మరో రెండు వారాల్లో సినిమా రిలీజ్.. ఇంతలోనే విషాదం!

సినీ ఇండస్ట్రీలో తీవ్ర విషాదం చోటు చేసుకుంది. 'కంగువ' సినిమా ఎడిటర్ నిషాద్ యూసుఫ్ కన్నుమూశారు. 43 ఏళ్ల నిషాద్‌ తన ఫ్లాట్‌లో బుధవారం తెల్లవారుజామున విగతజీవిగా కనిపించారు. విషయం తెలుకున్న పోలీసులు వెంటనే సంఘటనా స్థలానికి చేరుకుని విచారణ ప్రారంభించారు. కొచ్చిలోని పనంపల్లి నగర్‌లోని నివాసముంటున్న నిషాద్‌.. తన అపార్ట్‌మెంట్‌లోనే కన్నుమూసినట్లు పోలీసులు తెలిపారు.

నిషాద్ యూసుఫ్ మరణ వార్తతో సినీ ఇండస్ట్రీలో విషాద ఛాయలు నెలకొన్నాయి. ఆయన ఆకస్మిక మృతికి గల కారణాలు తెలియాల్సి ఉంది. అయితే నిషాద్ ఆత్మహత్య చేసుకున్నాడని పోలీసులు అనుమానిస్తున్నారని వార్తలు వస్తున్నాయి. ప్రస్తుతం ఆయన చేతిలో అనేక క్రేజీ ప్రాజెక్ట్స్ ఉన్నాయి. మరికొన్ని రోజుల్లో 'కంగువ' సినిమా విడుదల కాబోతున్న సమయంలో ఇలా జరగడం అందర్నీ కలచివేస్తోంది. నిషాద్ నిజంగానే ఆత్మహత్య చేస్తున్నాడా? అదే నిజమైతే అన్ని ఆఫర్స్ చేతిలో ఉన్నప్పుడు ఎందుకు ఆత్మహత్య చేసుకోవాల్సి వచ్చింది? అని సినీ అభిమానులు ఆలోచిస్తున్నారు.

మలయాళం, తమిళ చిత్ర పరిశ్రమలో ఫిల్మ్ ఎడిటర్‌గా మంచి పేరు తెచ్చుకున్నారు నిషాద్ యూసుఫ్. ఆయనకు భార్య, ఇద్దరు పిల్లలు ఉన్నారు. నిషాద్ మరణవార్తను ఫిల్మ్ ఎంప్లాయీస్ ఫెడరేషన్ ఆఫ్ కేరళ ధృవీకరించింది. ఆయన అకాల మరణం సినీ ఇండస్ట్రీలో తీవ్ర విషాదం నింపిందని ఫెఫ్కా తన అధికారిక ఫేస్‌బుక్ అకౌంట్ లో విచారం వ్యక్తం చేసింది.

హరిప్పాడ్‌కు చెందిన నిషాద్ యూసుఫ్ తన వినూత్న ఎడిటింగ్ శైలితో తనకంటూ ప్రత్యేకమైన గుర్తింపు తెచ్చుకున్నారు. 2022లో ‘తల్లుమాల’ చిత్రానికి గాను ఉత్తమ ఎడిటర్‌గా కేరళ స్టేట్ అవార్డును అందుకున్నారు. సూర్య హీరోగా నటించిన 'కంగువ' సినిమాకు నిషాద్ ఎడిటర్ గా పని చేశారు. దీని తర్వాత ఆర్జే బాలాజీ దర్శకత్వంలో సూర్య హీరోగా నటించనున్న Suriya45 చిత్రానికి కుడా నిషాద్ ఎడిటర్ గా ఎంపికయ్యారు.

సౌదీ వెల్లక్క, ఉండ, వన్, అడియోస్ అమిగోస్ వంటి చిత్రాలకు నిషాద్‌ యూసుఫ్ ఎడిటర్ గా వర్క్ చేసారు. ప్రస్తుతం మమ్ముట్టి హీరోగా తెరకెక్కుతున్న 'బజూకా' సినిమాకు నిషాద్‌ యూసుఫ్ ఎడిటింగ్ బాధ్యతలు నిర్వహిస్తున్నారు. వచ్చే నెల 14న 'కంగువ' సినిమా విడుదల అవుతుండగా.. ఇంతలోనే ఆయన ఈ లోకాన్ని విడిచి వెళ్లడం అందరినీ బాధిస్తోంది. చివరగా 'కంగువ' ప్రీరిలీజ్ ఈవెంట్ లో సూర్య, బాబీ డియోల్ లతో నిషాద్ దిగిన సెల్ఫీ.. ఆర్జే బాలాజీతో తీసుకున్న ఫోటోలు ఇప్పుడు సోషల్ మీడియాలో వైరల్ అవుతున్నాయి.