మోక్షజ్ఞ కోసం తారక్, కళ్యాణ్ రామ్.. పవర్ఫుల్ సపోర్ట్

నందమూరి కుటుంబం నుంచి మరో హీరో టాలీవుడ్ లోకి ఎంట్రీ ఇచ్చిన విషయం తెలిసిందే. బాలకృష్ణ కుమారుడు మోక్షజ్ఞ తెరంగేట్రం చేసేశారు. నందమూరి ఫ్యాన్స్ ఎప్పటి నుంచో ఎదురుచూస్తున్న సమయం రానే వచ్చింది. దీంతో బాలయ్య అభిమానులు ఫుల్ ఖుషీగా ఉన్నారు. హనుమాన్ మూవీతో సూపర్ హిట్ అందుకున్న ప్రశాంత్ వర్మ డైరెక్షన్ లో మోక్ష‌జ్ఞ తన తొలి సినిమాను చేయబోతున్నారు.

అందుకు సంబంధించిన అనౌన్స్మెంట్ నేడు వచ్చిన సంగతి తెలిసిందే. మోక్షు బర్త్ డే సందర్భంగా దర్శకుడు ప్రశాంత్ వర్మ.. అధికారికంగా ప్రకటించారు. "సినిమా ప్రపంచంలోకి ప్రవేశించినందుకు అభినందనలు! నీ జీవితంలో కొత్త అధ్యాయాన్ని ప్రారంభించేటప్పుడు తాతగారితో పాటు అన్ని దైవ శక్తులు నీపై ఆశీస్సులు కురిపించాలని కోరుకుంటున్నాను!" అంటూ ట్వీట్ చేసి ఫస్ట్ లుక్ ను రిలీజ్ చేశారు.

దీంతో మోక్షు బాబుకు బర్త్ డే తో పాటు తెరంగేట్ర విషెస్ అంతా చెబుతున్నారు. బెస్ట్ ఆఫ్ లక్ అని కామెంట్లు పెడుతున్నారు. అదే సమయంలో నందమూరి హీరోలు జూనియర్ ఎన్టీఆర్, కళ్యాణ్ రామ్ కూడా సోషల్ మీడియాలో విషెస్ తెలియజేశారు. సినీ రంగంలో అడుగుపెడుతున్న తమ తమ్ముడు మోక్ష‌జ్ఞ‌కు అభినంద‌న‌లు తెలిపారు నందమూరి బ్రదర్స్. ఫస్ట్ లుక్ కూడా పోస్ట్ చేశారు. ప్రస్తుతం వారి పోస్టులు నెట్టింట వైరల్ గా మారాయి.

"సినీ ప్ర‌పంచంలోకి అడుగుపెడుతున్నందుకు కంగ్రాట్స్. జీవితంలో కొత్త అధ్యాయాన్ని ప్రారంభిస్తున్న క్ర‌మంలో మీకు అన్ని దైవిక శ‌క్తులతో పాటు తాత‌య్య గారి ఆశీర్వాదంతో ఉంటుంది" అని ఎన్టీఆర్ ట్వీట్ చేశారు. "టిన్ సెల్ టౌన్ మోక్షుకు స్వాగతం !! తాతగారి ప్రతిష్ఠ నిలబెట్టే ఎత్తుకు నువ్వు ఎదగాలని మనస్ఫూర్తిగా కోరుకుంటున్నాను. నీకు పుట్టినరోజు శుభాకాంక్షలు!!" అని కళ్యాణ్ రామ్ ట్వీట్ చేశారు.

ఇక మోక్షజ్ఞ డెబ్యూ మూవీ విషయానికొస్తే.. సోషల్ ఫాంటసీ జోనర్ లో తెరకెక్కనున్నట్లు తెలుస్తోంది. నందమూరి తేజస్విని సమర్పణలో సుధాకర్ చెరుకూరి నిర్మాతగా వ్యవహరించనున్నారు. గాంఢీవ అనే టైటిల్ ను పరిశీలిస్తున్నట్లు వార్తలు వస్తున్నాయి. రెగ్యులర్ షూటింగ్ త్వరలోనే స్టార్ట్ కానున్నట్లు తెలుస్తోంది. అందుకు సంబంధించిన ఏర్పాట్లు జరుగుతున్నాయి. మరి మోక్షు డెబ్యూ మూవీ పూర్తి వివరాలు ఎప్పుడొస్తాయో చూడాలి.