పార్ట్ 1 - 15 కోట్లు, పార్ట్ 2 - 125 కోట్లు... లెక్క అదుర్స్ కదూ!

గత ఏడాది బాక్సాఫీస్ వద్ద అనూహ్య విజయాన్ని అందుకున్న భారతీయ సినిమాల్లో కాంతార చిత్రం ఒకటి... కేవలం 15 కోట్ల బడ్జెట్‌తో రూపొందిన ఈ చిత్రం బాక్సాఫీస్ వద్ద సంచలన కలెక్షన్లను రాబట్టింది. పాన్ ఇండియా స్థాయిలో ఈ చిత్రం విజ‌యం సాధించ‌డం ఆశ్చ‌ర్యం క‌లిగించింది. కాంతార తెలుగులోనూ అనూహ్యమైన కలెక్షన్లు రాబట్టింది. తెలుగు ప్రేక్ష‌కుల నుంచి 29.50 కోట్ల రేంజ్ భారీ షేర్ ని రాబట్టడం ఒక సంచ‌ల‌నం. ఈ సినిమా టోటల్ వరల్డ్ వైడ్ గా 401 కోట్ల మార్క్ ని క్రాస్ చేసి సంచలన కలెక్షన్స్ తో దుమ్ము రేపింది.

ఈ సినిమా ప్రీక్వెల్ ని గత ఏడాది ప్రకటించారు. త్వరలో రెగ్యులర్ షూటింగ్ ప్రారంభం కానున్న ఈ సినిమా కథ, పార్ట్ 1 క‌థ‌ ప్రారంభం కాకముందు కథగా ఉంటుందని మేకర్స్ తెలిపారు. మీరు ఆల్ రెడీ సీక్వెల్ చూసారు...అని రిష‌బ్ శెట్టి అన‌డం మ‌రో బిగ్ స‌ర్ ప్రైజ్.

అందుకే ఇక‌పై మనం చూడబోయేది ప్రీక్వెల్ అయితే దానికోసం ఎంత బ‌డ్జెట్ పెడుతున్నారు? అన్న చ‌ర్చా మొద‌లైంది. రీసెంట్ గా రిలీజ్ అయిన ఈ సినిమా ఎనౌన్స్ మెంట్ టీజర్ కు ఊహించనంత రెస్పాన్స్ రావడంతో సినిమాపై ఓ రేంజ్ లో హైప్ పెరిగిపోయింది. పరిశ్రమలో బడ్జెట్ లెక్కలపైనా ఆరాలు మొద‌ల‌య్యాయి. మొదటి భాగం 15 కోట్లతో రూపొందించారు. ఇప్పుడు సీక్వెల్ పై హైప్ భారీ స్థాయిలో ఉంది. 125 కోట్ల బడ్జెట్‌తో సినిమా రూపొందబోతుండగా ఎక్కడా కాంప్రమైజ్ కాకుండా భారీ స్థాయిలో ఈ చిత్రాన్ని నిర్మించబోతున్నారు.

15 కోట్లతో తెర‌కెక్కి 400 కోట్లు వ‌సూలు చేసింది కాంతార‌. పెట్టిన పెట్టుబ‌డికి కొన్ని రెట్లు లాభాలు ద‌క్కాయి. అందుకే ఇప్పుడు 125 కోట్లతో రూపొందబోతున్న పార్ట్ 2 (ప్రీక్వెల్) బాక్సాఫీస్ వద్ద దుమ్ము లేపి రికార్డులు సృష్టిస్తుందని భావిస్తున్నారు. ప్రీక్వెల్ తో అంతా అనుకున్న‌ది అనుకున్న‌ట్టు జ‌రుగుతుంద‌నే ఆశిద్దాం.