క్రేజీ రీమేక్ లో శ్రీదేవి చిన్న కూతురు..!

తమిళంతో పాటు తెలుగు లో కూడా సూపర్ హిట్ అయిన 'లవ్‌ టుడే' చిత్రం హిందీ రీమేక్ కు ఏర్పాట్లు జరుగుతున్నాయి. ప్రస్తుత కాలంలో ప్రేమ ఎలా ఉంది అనే విషయాన్ని ఈ సినిమాలో చూపించడం జరిగింది. యూనివర్శిల్‌ సబ్జెక్ట్‌ అవ్వడంతో ఈ సినిమా ను హిందీలో రీమేక్ చేయబోతున్నారు.

ప్రదీప్‌ రంగనాధన్‌ హీరోగా నటించడంతో పాటు లవ్‌ టుడే కి దర్శకుడిగా వ్యవహరించిన విషయం తెల్సిందే. యువన్‌ శంకర్ రాజా సంగీతం అందించడంతో మ్యూజికల్‌ హిట్ గా నిలిచింది. ఇప్పుడు హిందీలో ఈ సినిమాకు అద్వైత్‌ చందన్ దర్శకత్వంలో రీమేక్ కు ఏర్పాట్లు జరుగుతున్నాయి.

ఈ రొమాంటిక్‌ లవ్‌ స్టోరీ మూవీ లో అమీర్ ఖాన్ వారసుడు జునైద్‌ ఖాన్‌ హీరోగా నటించబోతున్నాడట. హీరోయిన్‌ పాత్రకు గాను అతిలోక సుందరి శ్రీదేవి చిన్న కూతురు, జాన్వీ కపూర్‌ చెల్లి అయిన ఖుషి కపూర్‌ ను ఎంపిక చేయడం జరిగిందనే వార్తలు వస్తున్నాయి.

ఈ మధ్య కాలంలో జునైద్‌ ఖాన్‌ బ్యాక్‌ టు బ్యాక్‌ సినిమాలు చేస్తూ బిజీగా ఉన్నాడు. ఇప్పటికే మహారాజా అనే సినిమాను పూర్తి చేశాడు. ఆ సినిమా డైరెక్ట్‌ ఓటీటీ ద్వారా ప్రేక్షకుల ముందుకు రాబోతుంది. మరో సినిమా ను సాయి పల్లవితో కలిసి జునైద్‌ ఖాన్‌ నటిస్తున్న విషయం తెల్సిందే.

ఇప్పుడు జునైద్‌ ఖాన్‌ తో లవ్‌ టుడే సినిమా రీమేక్ ను ప్లాన్‌ చేసిన నేపథ్యంలో అందరి దృష్టిని ఆకర్షించారు. అమీర్ ఖాన్‌ వారసుడు పెద్ద సినిమాలతో కాకుండా ఇలాంటి చిన్న చిన్న సినిమాలతో ఇండస్ట్రీలో అడుగు పెట్టడం ఆశ్చర్యంగా ఉందంటూ కొందరు కామెంట్స్ చేస్తే మరి కొందరు జునైద్‌ ఖాన్‌ లవ్‌ టుడే లో హీరో పాత్రకు న్యాయం చేయగలడా అనే అనుమానాలు వ్యక్తం చేస్తున్నారు.