భారతీయుడు-2.. చరణ్ ఫ్యాన్స్ లో ఫుల్ టెన్షన్!

విలక్షణ నటుడు కమల్ హాసన్ నటించిన ఇండియన్-2 మూవీ రిలీజ్ కు సిద్ధమవుతున్న విషయం తెలిసిందే. 28 ఏళ్ల క్రితం వచ్చి సూపర్ హిట్ అయిన భారతీయుడు మూవీకి సీక్వెల్ గా వస్తున్న ఈ సినిమా.. జులై 12వ తేదీన రిలీజ్ కానుంది. కోలీవుడ్ స్టార్ డైరెక్టర్ శంకర్ దర్శకత్వం వహిస్తున్న ఈ మూవీలో సిద్ధార్థ్, కాజల్, రకుల్ ప్రీత్ సింగ్, ప్రియా భవానీ శంకర్ కీలక పాత్రలు పోషిస్తున్నారు. ఎన్నో ఆటంకాల మధ్య కొన్నేళ్లుగా షూటింగ్ జరుపుకున్న ఈ మూవీపై కమల్ ఫ్యాన్స్ లో మంచి అంచనాలే ఉన్నాయి.

ఇక మేకర్స్ నిన్న ట్రైలర్ ను రిలీజ్ చేసిన విషయం తెలిసిందే. స్వాతంత్ర్య సమరయోధుడు సేనాపతి రోల్ లో కమల్ హాసన్ కనిపించారు. యాక్షన్ సీక్వెన్స్ లో అదరగొట్టారు. కొన్ని డైలాగ్స్ చెప్పేటప్పుడు తన ఎక్స్ప్రెషన్స్ తో దంచేశారు. ఈ ఏజ్ లో కూడా షర్ట్ లెస్ యాక్షన్ తో అలరించారు. తన సిగ్నేచర్ స్టైల్ ను చూపించారు. అయితే ట్రైలర్ రిలీజ్ అయ్యాక మంచి రెస్పాన్స్ వచ్చినా.. ఆ తర్వాత కొందరు నెటిజన్లు తీవ్రంగా విమర్శించారు.

సామాజిక సమస్యలపై సినిమాలు తీయడంలో శంకర్ కు మంచి పట్టు ఉన్న విషయం నిజమే. అలా ఆయన తీసిన సినిమాలన్నీ మంచి హిట్ అయ్యాయి. కానీ ఇప్పుడు అంతా పరిస్థితి మారిపోయింది. సినీ ప్రియులు మైండ్ సెట్ పూర్తి చేంజ్ అయింది. దీంతో భారతీయుడు-2 వర్కౌట్ అవుతుందో లేదో డౌట్ గా ఉందని నెటిజన్లు చెబుతున్నారు. టెక్నికల్ అంశాలు పాతబడిపోయినట్లు కనిపిస్తున్నాయని అంటున్నారు.

శివాజీ, భారతీయుడు అంశాలతో ఇండియన్-2 ట్రైలర్ ఉన్నట్లు అనిపిస్తుందని చెబుతున్నారు. భారతీయుడు-1లో కమల్ క్యారెక్టర్ కు సీరియస్ నెస్ ఉందని, ఇప్పుడు సీక్వెల్ లో కాస్త స్పూఫ్ లా ఉందని విమర్శిస్తున్నారు. ఇండియన్-2 కాకుండా ఒక్క మగాడు-2 అని పెట్టాల్సి ఉందని ఫన్నీగా చెబుతున్నారు. 30 సంవత్సరాల క్రితం నాటి మేకప్ లా అనిపిస్తుందని అంటున్నారు. కొత్తగా ఆలోచించకుండా.. శంకర్ తన లెగసీని దెబ్బ తీసుకుంటున్నారని చెబుతున్నారు.

టాలీవుడ్, బాలీవుడ్ ను పక్కన పెడితే.. కోలీవుడ్ ఆడియన్స్ కూడా ఇండియన్-2 ట్రైలర్ పై పెదవి విరుస్తున్నట్లు టాక్ వినిపిస్తోంది. కమల్ ఓకే అయినా.. శంకర్ వర్క్ బాగోలేదని చెబుతున్నారు. ఇప్పుడు ఇది చూసిన రామ్ చరణ్ ఫ్యాన్స్ టెన్షన్ పడుతున్నారు. భారతీయుడు-2లో రొటీన్ కాన్సెప్ట్ కనిపిస్తోందని, మరి గేమ్ ఛేంజర్ పరిస్థితేంటోనని మాట్లాడుకుంటున్నారు. ఏదేమైనా భారతీయుడు-2 రిలీజ్ అయ్యాక.. శంకర్ ఎలా ప్రెజెంట్ చేశారన్నది తెలుస్తుంది.