జవాన్ బీభత్సం.. పాత లెక్కలన్ని స్మాష్

గత ఐదేళ్ల క్రితం వరకు వరుస పరాజయాలతో సతమతమైన బాలీవుడ్‌ కింగ్‌ షారుక్ ఖాన్ 2023లో తన స్టామినా ఏంటో ప్రతీ సినీ అభిమానికి రుచి చూపిస్తున్నారు. ఈ ఏడాది ప్రారంభంలో 'పఠాన్'తో ఏకంగా రూ. 1000 కోట్లను కొల్లగొట్టిన ఆయన... ఇప్పుడు జవాన్ తో అదే మ్యాజిక్ రిపీట్ చేసే దిశగా వెళ్తున్నారు. పఠాన్ మొదటి రోజు భారత్‌లో రూ. 57 కోట్లు వసూళ్లను సాధించగా... ఇప్పుడు జవాన్ తో మరోసారి బాలీవుడ్ సింహాసనం తనదేనని షారుక్ నిరూపించారు. జవాన్ తొలి రోజు ఏకంగా రూ.70కోట్ల వరకు నెట్ వసూళ్లు, వరల్డ్ వైడ్ గా రూ.120కోట్లకు పైగా గ్రాస్ కెలక్ట్ చేసింది.

ఈ మార్క్ కలెక్షన్లతో షారుక్ పలు రికార్డులను తన ఖాతాలో వేసుకున్నారు. ఇండియా బిగెస్ట్ ఓపెనింగ్ బాలీవుడ్ మూవీగా జవాన్ నిలిచింది. ఈ ఘనత సాధించిన తొలి హీరో షారుకే కావడం విశేషం. అంతకుముందు ఓపెనింగ్ డే కలెక్షన్స్​ లో.. పఠాన్‌ రూ.57 కోట్లు, కేజీయఫ్ చాప్టర్‌ 2 రూ. 54 కోట్లు, వార్ రూ. 53.35కోట్లు, థగ్స్ ఆఫ్ హిందుస్థాన్ రూ.52.25కోట్లు, హ్యాపీ న్యూ ఇయర్ రూ.44.97కోట్లు, భరత్ రూ.42.30కోట్లు, బాహుబలి 2 రూ. 41 కోట్లు సాధించాయి. అలాగే ఓపెనింగ్ డే వరల్డ్ వైడ్ గా రెండు సార్లు రూ.100 కోట్లు సాధించిన ఏకైక బాలీవుడ్ హీరో షారుక్ ఖానే కావడం మరో విశేషం.

తెలుగు రాష్ట్రాల్లోనూ జవాన్ సినిమా ఓ ఘనత సాధించింది. ఈ చిత్రానికి ఇక్కడ కూడా మంచి రెస్పాన్స్ వస్తోంది. ప్రేక్షకులు థియేటర్లకు భారీగానే తరలి వెళ్తున్నారు. దీంతో రెండు తెలుగు రాష్ట్రాల్లో ఈ చిత్రం రూ.9.35కోట్ల గ్రాస్ వసూలు చేసింది. టాలీవుడ్ లో ఇప్పటివరకు ఓ బాలీవుడ్ మూవీకి అత్యధిక గ్రాస్ వసూళ్లు వచ్చిన సినిమా ఇదే కావడం విశేషం.

ఇకపోతే షారుక్‌ ఖాన్‌ గత ఐదు సినిమాల మొదటిరోజు కలెక్షన్స్‌ వివరాల విషయానికొస్తే.. 2016లో విడుదలైన 'ఫ్యాన్' సినిమా మొదటి రోజు రూ.19.10 కోట్లు వసూలు చేసిందట. ఆ తర్వాత 2017లో వచ్చిన రయీస్ చిత్రం మొదటి రోజు రూ. 20.40 కోట్లను అందుకుందట. 2017లో వచ్చిన 'జబ్ హ్యారీ మెట్ సెజల్' సినిమా ఫస్ట్ డే మొత్తం రూ.15.25 కోట్లు మాత్రమే వసూలు చేసిందట. ఇక 2018 సంవత్సరంలో విడుదలైన అట్టర్ ఫ్లాప్ 'జీరో' మూవీ రూ.19.35 కోట్ల రూపాయలే అందకుందట.

పైనల్ గా జీరో వసూలు, రివ్యూలు చూసిన సినీ ప్రియులు ఇక షారుక్ కెరీర్ అయిపోయిందనుకున్నారు. కానీ వారంతా నోరు మూసుకునేలా ఐదేళ్లు గ్యాప్ ఇచ్చి వచ్చిన షారుక్ పఠాన్ తో ఇండస్ట్రీ రికార్డులను తిరగరాశారు.ఈ సినిమా తొలి రోజే రూ.57కోట్లు అందుకుంది. ఇప్పుడు జవాన్ తో దాన్ని కొనసాగిస్తూ బాక్సాఫీస్ ను మరోసారి షేక్ చేస్తున్నారు.