`కాంతార` ప్రీక్వెల్‌తో మ‌ళ్లీ అదే మ్యాజిక్ సాధ్య‌మేనా?

జాన‌ర్ బ్లెండ్ క‌ల్ట్ సినిమాల‌కు ప్ర‌జ‌ల్లో చ‌క్క‌ని ఆద‌ర‌ణ ద‌క్కుతోంది. రొటీన్ కి భిన్న‌మైన కంటెంట్ ఇస్తే పాన్ ఇండియా స్థాయిలో విజ‌యం సాధ్య‌మ‌ని నిరూప‌ణ అవుతోంది. బాహుబ‌లి 1, బాహుబ‌లి 2, కేజీఎఫ్ ఫ్రాంఛైజీ, పుష్ప, కాంతార చిత్రాలు అందుకు ఉదాహ‌ర‌ణ‌లు. వీటిలో క‌న్న‌డ రంగం నుంచి వ‌చ్చిన కాంతార ఎలాంటి అంచ‌నాలు లేకుండా వ‌చ్చి సంచ‌ల‌నాలు సృష్టించింది. ప‌రిమిత బ‌డ్జెట్ తో ద‌ర్శ‌క‌న‌టుడు రిష‌బ్ శెట్టి ప్ర‌య‌త్నాన్ని దేశవ్యాప్తంగా సినీప్రియులు ప్ర‌శంసించారు. కాంతార ఘ‌న‌విజ‌యంలో ఎంపిక చేసుకున్న కాన్సెప్ట్- థీమ్- న‌టీన‌టుల ప్ర‌ద‌ర్శ‌న‌ ప్ర‌తిదీ కీల‌క భూమిక పోషించాయి.

కాంతార ఘ‌న‌విజయం త‌ర్వాత దీనికి ప్రీక్వెల్ ని తెర‌కెక్కిస్తామ‌ని రిష‌బ్ శెట్టి ప్ర‌క‌టించారు. తాజా స‌మాచారం మేర‌కు కాంతార 2 డిసెంబర్‌లో ప్రారంభమవుతుంద‌ని స‌మాచారం. కాంతారాకు ఇది సీక్వెల్ కాదు. ప్రీక్వెల్ క‌థ‌తో రూపొంద‌నుంది. ఈ చిత్రం క‌థాంశం క్రీ.శ. 301-400 కాలంలో జ‌రుగుతుంది. కాంతార‌లో చూపించిన పంజుర్లీ దైవం మూలాలకు సంబంధించిన క‌థపై ప్రీక్వెల్ తెర‌కెక్క‌నుంది. కంటెంట్, ప్ర‌ద‌ర్శ‌న‌లు ఆశ్చ‌ర్య‌ప‌రుస్తాయ‌ని చెబుతున్నారు.

రిష‌బ్ తన గ్రామంలో కొత్తగా నియమించిన ఫారెస్ట్ ఆఫీసర్‌తో త‌ల‌ప‌డే, ఘ‌ర్ష‌ణ ప‌డే కంబాల (గేదెల పందెం) ఛాంపియన్ పాత్రను పోషించాడు. ప్ర‌జ‌ల భూమిని రక్షించే స్థానిక దేవత కథానాయకుడి ఆత్మ‌తో ఎలా మ‌మేకం అయ్యింది? అనేది పార్ట్ 1లో చూపించారు. కాంతార‌ ప్రేక్షకులకు ఆధ్యాత్మిక దృక్పథంతో పాటు సినిమాటిక్ అనుభూతిని కూడా అందించింది. ప్రీక్వెల్ మూవీ కూడా ఒరిజినల్ తరహాలోనే సినిమాటిక్ ఎక్స్ పీరియన్స్ ను అందిస్తుందని టీమ్ స‌భ్యులు అంటున్నారు.

`కాంతార 2` హైబ‌డ్జెట్‌తో..

`కాంతార 2` కి ఒరిజిన‌ల్ కి ప‌ని చేసిన ప్రధాన సిబ్బంది మెజారిటీ భాగం ప‌ని చేస్తారు. కాస్టింగ్ వివ‌రాలు ఇంకా వెల్లడించలేదు. కాంతార 2 అసలు చిత్రం కంటే భారీ కాన్వాస్ తో తెర‌కెక్కుతుంది. కాంతార‌ సినిమా బడ్జెట్ కంటే 681 శాతం ఎక్కువ బడ్జెట్‌తో ఈ సినిమా రూపొందుతోంద‌ని టాక్ వినిపించింది. హోంబలే ఫిలింస్ నిర్మిస్తున్న ఈ చిత్రం నవంబర్ నెలాఖరు లేదా డిసెంబ‌ర్‌లో పూజా కార్యక్రమాలను నిర్వహించే అవకాశం ఉందని గుస‌గుస‌లు వినిపిస్తున్నాయి. అంతేకాకుండా, రిషబ్ శెట్టి కాంతారావు 2 చిత్రీకరణను 2024లో పూర్తి చేసి, వచ్చే ఏడాది చివరిలో విడుదల చేసే అవకాశం ఉందని చెబుతున్నారు.

కాంతార 2022లో విడుద‌లైన బ్లాక్ బ‌స్ట‌ర్ చిత్రం. దీనిని రిషబ్ శెట్టి స్వీయ‌ రచన, దర్శకత్వంలో తెర‌కెక్కించారు. ఇది పూర్తి యాక్షన్ థ్రిల్లర్. ఈ చిత్రంలో రిష‌బ్ రెండు షేడ్స్ ఉన్న పాత్ర‌లో న‌టించి మెప్పించారు. ఇప్పుడు ప్రీక్వెల్ లో అంత‌కుమించి న‌ట‌న‌కు స్కోప్ ఉంద‌ని కూడా చెబుతున్నారు. అలాగే రిషబ్ శెట్టి మునుముందు ప‌రిశ్ర‌మ అగ్ర‌హీరో శివ రాజ్‌కుమార్‌తో కలిసి పనిచేయాలని భావిస్తున్నాన‌ని కూడా గ‌తంలో తెలిపారు. కాంతార 2తో మ‌ళ్లీ బాక్సాఫీస్ వ‌ద్ద రిష‌బ్ అదే మ్యాజిక్ ని రిపీట్ చేస్తాడేమో చూడాలి.