'జెర్సీ' వ‌సూళ్ల‌పై ప్ర‌శ్నిస్తే నాని అస‌హనం!

నేచుర‌ల్ స్టార్ నాని కెరీర్ లో 'జెర్సీ' ఓ మైలు రాయి అన‌డంలో ఎలాంటి సందేహం లేదు. ఓ క్రీడాకురుడి జీవిత క‌థ ఆధారంగా..వాస్త‌వ సంఘ‌ట‌న‌ల స్పూర్తితో తెర‌కెక్కించిన సినిమాలో ఎంతో ఎమోష‌న్ ఉంది. విమ‌ర్శ‌కుల ప్ర‌శంస‌లు ద‌క్కించుకున్న చిత్రంగా నిలిచింది. కానీ సినిమా క‌మ‌ర్శియ‌ల్ గా ఆశించిన స్థాయిలో రాణించ‌లేదు? అన్న విమ‌ర్శ కూడా ఉంది. కేవ‌లం ఓ సెక్ష‌న్ ఆడియ‌న్స్ కే జెర్సీ క‌నెక్ట్ అయింద‌ని మీడియాలో చాలాసార్లు క‌థ‌నాలు వ‌చ్చాయి.

రివ్యూల్లో సైతం వ‌సూళ్ల‌పై అప్ప‌ట్లోనే సందేహాలు వ్య‌క్త‌మ‌య్యాయి. ఈ నేప‌థ్యంలో తాజాగా 'హాయ్ నాన్న' ప్ర‌చారం లో భాగంగా నాని ముందుకు 'జెర్సీ' వ‌సూళ్లపై సూటిగా ఓ ప్ర‌శ్న ఎదుర్కున్నారు. జెర్సీ..శ్యామ్ సింఘ‌రాయ్ లాంటి మంచి సినిమాలు చేసిన‌ప్ప‌టికీ నిర్మాత‌ల‌కు డ‌బ్బులు రాలేద‌నే టాక్ ఉంది? దాని గురించి మీరేమంటారు? అంటే నాని అస‌హ‌నం వ్య‌క్తం చేసిన‌ట్లు క‌నిపించింది.

'ఈ మాట ఏ నిర్మాత చెప్పారో చెప్పండి. నా వ‌ద్ద నెంబ‌ర్స్ ఉన్నాయి. గ‌త చిత్రాల క‌లెక్ష‌న్ల గురించి మాట్లాడ‌టానికి ఇది స‌రైన వేదిక కాద‌నుకుంటున్నా. థియేట్రిక‌ల్..నాన్ థియేట్రిక‌ల్ రీమేక్ ఇలా అన్ని విధాలుగా ఆ సినిమా మంచి వ‌సూళ్లు సాధించింది. జెర్సీని ఉదాహ‌ర‌ణ‌గా చూపించ‌డం త‌ప్పు. కావాలంటే 'అంటే సుంద‌రానికీ' ఉదాహ‌ర‌ణ‌గా చెప్పొచ్చు. తెలిసి తెలియ‌ని వాళ్లు సోష‌ల్ మీడియాలో ఇలాంటి మాట‌లు అనొచ్చు. కానీ అన్నీ తెలిసిన మీడియా స‌రైన రీజ‌నింగ్ తో స‌రిగ్గా అడ్ర‌స్ చేయాలి.

మీరు అంటున్న మాటలు నిజం కాద‌ని తెలిసిన‌ప్పుడు ఆపేయ‌డం అనేది కూడా మీ బాధ్య‌తే' అని అన్నారు. ఈ విష‌యం మీడియాలో వైల‌ర్ అయిందో లేదో వెంట‌నే 'జెర్సీ' నిర్మాత నాగవంశీ ట్విట‌ర్లో లైన్ లోకి వ‌చ్చారు. 'సితార ఎంట‌ర్ టైన్ మెంట్స్ నిర్మించిన లాభ‌దాయ‌క‌మైన చిత్రాల్లో జెర్సీ ఒక‌టి. ఆ సినిమా మాకు జాతీయ స్థాయిలో గుర్తింపు తెచ్చిపెట్టింది. ఎన‌లేని గౌర‌వాన్ని అందించింది. క్రియేటివ్..ఆర్దికంగా ఈ సినిమా విష‌యంలో ఎంతో ఆనందంగా ఉన్నాను' అని రాసుకొచ్చారు.