'ఇండియన్ 2'.. తేల్చుకునేందుకు రెడీ

సౌత్ సెన్సేషనల్ డైరెక్టర్ శంకర్, యూనివర్సల్ హీరో కమల్ హాసన్ కాంబోలో వచ్చిన 'భారతీయుడు' సినిమా అప్పట్లో ఎంత పెద్ద విజయాన్ని అందుకుందో ప్రత్యేకంగా చెప్పాల్సిన అవసరం లేదు. సుమారు రెండు దశాబ్దాల క్రితం విడుదలైన ఈ సినిమా బాక్సాఫీస్ దగ్గర వసూళ్ల వర్షం కురిపించింది. అప్పట్లోనే ఏకంగా రూ. 50 కోట్ల గ్రాస్ సాధించి కొత్త రికార్డులు నెలకొల్పింది. మళ్లీ ఇప్పుడు ఆ సినిమాకు సీక్వెల్ గా 'ఇండియన్ 2' సినిమా తెరకెక్కుతోన్న విషయం తెలిసిందే.

శంకర్ గత చిత్రం 2.0 రిలీజై ఐదేళ్లు గడుస్తున్నా ఇంకా ఆయన నుంచి మరో సినిమా థియేటర్స్ లో రాలేదు. 2.0 తర్వాత ఆయన తెరకెక్కిస్తున్నా 'ఇండియన్ 2' షూటింగ్ పలు ఇప్పటికే పలుమార్లు వాయిదా పడుతూ వస్తోంది. మొదట్లో ఈ సినిమా సెట్ లో భారీ అగ్నిప్రమాదం జరగడంతో కొన్ని రోజులు షూటింగ్ ఆపేశారు. దాంతో శంకర్ రామ్ చరణ్ 'గేమ్ చేంజర్' షూటింగ్ ని మొదలుపెట్టారు. మళ్లీ కొద్ది రోజుల తర్వాత 'భారతీయుడు 2' షూటింగ్ పట్టాలెక్కించారు.

అలా పలుమార్లు షూటింగ్ కి అంతరాయం కలుగుతూ వచ్చిన 'ఇండియన్ 2'కి ఇటు రిలీజ్ విషయంలోనూ వాయిదాల పర్వం కొనసాగుతోంది. ఓవైపు కమల్ హాసన్ తో ఈ సినిమా తెరకెక్కిస్తూనే, మరోవైపు రామ్ చరణ్ 'గేమ్‌ ఛేంజర్‌' సినిమా షూటింగ్ లోనూ పాల్గొన్నారు. ఈ రెండు సినిమాలకు సమానంగా డేట్స్ కేటాయించారు. రీసెంట్ గానే 'ఇండియన్ 2' విజయవాడ పరిసర ప్రాంతాల్లో ఓ షెడ్యూల్ ని పూర్తి చేసుకుంది.

ఇదిలా ఉంటే 'ఇండియన్ 2' రిలీజ్ డేట్ ని ఆఫీషియల్ గా అనౌన్స్ చేసేందుకు మేకర్స్ సిద్ధమైనట్లు తాజా సమాచారం. జనవరి 26 రిపబ్లిక్ డే రోజున 'ఇండియన్ 2' రిలీజ్ డేట్ ని అధికారికంగా ప్రకటించబోతున్నట్లు తెలిసింది. 'ఇండియన్ 2' తో పాటు 'ఇండియన్ 3' ని కూడా ఇదే ఏడాది రిలీజ్ చేయాలనేది శంకర్ ప్లాన్. ఇది జరగాలంటే 'ఇండియన్ 2' ఖచ్చితంగా సమ్మర్లో విడుదల కావాలి. అలా జరిగితేనే 'ఇండియన్ 3' ని ఏడాది చివర్లో రిలీజ్ చేసే అవకాశం ఉంటుంది.

మరి 'ఇండియన్ 2' రిలీజ్ డేట్ ఎప్పుడు అనేది రిపబ్లిక్ డే రోజున తేలనుంది. కాగా ఈ సినిమాలో సిద్ధార్థ్, కాజల్ అగర్వాల్, రకుల్ ప్రీత్ సింగ్, బాబీ సింహ, SJ సూర్య కీలక పాత్రలు పోషిస్తున్నారు. లైకా ప్రొడక్షన్స్, రెడ్ జాయింట్ ఫిలిమ్స్ సంయుక్తంగా నిర్మిస్తున్న ఈ చిత్రానికి అనిరుద్ రవిచంద్రన్ సంగీతం అందిస్తున్నారు.