వైరల్: జైలర్ నటుడు బూతుల‌తో వీధి ఫైట్!

సూప‌ర్ స్టార్ రజనీకాంత్ నటించిన `జైలర్‌`లో విలన్‌గా నటించిన న‌టుడు వినాయకన్ ఎప్పుడూ వివాదాలతో మీడియా హెడ్‌లైన్స్‌లో ఉంటారు. ఇంత‌కుముందు ఆయ‌న హైద‌రాబాద్ విమానాశ్ర‌యంలో పోలీసుల‌తో గొడ‌వ‌ప‌డిన వీడియో వైర‌ల్ అయింది. ఇప్పుడు వైరల్ అవుతున్న వీడియోలో అత‌డు గోవా వీధుల్లో హ‌ల్ చ‌ల్ చేసాడు. అక్క‌డ స్థానిక తినుబండారాల హోట‌ల్ నిర్వాహ‌కుల‌పై విరుచుకుప‌డుతున్నాడు. ఆ స‌మ‌యంలో అత‌డు దుర్భాష‌లాడుతూ క‌నిపించాడు. అత‌డి మాట‌ల తూటాలు దూరంగా ఉన్న‌వారికి వినిపిస్తున్నాయి. ఈ వీడియో ఇప్పుడు అన్ని సోషల్ మీడియా ప్లాట్‌ఫామ్‌లలో వైరల్‌గా మారింది. అయితే ఈ ఫైట్ సినిమా కోసమా లేక నిజమా అని నెటిజన్లు అంచనా వేసేందుకు ప్ర‌య‌త్నిస్తున్నారు.

అతడు అధిక మొత్తంలో డ్రగ్స్ సేవించ‌డం వల్ల ఇలా ప్ర‌వ‌ర్తిస్తున్నాడ‌ని కొందరు అభిప్రాయపడ్డారు. అత‌డు తాగి ఉన్నాడని నేను అనుకుంటున్నాను అని ఒక నెటిజ‌న్ రాసారు. ఆ వ్యక్తి సీరియస్‌గా.. నటుడు వినాయకనా లేదా అతనిలా కనిపిస్తున్నాడా?.. ఇది సినిమా షూట్ కాదు క‌దా? అని ఒక వ్య‌క్తి రాసాడు. వినాయ‌క‌న్ కి క‌ష్టాలు కొత్తేమీ కాదు! అని ఒక నెటిజ‌న్ స్పందించారు.

మద్యం మత్తులో విమానాశ్ర‌య‌ గేట్ సిబ్బందిలో ఒకరితో అనుచితంగా ప్రవర్తించాడనే ఆరోపణపై అత‌డిని గతంలో అరెస్టు చేశారు. హైదరాబాద్‌లోని ఆర్‌జీఐ ఎయిర్‌పోర్ట్‌లో సిటీ పోలీస్ యాక్ట్ కింద కేసు నమోదు చేశారు. మరో సంఘటనలో కేరళలోని ఎర్నాకులంలోని స్థానిక పోలీస్ స్టేషన్‌లో సీన్ క్రియేట్ చేసినందుకు అత‌డిని అక్టోబర్ 2023లో అరెస్టు చేసారు.

వినాయకన్ తమిళ మూలాలున్న‌ నటుడు. ప్రధానంగా తమిళం, మలయాళ చిత్రాల‌లో పని చేస్తాడు. 1995 చిత్రం మాంత్రికంలో ఒక చిన్న పాత్ర‌లో అరంగేట్రం చేసిన అత‌డు 2016 డ్రామా `కామాటిపాదం`తో సినీ ప్రేక్షకుల దృష్టిని ఆకర్షించాడు. వినాయకన్ తన నటనకు కేరళ ఫిల్మ్ స్టేట్ అవార్డును గెలుచుకున్నాడు. త‌మిళ అనువాద చిత్రాల‌తో అత‌డు తెలుగులోను ఫేమ‌స్ అయ్యాడు. ముఖ్యంగా ర‌జ‌నీకాంత్ జైల‌ర్ లో విల‌న్ గా ధీటైన న‌ట‌న‌కు మంచి పేరొచ్చింది.