాని ప్రేక్షకుల ముందుకి తీసుకొచ్చే అవకాశం ఉందనే మాట వినిపిస్తోంది. ఇదిలా ఉంటే బాలయ్య ఓ వైపు సినిమాలు చేస్తూనే మరో వైపు ఆహాలో అన్ స్టాపబుల్ తో హోస్ట్ గా అందరికి చేరువ అయ్యారు. రెండు సీజన్స్ కంప్లీట్ చేసుకున్న అన్ స్టాపబుల్ సీజన్ 3కి రంగం సిద్ధం అవుతోందంట.

మరో వైపు బాలయ్య తన తనయుడు మోక్షజ్ఞ డెబ్యూ సినిమా కోసం ప్రత్యేక శ్రద్ధ తీసుకుంటుంన్నారు. గత కొంతకాలంగా కమర్షియల్ యాడ్స్ కూడా బాలకృష్ణ చేస్తోన్న సంగతి తెలిసిందే. రెండు, మూడు కమర్షియల్ యాడ్స్ లో బాలయ్య ఇప్పటికే సందడి చేస్తున్నారు. ఆ యాడ్స్ తో కూడా బాలయ్య తనదైన శైలిలో అందరిని అలరిస్తున్నారు. ఇదిలా ఉంటే తాజాగా ఓ యాడ్ షూట్ కోసం బాలకృష్ణ పట్టు బట్టలలో ట్రెడిషనల్ గా కనిపించారు.

ఈ యాడ్ షూట్ లో బాలకృష్ణకి సంబందించిన స్టిల్స్ సోషల్ మీడియాలో వైరల్ అవుతున్నాయి. పెద్దరికం ఉట్టిపడే విధంగా ఈ లుక్ లో బాలకృష్ణ చాలా చక్కగా ఉన్నాడనే మాట నందమూరి అభిమానుల నుంచి వినిపిస్తోంది. ఓ జ్యూయిలరీ మాల్ కోసం బాలయ్య ఈ యాడ్ చేసినట్లు తెలుస్తోంది. అయితే ఈ ట్రెడిషనల్ స్టైల్ లో బాలకృష్ణ హీరోగా ఒక సినిమా పడితే కచ్చితంగా హైలైట్ అవుతుందనే మాట వినిపిస్తోంది.

బాలయ్య గతంలో ఫ్యామిలీ బ్యాక్ డ్రాప్ యాక్షన్ కథలతో నరసింహానాయుడు, సమరసింహారెడ్డి సినిమాలు చేశారు. మేగ్జిమమ్ బాలయ్య సినిమాలలో ఫ్యామిలీ సెటప్, మంచి ఎమోషనల్ బ్యాక్ స్టోరీస్ ఉంటాయి. అయితే యాక్షన్ సీక్వెన్స్ లేకుండా కంప్లీట్ డ్రామాతో కుటుంబ కథా చిత్రంలో బాలకృష్ణ ఈ రకమైన ట్రెడిషనల్ గెటప్ తో నటిస్తే బాగుంటుందని కామెంట్స్ వినిపిస్తున్నాయి. అయితే బాలయ్యని యాక్షన్ హీరోగా చూడటానికి అలవాటు పడిన ఆడియన్స్ ఫ్యామిలీ స్టార్ గా కనిపిస్తే రిసీవ్ చేసుకుంటారా అనేది చెప్పలేమని సినీ విశ్లేషకులు అంటున్నారు.