కంగువా.. ఫ్యాన్స్ హార్టయ్యారు

కోలీవుడ్ స్టార్ హీరో సూర్య నటిస్తున్న కంగువా మూవీ.. మరికొన్ని గంటల్లో ప్రేక్షకుల ముందుకు రానుంది. సిరుత్తై శివ దర్శకత్వం వహిస్తున్న ఆ సినిమా.. నవంబర్ 14వ తేదీన వరల్డ్ వైడ్ గా పదికి పైగా భాషల్లో రిలీజ్ కానుంది. అనేక ప్రాంతాల్లో 3డీ ఫార్మాట్ లో కూడా విడుదల అవ్వనుంది. పీరియాడికల్ యాక్షన్ డ్రామాగా రూపొందుతున్న కంగువాపై ఇప్పటికే ఆడియన్స్ లో భారీ అంచనాలు నెలకొన్నాయి.

సూర్య కోలీవుడ్ హీరోనే అయినా.. టాలీవుడ్ లో తనకంటూ స్పెషల్ ఫ్యాన్ బేస్ క్రియేట్ చేసుకున్నారు. ఆయన నటించిన సినిమాలన్నీ తెలుగులో రిలీజ్ అవుతాయి. ఇప్పుడు కంగువా కూడా భారీ స్థాయిలో విడుదల అవుతుంది. మిగతా కోలీవుడ్ స్టార్ హీరోల సినిమాలకు మించిన రేంజ్ లో రిలీజ్ కాబోతుంది. రెండు తెలుగు రాష్ట్రాల్లో కంగువా మార్నింగ్ 4 గంటల షోస్ పడుతున్నాయి. అడ్వాన్స్ బుకింగ్స్ కూడా స్పీడ్ గా జరుగుతున్నాయి.

కేరళ, కర్ణాటకలో కూడా కంగువా ఎర్లీ మార్నింగ్ షోస్ పడుతున్నాయి. కానీ తమిళనాడులో మాత్రం ఛాన్స్ లేదు. అక్కడి ప్రభుత్వం ఉదయం 4 గంటల షోలకు అనుమతులు ఇవ్వడం లేదు. దీంతో తమిళనాడుకు చెందిన సూర్య ఫ్యాన్స్ నిరాశ వ్యక్తం చేస్తున్నారు. ఆంధ్ర బోర్డర్ లో ఉన్న కొందరు.. ఏపీకి వచ్చి సినిమా చూడనున్నట్లు నెట్టింట చెబుతున్నారు. తమిళనాడులో వేసుంటే బాగుండేదిగా అని అంటున్నారు.

అయితే ఎర్లీ మార్నింగ్ షోస్ బదులు 9AM షోస్ కు తమిళనాడు సర్కార్ అనుమతులు ఇచ్చింది. దీంతో మేకర్స్ ఆ రాష్ట్రంలో ఐదు షోలు వేయనున్నారు. ఆ విషయంలో మేకర్స్.. రీసెంట్ గా ప్రభుత్వానికి కృతజ్ఞతలు కూడా తెలిపారు. అత్యంత భారీ బడ్జెట్ తో స్టూడియో గ్రీన్, యూవీ క్రియేషన్స్ బ్యానర్స్ పై కేఈ జ్ఞానవేల్ రాజా, వంశీ- ప్రమోద్ నిర్మిస్తున్న సినిమాకు దేవిశ్రీ ప్రసాద్ మ్యూజిక్ అందిస్తున్నారు.

బాలీవుడ్ బ్యూటీ దిశా పటానీ హీరోయిన్ గా నటిస్తున్నారు. ఆమె కంగువాతో కోలీవుడ్ లోకి ఎంట్రీ ఇస్తున్నారు. విలన్ గా బీటౌన్ స్టార్ బాబీ డియోల్ కనిపించనున్నారు. ఆయన యాక్ట్ చేస్తున్న ఫస్ట్ సౌత్ ఇండియన్ మూవీ కంగువా కావడం విశేషం. సినిమాలో హీరో కార్తితోపాటు మరికొందరు క్యామియో రోల్స్ పోషిస్తున్నట్లు తెలుస్తోంది. నేరుగా సిల్వర్ స్క్రీన్ పై సర్పైజ్ గా మేకర్స్ రివీల్ చేయనున్నారట.

తొలిసారి డైరెక్టర్ శివతో కంగువా కోసం వర్క్ చేసిన సూర్య.. సినిమాలో రెండు విభిన్నమైన పాత్రల్లో కనిపించనున్నారు. కంగ, ఫ్రాన్సిస్ రోల్స్ లో సందడి చేయనున్నారు. తమిళంలో మాత్రమే సూర్య డబ్బింగ్ చెప్పారు. మిగతా భాషల్లో ఏఐ ద్వారా డబ్బింగ్ చెప్పించారు. ముఖ్యంగా మూవీని పాన్ ఇండియా రేంజ్ లో వేరే లెవెల్ లో ప్రమోట్ చేశారు సూర్య. మరి ఎలాంటి హిట్ అందుకుంటారో వేచి చూడాలి.