ఇండియన్ 2 కోసం చనిపోయిన వారు వస్తున్నారు!!

బాలీవుడ్ ఫిల్మ్ మేకర్స్ కంటే ఎక్కువ టెక్నాలజీని ఉపయోగిస్తూ సినిమాలు చేస్తూ వచ్చిన దర్శకుడు శంకర్. దాదాపు 25 ఏళ్ల క్రితం వచ్చిన జీన్స్ సినిమాలోనే అద్భుతమైన టెక్నాలజీని వినియోగించి డ్యుయల్ రోల్‌ ను చూపించిన ఘనత శంకర్ కి దక్కింది. ఆ తర్వాత కూడా ఎన్నో అద్భుతమైన విజువల్ వండర్స్ ను ఆవిష్కరించిన విషయం తెల్సిందే.

రాజమౌళి ఈగ.. బాహుబలి వంటి విజువల్ వండర్స్ ను క్రియేట్‌ చేయడం వల్ల శంకర్‌ సినిమాల గ్రాఫిక్స్ కి ఈమధ్య మంచి టాక్ రాలేదు. రోబో.. 2.ఓ లో శంకర్ వినియోగించిన గ్రాఫిక్స్ హాలీవుడ్‌ ఫిల్మ్‌ మేకర్స్ ను కూడా ఆశ్చర్యానికి గురి చేశాయి. ఎన్నో రకాలుగా టెక్నాలజీని అందిపుచ్చుకుంటూ సినిమాలు చేస్తూ ఉండే శంకర్ ప్రస్తుతం ఇండియన్ 2 కోసం మరో అద్భుతం ను ఆవిష్కరించబోతున్నాడు.

ఇండియన్ 2 షూటింగ్ ప్రారంభించి చాలా కాలం అయింది. కొన్ని కారణాల వల్ల సినిమా ఆలస్యం అయింది. ప్రముఖ కమెడియన్ వివేక్‌ ఇంకా మలయాళ నటుడు నెడుముడి వేణు లు మృతి చెందారు. వారిద్దరు కూడా ఈ సినిమా లో కీలక పాత్రలో కనిపించబోతున్నారు. వారితో కొన్ని సన్నివేశాల చిత్రీకరణ జరిగింది.

వారి స్థానంలో మరో నటుడిని తీసుకుని చిత్రీకరణ జరపాలి అంటే చాలా రిస్క్ తో కూడుకున్న పని. అందుకే వారితో చేయాల్సిన బ్యాలెన్స్ సన్నివేశాల కోసం గ్రాఫిక్స్ ను వినియోగించాలని నిర్ణయించుకున్నట్లుగా తెలుస్తోంది. శంకర్‌ తనకు ఉన్న టెక్నాలజీ అవగాహణ తో వివేక్.. నెడుముడి వేణు లను రీ క్రియేట్‌ చేయించినట్లుగా తెలుస్తోంది.

వివేక్‌.. వేణులు ఇండియన్ 2 కోసం మళ్లీ పుట్టబోతున్నారు అంటూ వారి అభిమానులకు చిత్ర యూనిట్‌ సభ్యులు తెలియజేయడంతో సంతోషం వ్యక్తం చేస్తున్నారు. గతంలో ఇలాంటి టెక్నాలజీ తో కొందరు చనిపోయిన వారిని వెండి తెరపై చూపించారు. కానీ ఈసారి అంతకు మించి అన్నట్లుగా సీజీని ఉపయోగించి ఇండియన్ 2 లో వివేక్‌.. వేణు లను రీ క్రియేట్‌ చేస్తున్నారు.