సాయి ప‌ల్ల‌విని ఆకాశానికి ఎత్తేసిన హీరో భార్య‌!

`అమ‌ర‌న్` విజ‌యంతో సాయిప‌ల్ల‌వి పేరు మ‌రోసారి నెట్టింట మారుమ్రోగుతోంది. మేజ‌ర్ ముకుంద్ వ‌ర‌ద‌రాజ‌న్ భార్య పాత్ర‌లో ప‌ల్ల‌వి అభినయించిన తీరుకు ప్రేక్ష‌కులు ఫిదా అవుతున్నారు. క‌థ సాయి ప‌ల్ల‌వి పాత్ర‌తోనే ప్రారంభం అవ్వ‌డం...ముగింపు కూడా ఆమె పాత్ర‌తోనే ఉండ‌టంతో సినిమా క‌నెక్ష‌న్ బాగుంది. క్లైమాక్స్ లో సాయి ప‌ల్ల‌వి అభిన‌యానికి ఆమె అభిమానులైతే మాటల్లో చెప్ప‌లేనంత‌ అనుభూతాకి లోన‌వుతున్నారు.

త‌మ మాట‌ల్ని సోష‌ల్ మీడియా వేదిక‌గా పోస్టుల రూపంలో చెబుతున్నారు. ఈనేప‌థ్యంలో న‌టి, సూర్య స‌తీమ‌ణి జ్యోతిక కూడా సాయి ప‌ల్ల‌వి న‌ట‌న‌ను ప్ర‌శంసిస్తూ ఓ పోస్ట్ పెట్టిన సంగ‌తి తెలిసిందే. తాజాగా ఆ పోస్టుకు సాయి ప‌ల్ల‌వి రిప్లై ఇచ్చింది. `మీరు మా సినిమా చూస్తున్నార‌ని చెప్పిన‌ప్ప‌టి నుంచి మీకు న‌చ్చుతుందా? లేదా? అని ఎంతో కంగారు ప‌డ్డాను. మీ మాట‌లు నాకెంతో విలువైన‌వి. మా సినిమా మీకు న‌చ్చినందుకు ఎంతో సంతోషంగా ఉంది` అని అంది.

ఈ పోస్ట్ కు మ‌ళ్లీ జ్యోతిక రిప్లై ఇచ్చారు. `సాయి ప‌ల్ల‌వి నీ వ‌ర్క్ నాకెప్పుడు న‌చ్చుతుంది. నువ్వు గొప్ప న‌టివి. అద్భుత‌మైన పాత్ర‌లు ఎంచుకోవ‌డ‌మే కాకుండా వాటిని నూరు శాతం న్యాయం చేస్తున్నావ్. ఎల్ల‌ప్పుడు నిన్ను ఇష్ట ప‌డుతూనే ఉంటా. `అమ‌ర‌న్` క్లైమాక్స్ లో నీ న‌ట‌న అద్భుతంగా ఉంది. అది నాకెంతో న‌చ్చింది. కెరీర్ ప‌రంగా మ‌రిన్ని గొప్ప ఉన్న‌త శిఖ‌రాల‌కు చేరుకోవాల‌ని కోరుకుంటున్నా` అని రాసుకొచ్చారు.

సాయి ప‌ల్ల‌వి సూర్య కి జోడీగా కూడా `ఎన్ జీ కే` అనే సినిమాలో న‌టించిన సంగ‌తి తెలిసిందే. అందులోనూ ప‌ల్ల‌వి సూర్య కు భార్య పాత్ర పోషించింది. కానీ ఆ చిత్రం ఆశించిన ఫ‌లితాలు సాధించ‌లేదు. ఆ చిత్రం ఐదేళ్ల క్రితం రిలీజ్ అయింది. ఆ త‌ర్వాత మ‌ళ్లీ ఆ జోడీలో మ‌రో సినిమా రాలేదు. ప్ర‌స్తుతం సాయి ప‌ల్ల‌వి వివిధ ప్రాజెక్ట్ ల‌తో బిజీగా ఉంది. బాలీవుడ్ లో `రామాయ‌ణ్` సినిమాతో ఎంట్రీ ఇస్తోంది.