కల్కి కమల్.. ఎక్కడ చూసినా ఇదే టాపిక్!

పాన్ ఇండియా స్టార్ ప్రభాస్ మోస్ట్ అవైటెడ్ మూవీ కల్కి 2898 ఏడీ రిలీజ్ కు సర్వం సిద్ధమవుతోంది. విడుదల తేదీ దగ్గర పడుతుండడంతో మేకర్స్ ప్రమోషన్స్ స్పీడ్ గా నిర్వహిస్తున్నారు. ఆడియన్స్ దృష్టిని తమ వైపు తిప్పుకునేందుకు అన్ని విధాల ప్రయత్నిస్తున్నారు. ప్రీ లూడ్ వీడియోస్ తో మంచి బజ్ క్రియేట్ చేస్తున్నారు. ఇప్పటికే ఫస్ట్ ట్రైలర్ తో అంచనాలు పెంచేసిన మేకర్స్.. సెకండ్ ట్రైలర్ తో ఆకాశాన్ని తాకేలా చేశారు.

ఇక సెకండ్ ట్రైలర్ విజువల్ ఫీస్ట్ గా అదిరిపోయింది. ట్రైలర్ ను మేకర్స్ అద్భుతంగా కట్ చేశారు. ప్రభాస్, అమితాబ్ బచ్చన్, దీపికా పదుకొణె, శోభనను చూపించారు. మాళవిక నాయర్ ను సర్ప్రైజింగ్ గా రివీల్ చేశారు. దీంతో సినిమాలో అనేక మంది భాగమైనట్లు తెలుస్తోంది. ఇక సెకండ్ ట్రైలర్.. సోషల్ మీడియాలో సంచలనం సృష్టిస్తోంది. అదే సమయంలో అందరి దృష్టి... విలక్షణ నటుడు కమల్ హాసన్ పైనే నెలకొంది.

కల్కిలో ది సుప్రీం యాస్కిన్‌ గా నటిస్తున్న కమల్ లుక్ చూస్తే ఎవరూ కూడా ఆయన గుర్తుపట్టలేరు. అంతలా తన పాత్ర కోసం మేకోవర్ చేసుకున్నారాయన. దీంతో కమల్ డెడికేషన్ పట్ల ఇప్పుడు సర్వత్రా ప్రశంసలు కురుస్తున్నాయి. మంచి అవుట్ పుట్ కోసం ఎంత హార్డ్ వర్క్ అయినా కమల్ ఈజీగా చేస్తారని గుర్తు చేసుకుంటున్నారు. 69 ఏళ్ల వయసులో కూడా ఆయన అంకిత భావం వేరే లెవల్ లో ఉందని నెటిజన్లు చెబుతున్నారు.

ప్రస్తుతం ఎక్కడ చూసినా కమల్ కోసమే చర్చ నడుస్తోంది. ఈ సినిమాలో ప్రభాస్ భైరవగా నటిస్తున్నప్పటికీ.. కల్కిగా మారుతాడని ఎప్పటి నుంచో టాక్ వినిపిస్తోంది. మరి కల్కికి విరోధి అయిన కలి రోల్ లో ఎవరు నటించారనే డిస్కషన్ ఇప్పుడు జరుగుతోంది. ఆ పాత్ర కూడా కమల్ చేస్తున్నారని కొందరు చెబుతున్నారు. ఇటీవల ముంబైలో జరిగిన ఈవెంట్ లో తాను సినిమాలో బ్యాడ్ మ్యాన్ గా కనిపిస్తానని తెలిపారు కమల్.

సినిమాలో తన లుక్ విభిన్నంగా ఉండాలని ముందే డిసైడ్ అయినట్లు చెప్పారు. మూవీకి సంబంధించిన ఏ విజువల్స్ కూడా తాను చూడలేదని వెల్లడించారు. కొత్త గెటప్ కోసం రీసెర్చ్ చేస్తే.. ఆ లుక్ లో అమితాబ్ నటిస్తున్నారని మేకర్స్ తనకు చెప్పారని తెలిపారు. మరో లుక్ చూస్తే.. ప్రభాస్ అందులో కనిపించనున్నారని చెప్పారని అన్నారు. చివరకు తన లుక్ సెట్ అయిందని పేర్కొన్నారు. మరి మూవీ రిలీజ్ అయ్యాక.. కమల్ తన రోల్ లో ఎలా మెప్పిస్తారో చూడాలి.