కళ్యాణ్ రామ్‌ కోసం సుక్కు అండ్‌ టీమ్‌?

టాలీవుడ్‌ స్టార్‌ డైరెక్టర్ సుకుమార్‌ ప్రస్తుతం అల్లు అర్జున్‌ తో పుష్ప 2 ను ముగించే పనిలో ఉన్నాడు. ఒక వైపు దర్శకత్వం చేస్తూనే మరో వైపు సుకుమార్‌ నిర్మాణ భాగస్వామిగా వరుస సినిమాలను ప్రేక్షకుల ముందుకు తీసుకు వస్తున్నాడు. ఆయన సొంత బ్యానర్‌ సుకుమార్ రైటింగ్స్ ద్వారా కొత్త వారిని ఎంకరేజ్‌ చేస్తున్నాడు. ముఖ్యంగా తన శిష్యులకు అవకాశాలు ఇస్తున్న సుకుమార్‌ మరో కొత్త ప్రాజెక్ట్‌ కు చర్చలు జరుపుతున్నట్లుగా సమాచారం అందుతోంది. ఈసారి నందమూరి కళ్యాణ్ రామ్‌ హీరోగా సుకుమార్‌ రైటింగ్స్ బ్యానర్లో సినిమా రాబోతున్నట్లుగా ప్రచారం జరుగుతోంది.

సుకుమార్‌ తన శిష్యుడు సూర్య ప్రతాప్‌ దర్శకత్వంలో కుమారి 21 ఎఫ్‌ అనే సినిమాను నిర్మించాడు. ఆ తర్వాత మరో శిష్యుడు బుచ్చిబాబు దర్శకత్వంలో ఉప్పెన సినిమాను మైత్రి మూవీ మేకర్స్‌ వారితో కలిసి నిర్మించాడు. ఆయన నిర్మాతగా మాత్రమే కాకుండా కథ మరియు స్క్రీన్‌ ప్లే లో ఆయన మార్క్‌ ఉంటుంది. ఏదో ఒక సమయంలో సుకుమార్‌ సినిమా మేకింగ్‌ లో వేలు పెడతాడని, అందుకే ఆయన నిర్మాణంలో సినిమాలు కూడా అంత బాగుంటాయని ఇండస్ట్రీ లో మరియు మీడియా వర్గాల్లో ప్రచారం ఉంది.

కళ్యాణ్ రామ్‌ ప్రస్తుతం ప్రదీప్ చిలుకూరి దర్శకత్వంలో ఒక సినిమాను చేస్తున్నాడు. ఆ సినిమా ముగింపు దశకు చేరుకుంది. ఆ సినిమా విడుదల అవ్వడానికి ముందే సూర్య ప్రతాప్‌ దర్శకత్వంలో కళ్యాణ్ రామ్‌ సినిమా ప్రారంభం అయ్యే విధంగా ప్లాన్‌ చేస్తున్నారు. ఇప్పటి వరకు సినిమాకు సంబంధించిన అధికారిక ప్రకటన రాలేదు. కానీ సినీ వర్గాల్లో మరియు మీడియా సర్కిల్స్ లో జరుగుతున్న ప్రచారం ప్రకారం ఎన్టీఆర్‌ ఆర్ట్స్ బ్యానర్‌, సుకుమార్‌ రైటింగ్స్ బ్యానర్‌ లు సంయుక్తంగా కళ్యాణ్‌ రామ్‌, సూర్య ప్రతాప్‌ ల కాంబో మూవీ ని నిర్మించే అవకాశాలు ఉన్నాయి.

గత చిత్రాల మాదిరిగానే ఈ సినిమా కి కూడా సుకుమార్‌ మరియు ఆయన టీం మెంబర్స్‌ కథ మరియు స్క్రిప్ట్‌ వర్క్‌ లో ఇన్వాల్వ్‌ అయ్యే అవకాశాలు ఉన్నాయనే వార్తలు వస్తున్నాయి. అధికారికంగా ఎలాంటి క్లారిటీ లేనప్పటికీ కళ్యాణ్ రామ్‌, సూర్య ప్రతాప్‌ కాంబో మూవీ గురించి అనేక రకాలుగా పుకార్లు షికార్లు చేస్తున్నాయి. ఇంతకు సినిమా ఎప్పుడు ప్రారంభం అవుతుంది, సినిమాలో సుకుమార్‌ నిర్మాణ భాగస్వామిగా ఉంటాడా, తద్వారా కథపై తనదైన ముద్రను ఆయన వేస్తాడా అనేది సినిమా ప్రారంభం అయితే క్లారిటీ వచ్చే అవకాశం ఉంది.