క్లిక్‌ క్లిక్‌ : జ్యోతిర్లింగాల యాత్రలో 'కన్నప్ప' టీం

మంచు విష్ణు ప్రధాన పాత్రలో నటిస్తూ భారీ బడ్జెట్‌తో నిర్మిస్తున్న 'కన్నప్ప' సినిమా షూటింగ్‌ పూర్తి చేసుకుని ప్రస్తుతం పోస్ట్‌ ప్రొడక్షన్ వర్క్‌ జరుపుకుంటోంది. డిసెంబర్‌లో సినిమాను విడుదల చేయాలని మొదట భావించినప్పటికీ వర్క్‌ విషయంలో రాజీ పడకుండా చేస్తూ ఉండటంతో ఆలస్యం అయిందట. దాంతో సినిమాను వచ్చే ఏడాది ఏప్రిల్‌ 25న ప్రేక్షకుల ముందుకు తీసుకు వచ్చేందుకు నిర్ణయించారు. ఇటీవలే కొత్త విడుదల తేదీని అధికారికంగా మేకర్స్ ప్రకటించారు. ఈ సినిమా ప్రమోషన్‌లో భాగంగా చిత్ర యూనిట్‌ సభ్యులు పన్నెండు జ్యోతిర్లింగాలు దర్శించుకోవడం జరుగుతుంది.

మంచు విష్ణు తాజాగా కన్నప్ప యూనిట్‌ సభ్యుల జ్యోతిర్లింగాల యాత్ర ఫోటోలను షేర్‌ చేయడం జరిగింది. ఎక్స్‌లో మంచు విష్ణు... మా పన్నెండు జ్యోతిర్లింగాల యాత్రలో భాగంగా కన్నప్ప బృందం ఉజ్జయినిలోని పవిత్రమైన శ్రీ మహాకాళేశ్వర్‌ ఆలయాన్ని సందర్శించడం జరిగింది. అక్కడే మేము కన్నప్ప సినిమా కొత్త విడుదల తేదీని అధికారికంగా ప్రకటించాము. ఆ తర్వాత మేము ఓంకారేశ్వర్‌ ఆలయాన్ని సైతం ధర్శించి ఆశీర్వాదాలు పొందాము అన్నారు. చిత్ర ప్రమోషన్‌లో భాగంగా కన్నప్ప టీం దేశంలోని ఆధ్యాత్మిక దేవాలయాలను సందర్శించడం బాగుంది అంటూ కొందరు అభిప్రాయం వ్యక్తం చేస్తున్నారు.

ముఖేశ్‌ కుమార్‌ సింగ్‌ దర్శకత్వంలో మంచు విష్ణు ఈ సినిమాను దాదాపుగా రూ.100 కోట్లకు పైగా బడ్జెట్‌తో నిర్మించడం జరిగింది. భారీ అంచనాల నడుమ రూపొందిన ఈ సినిమాలో ప్రభాస్‌తో పాటు ఇంకా ఎంతో మంది ప్రముఖ నటీ నటులు ముఖ్య పాత్రల్లో, గెస్ట్ పాత్రల్లో కనిపించబోతున్నారు. మంచు విష్ణు ఈ సినిమా కోసం చాలా కష్టపడ్డారు. ఆయన డ్రీమ్‌ ప్రాజెక్ట్ కావడంతో ఈ సినిమాను ఆయన ప్రతిష్టాత్మకంగా తీసుకుని నిర్మిస్తున్నారు. గత సినిమాల ఫలితాలను పట్టించుకోకుండా ఈ సినిమాకు వంద కోట్లకు పైగా ఖర్చు చేయడం అనేది కచ్చితంగా అతి పెద్ద సాహస నిర్ణయం అనుకోవచ్చు.

తెలుగులో మాత్రమే కాకుండా పాన్ ఇండియా స్థాయిలో ఈ సినిమాను విడుదల చేయడం కోసం ఏర్పాట్లు జరుగుతున్నాయి. గత చిత్రాల మాదిరి కాకుండా ఈ సినిమాతో మంచు విష్ణు చాలా విభిన్నమైన ప్రమోషన్స్‌ చేస్తున్నాడు. అంతే కాకుండా తన తండ్రి మోహన్‌ బాబుతో ఈ సినిమాలో కీలకమైన పాత్రను చేయించడం ద్వారా మరింత ప్రేక్షకుల దృష్టిని ఆకర్షించడంలో సక్సెస్‌ అయ్యాడు. ప్రస్తుతం సినిమా పోస్ట్‌ ప్రొడక్షన్ వర్క్‌ జరుపుతూ ఉన్నారు. ఈ సినిమాలో హీరోయిన్‌గా జోషితా అనోలా నటిస్తూ ఉండగా నయనతార, కాజల్‌ అగర్వాల్‌ లు గెస్ట్‌ అప్పియరెన్స్ ఇచ్చారు. త్వరలోనే సినిమా నుంచి టీజర్‌ విడుదల చేస్తారనే వార్తలు వస్తున్నాయి.