లెన్స్ విక‌టించి కార్నియా డ్యామేజ్‌తో న‌టికి న‌ర‌కం

టెలివిజన్ నటి జాస్మిన్ భాసిన్ కళ్లకు గాయమైంద‌ని ఆవేద‌న చెందారు. కాంటాక్ట్ లెన్స్ లోపంతో కంటిలోని కార్నియాలు దెబ్బ తిన్నాయ‌ని, చాలా నొప్పిగా ఉంద‌ని ..రోజువారీ కార్యకలాపాలకు ఆటంకం కలిగిస్తోంద‌ని క‌ల‌త చెందారు. ఢిల్లీలో జరిగిన ఒక ఈవెంట్ కోసం లెన్స్‌లు ధరించడంతో ఆమె కార్నియాలు దెబ్బతిన్నాయని తాజా ఇంటర్వ్యూలో నటి జాస్మిన్ భాసిన్ వెల్లడించారు. ప్ర‌స్తుతం దీనికి చికిత్స జ‌రుగుతోంది. నాలుగు-ఐదు రోజుల్లో కోలుకుంటుందని డాక్టర్ హామీ ఇచ్చారని తెలుస్తోంది.

ఈ కష్టాన్ని షేర్ చేసుకుంటూ జాస్మిన్ భాసిన్ జాతీయ మీడియాతో మాట్లాడారు. ''నేను జూలై 17న ఒక ఈవెంట్ కోసం ఢిల్లీలో ఉన్నాను. దాని కోసం నేను సిద్ధమవుతున్నాను. నా లెన్స్‌లలో ఏం తప్పు ఉందో నాకు తెలియదు. కానీ నేను వాటిని ధరించిన తర్వాత నా కళ్ళు నొప్పిగా మారాయి. నేను ఒక వైద్యుని వద్దకు వెళ్లాలని అనుకున్నాను. కానీ నేను ఈవెంట్‌కు హాజరు కావాల్సిన ప‌రిస్థితి. ఆపై నేను ఈవెంట్‌లో సన్ గ్లాసెస్ ధరించాను. బృందం నాకు సహాయం చేసింది. ఎందుకంటే ఒక పాయింట్ ఆఫ్ టైమ్ తర్వాత నేను ఏమీ చూడలేకపోయాను'' అని తెలిపింది.

అనంత‌రం అత్య‌వ‌స‌ర‌ చికిత్స కొనసాగించేందుకు జాస్మిన్ ని ముంబైకి తరలించారు. కంటి నిపుణుడిని సంప్ర‌దించారు. జాస్మిన్ దీనిపై మాట్లాడుతూ- ''డాక్ట‌ర్ నా కార్నియాస్ దెబ్బతిన్నాయని, నా కళ్ళకు కట్టు కట్టాల‌ని చెప్పాడు. ముంబైలో నా చికిత్సను కొనసాగించాను. నేను చాలా నొప్పిని అనుభవిస్తున్నాను. వచ్చే నాలుగైదు రోజుల్లో నేను కోలుకుంటాన‌ని వైద్యులు చెప్పారు. కానీ అప్పటి వరకు నేను నా కళ్ళను బాగా చూసుకోవాలి.. ఎందుకంటే నాకు నిద్ర కూడా పట్టనంత‌ నొప్పిగా ఉన్నాయి..'' అని తెలిపింది.

జాస్మిన్ త్వరలో తన పనిని తిరిగి ప్రారంభించాలని భావిస్తోంది. అదృష్టవశాత్తూ నేను నా పనిని ఏదీ వాయిదా వేయవలసిన అవసరం లేదు. నేను కొన్ని రోజుల్లో కోలుకుని తిరిగి పనిలోకి వస్తానని ఆశాభావం వ్య‌క్తం చేసింది. జాస్మిన్ భాసిన్ బ్లాక్ షేడ్స్ ధరించి ఉన్న ఫోటోను షేర్ చేసింది. క్యాప్షన్‌లో ''ఇప్పుడు బాగానే ఉంది ..కోలుకుంటున్నారు. మీ ప్రేమ ఆశీర్వాదాలకు ధన్యవాదాలు'' అని హార్ట్ ఎమోజీని షేర్ చేసింది.

దిల్ సే దిల్ తక్, నాగిన్ 4: భాగ్య కా జెహ్రీలా ఖేల్, తషన్-ఎ-ఇష్క్ వంటి సీరియల్స్‌లో జాస్మిన్ న‌టించారు. ఫియర్ ఫ్యాక్టర్: ఖత్రోన్ కే ఖిలాడీ 9, బిగ్ బాస్ 14 వంటి రియాల్టీ షోలలో కూడా పాల్గొంది. జాస్మిన్ భాసిన్ తమిళ చిత్రం వానంతో పెద్ద తెర‌ అరంగేట్రం చేసింది. కరోడ్‌పతి, బివేర్ ఆఫ్ డాగ్స్, దిల్లున్నోడు, లేడీస్ & జెంటిల్‌మెన్ వంటి కొన్ని చిత్రాల్లో నటించింది.