నెగెటివిటీ అంతా ఎగిరిపోయింది

ఒక్క రోజు ముందు 'ప్రాజెక్ట్-కే' నుంచి ప్రభాస్ ఫస్ట్ లుక్‌ను రిలీజ్ చేస్తే.. దాని మీద సోషల్ మీడియాలో జరిగిన ట్రోలింగ్ అంతా ఇంతా కాదు. ఆ పోస్టర్ అసలు ఒరిజినల్‌లా లేదని.. ఫ్యాన్ మేడ్ ఎడిట్స్ కంటే దారుణంగా ఉందని.. సోషల్ మీడియాలో ప్రభాస్ అభిమానులతో పాటు నెటిజన్లందరూ తీవ్ర విమర్శలు గుప్పించారు.

అప్పటిదాకా సినిమా మీద ఉన్న భారీ అంచనాలను ఒక్కసారిగా తగ్గించేసింది ఆ ఫస్ట్ లుక్. ఆ నెగెటివిటీ చూసి చిత్ర బృందం కూడా కంగారు పడి ఉంటే ఆశ్చర్యం లేదు. ప్రభాస్ అభిమానులకైతే మళ్లీ 'ఆదిపురుష్' టీజర్ రోజులు గుర్తుకు వచ్చాయి.

ఈ సినిమా కూడా తేడా కొడుతుందా అన్న డౌట్లు కూడా కొట్టేశాయి వాళ్లకు. కానీ ఈ భయాలన్నీ ఒక్క రోజు వ్యవధిలో దూదిపింజల్లా తేలిపోయాయి. నెగెటివిటీనంతా వాషౌఃట్ చేస్తూ గురువారం అర్ధరాత్రి రిలీజ్ చేసిన 'ప్రాజెక్ట్-కే' ఫస్ట్ గ్లింప్స్ అభిమానులతో పాటు సామాన్య ప్రేక్షకులనూ మెస్మరైజ్ చేసింది.

'కల్కి 2898 ఏడీ' అనే టైటిల్‌తో రాబోతున్న ఈ చిత్రం ఫస్ట్ గ్లింప్స్‌తో నూటికి నూరు మార్కులు వేయించుకుంది. భారతీయ వెండితెరపై ఒక అద్భుతాన్ని చూడబోతున్న ఫీలింగ్‌ను కలిగించింది. ప్రతి షాట్‌లోనూ హాలీవుడ్ సినిమా ఫీల్స్ వచ్చాయి.

ప్రభాస్ లుక్స్, తన అప్పీయరెన్స్ మామూలుగా లేదు. ఇది కదా మాకు కావాల్సింది అనుకున్నారు ప్రభాస్ ఫ్యాన్స్ ఫస్ట్ గ్లింప్స్ చూసి. సినిమా మీద పెట్టుకున్న భయాలన్నీ కూడా ఎగిరిపోయి.. కాలర్ ఎగరేస్తున్నారు ప్రభాస్ ఫ్యాన్స్. 'కల్కి 2898 ఏడీ'కి సంబంధించి ఇదొక పెద్ద ట్విస్ట్ లాగా ఫీలవుతున్నారు ఫ్యాన్స్.

ఇంత మంచి టీజర్ చేతిలో పెట్టుకుని అంత సాధారణమైన ఫస్ట్ లుక్‌ను నాగ్ అశ్విన్ అండ్ టీం ఎలా రిలీజ్ చేసిందో జనాలకు అర్థం కావడం లేదు. కావాలని అంచనాలు తగ్గించి.. ఆ తర్వాత టీజర్‌తో ఆశ్చర్యపరచడానికే ఇలా చేశారా అని సందేహిస్తున్న వాళ్లూ ఉన్నారు. ఏదైతేనేం.. టీజర్‌ వచ్చాక ఈ సినిమా మీద అంచనాలు మళ్లీ పతాక స్థాయికి చేరిపోయాయన్నది వాస్తవం.