ఎన్టీఆర్​ మాసివ్​ లైనప్​.. మూడేళ్లు మోతే

'ఆర్​ఆర్​ఆర్​'తో బిగ్గెస్ట్​ హిట్ అందుకున్న యంగ్ టైగర్ ఎన్టీఆర్.. ప్రస్తుతం తన కొత్త సినిమాలతో ఫుల్​ బిజీగా ఉన్నారు. తాజాగా ఆయన నటిస్తున్న 'దేవర' సినిమా నుంచి వచ్చిన రెండు భాగాల లేటెస్ట్ అప్డేట్.. అటు ఫ్యాన్స్​లో ఇటు సినీ ప్రియుల్లో సరికొత్త ఉత్సాహాన్ని నింపింది. ఈ సినిమా దర్శకుడు కొరటాల శివ ఓ ప్రత్యేక వీడియో ద్వారా ఈ విషయాన్ని తెలుపుతూ.. 2024 ఏప్రిల్ 5న తొలి భాగం ప్రేక్షకుల ముందుకు రానున్నట్లు స్పష్టత ఇచ్చారు.

ఇక దేవర మొదటి భాగం షూటింగ్ పూర్తవ్వగానే.. ఎన్టీఆర్ 'వార్ 2' షూటింగ్​కు తన సమయాన్ని కేటాయిస్తారని తెలిసింది. 2024 ప్రారంభం నుంచి ఆ చిత్రానికి సమయం కేటాయిస్తారని, ఆ చిత్రాం వచ్చే ఏడాది డిసెంబర్​లో రిలీజ్ కావొచ్చని అంచనా. ఈ సినిమా తర్వాత 'కేజీయఫ్' ఫేమ్​ ప్రశాంత్ నీల్​తో ఓ భారీ యాక్షన్ సినిమా చేయనున్న సంగతి తెలిసిందే. ఇది 2025లో ఉంటుందట.

ప్రశాంత్ నీల్ సినిమా తర్వాత మళ్లీ 'దేవర 2' కోసం.. ఎన్టీఆర్​ రంగంలోకి దిగే అవకాశం ఉందని అంటున్నారు. కొరటాల శివకు డేట్స్ ఇవ్వాలని తారక్​ ఆలోచనలో ఉన్నారట. 'దేవర 2' 2026లో ఉంటుందని సినీ వర్గాల నుంచి టాక్​ వినిపిస్తోంది. ఇక ఈ చిత్రం పూర్తయ్యాక.. అరవింద సమేత కాంబో దర్శకుడు త్రివిక్రమ్​తోనూ ఓ సినిమా చేయనున్నారని తెలుస్తోంది. ఇది సెట్స్​పైకి ఇంకాస్త ఆలస్యం అవుతుంది.

ఇలా దేవర 1, వార్ 2, ప్రశాంత్ నీల్​తో సినిమా, దేవర 2, ఆ తర్వాత త్రివిక్రమ్.. ఎన్టీఆర్ సినిమాల లైనప్ భారీ స్థాయిలో ఉంది. అంటే ఈ చిత్రాలన్నీ పూర్తయ్యేసరికి మరో మూడేళ్లు పడుతుంది. రానున్న ఈ మూడేళ్ల పాటు తారక్​ తన కొత్త ప్రాజెక్ట్​లతో బిజీగా గడపనున్నారు.

పైగా ఈ చిత్రాలన్నీ సరికొత్త యాక్షన్​ ఎంటర్​టైన్మెంట్స్​గా రూపుదిద్దుకుంటున్నాయి. కచ్చితంగా ఈ థ్రిల్లింగ్ ప్రాజెక్ట్​ అన్నీ సరికొత్త బెంచ్​ మార్క్స్​ క్రియేట్​ చేస్తాయని అభిమానులు, సినీ ప్రియులు ఆశిస్తున్నారు. ఎన్టీఆర్ కూడా ఎక్కడా తగ్గకుండా ఈ భారీ లైనప్​తో కెరీర్​లో మరింత ఉన్నత స్థాయికి వెళ్లాలని గట్టి పట్టుదలతో ఉన్నారు.