'పుష్ప‌-2' లాంటి సినిమాలు మ‌న‌కు చేత కావా?

ఇటీవ‌ల రిలీజ్ అయిన 'పుష్ప‌-2' పాన్ ఇండియాలో ఎలాంటి సంచ‌ల‌నాలు న‌మోదు చేసిందో చెప్పాల్సిన ప‌నిలేదు. ముఖ్యంగా బాలీవుడ్ సినిమాల రికార్డుల‌నే తిర‌గ‌రాసింది. ఖాన్ లు..క‌పూర్ ల రికార్డుల‌ను వెన‌క్కి నెట్టేసి నెంబ‌వ‌ర్ వ‌న్ గా నిలిచింది. 'దంగ‌ల్' 2000 కోట్ల రికార్డుల‌ను సైతం తిర‌గ‌రాస్తుంద‌నే అంచ‌నాలున్నాయి. మ‌రో మూడు వారాలు ఇదే దూకుడు చూపిస్తే దంగ‌ల్ చ‌రిత్ర చిరిగిపోవ‌డం ఖాయ‌మ‌ని ట్రేడ్ అంచ‌నా వేస్తోంది.

ఇంత గొప్ప విజ‌యం సాధించినా? ఈ విజ‌యాన్ని బాలీవుడ్ స్పోర్టివ్ గా తీసుకున్న‌ట్లు క‌నిపించ‌లేదు. సినిమాకు అనుకున్న స్థాయిలో అక్క‌డ నుంచి అప్లాజ్ రావ‌డం లేదు. స్టార్ హీరోలు, అగ్ర నిర్మాణ సంస్థ‌లు పుష్ప‌-2 వసూళ్ల గురించి ప‌ట్ట‌న‌ట్లే వ్య‌వ‌హ‌రిస్తున్నారు? అన్న విమ‌ర్శ వ్య‌క్త‌మ‌వుతోంది. ఈ నేప‌థ్యంలో తాజాగా బాలీవుడ్ క్వీన్ కంగ‌నా రనౌత్ చేసిన వ్యాఖ్య‌లతో మండే మంట‌లో పెట్రోల్ పోసిన‌ట్లు అయింది.

మా బాలీవుడ్ వాళ్లు 'పుష్ప‌-2' లాంటి సినిమాలు తీయ‌లేరు. వీళ్ల‌కి కేవ‌లం బేబ్స్ అమ్మాయిలు-హీరోయిన్లు ఇంకా బీచ్ లు ఉంటే చాలు. ఇంకే అవ‌స‌రం లేదని వ్యాఖ్యానించిన‌ట్లు మీడియాలో ప్ర‌చారం జ‌రుగుతోంది. అలాగే బాగా ఫేమ‌స్ అవుతున్న వారిప‌ట్ల వివ‌క్ష‌తోనూ వ్య‌వ‌రిస్తార‌ని ఆరోపించింది. ఇప్పుడీ వ్యాఖ్య‌లు సోష‌ల్ మీడియాలో వైర‌ల్ గా మారాయి. టాలీవుడ్ ముందు బాలీవుడ్ ఏమాత్రం గొప్ప కాద‌న్న‌ట్లు ఫోక‌స్ అవుతుంది. బాలీవుడ్ పై కంగ‌న ఇలాంటి వ్యాఖ్య‌లు చేయ‌డం కొత్తేం కాదు. గ‌తంలోనూ ప‌రిశ్ర‌మ తీరును ఉద్దేశించి ఆస‌క్తిక‌ర వ్యాఖ్య‌లు చేసింది.

ఇప్ప‌టికే వ‌రుస పాన్ ఇండియా విజ‌యాల‌తో టాలీవుడ్ నెంబ‌ర్ వ‌న్ ఇండస్ట్రీగా దూసుకుపోతుంది. 'బాహుబ‌లి', 'ఆర్ ఆర్ ఆర్', 'స‌లార్', 'పుష్ప‌', 'కార్తికేయ‌-2', 'హ‌నుమాన్', 'సాహో', 'స‌లార్' లాంటి చిత్రాలు పాన్ ఇండియాలో ఎలాంటి విజ‌యాలు అందుకున్నాయో తెలిసిందే.