చంద‌మామ‌కే ఝ‌ల‌కిచ్చిన డైరెక్ట‌ర్

విశ్వ‌న‌టుడు కమల్ హాసన్ సేనాప‌తిగా తిరిగి వ‌స్తున్నారు. భార‌తీయుడు 2 త్వ‌ర‌లో పెద్ద తెర‌పై సంద‌డి చేయ‌బోతోంది. శంకర్ దర్శకత్వం వహించిన ఈ చిత్రం బ్లాక్ బస్టర్ మూవీ భార‌తీయుడు (ఇండియన్)కి సీక్వెల్. దాదాపు రెండు ద‌శాబ్దాల త‌ర్వాత ఈ సీక్వెల్ సినిమా సాధ్య‌మైంది. మేకర్స్ గత రాత్రి ఆడియో కార్యక్రమాన్ని వైభ‌వంగా నిర్వహించారు. అనిరుధ్ సంగీతం అందించిన ఈ సినిమా పాట‌లు మాస్ ని ఆక‌ట్టుకుంటున్నాయి.

ఇక ఆడియో వేడుక‌లో గ‌మ్మ‌త్త‌యిన విష‌యాలెన్నో చెప్పారు ద‌ర్శ‌కుడు శంక‌ర్. ప‌నిలోప‌నిగా చంద‌మామ కాజ‌ల్ ఫ్యాన్స్ కి పెద్ద షాకిచ్చే విష‌యం చెవిన వేసారు. భార‌తీయుడు 2లో చంద‌మామ క‌నిపించ‌ద‌ని, భార‌తీయుడు 3లో మాత్ర‌మే త‌న‌ను చూడ‌గ‌ల‌ర‌ని కూడా వెల్ల‌డించాడు. దీంతో కాజ‌ల్ ని ఇలాంటి క్రేజీ మూవీలో వీక్షించే అవ‌కాశం లేదా? అంటూ అభిమానులు క‌ల‌త చెందుతున్నారు.

అదే స‌మ‌యంలో శంక‌ర్ ఒకేసారి భార‌తీయుడు 2, భార‌తీయుడు 3 కి సంబంధించిన స‌న్నివేశాల‌ను పూర్తి చేస్తున్నార‌ని కూడా క్లారిటీ వ‌చ్చేసింది. కానీ కాజ‌ల్ ని ఇప్పుడే చూడ‌లేమ‌న్న ఆవేద‌న అభిమానుల‌ను వెంటాడుతుంద‌న‌డంలో సందేహం లేదు. ఈ చిత్రంలో రకుల్ ప్రీత్ సింగ్, సిద్ధార్థ్ స‌హా ప‌లువురు క్రేజీ స్టార్లు న‌టిస్తున్నారు. చిత్ర‌ బృందం ఇప్పటికే రెండు భాగాలకు షూట్ పూర్తి చేసిందని టాక్ వినిపిస్తోంది.

చంద‌మామ కాజ‌ల్ ఇటీవ‌ల గౌత‌మ్ కిచ్లును పెళ్లాడిన సంగ‌తి తెలిసిందే. ఈ జంట‌ పండంటి బిడ్డ‌కు జ‌న్మ‌నిచ్చారు. పెళ్లికి ముందు కాజ‌ల్ కొన్ని భారీ చిత్రాల నుంచి త‌న‌కు తానుగా త‌ప్పుకుంది. కొర‌టాల‌తో చిరంజీవి డిజాస్ట‌ర్ సినిమా నుంచి వైదొలిగింది. అలాగే నాగార్జున‌తోను ఒక ఫ్లాప్ సినిమాను వ‌దులుకుంది. కానీ శంక‌ర్ తెర‌కెక్కిస్తున్న భార‌తీయుడు 2 ఆఫ‌ర్ ని మాత్రం కాద‌నలేదు. ఇందులో త‌న స‌న్నివేశాల‌ను తెలివిగా ముందే పూర్తి చేసేసింది.