రోడ్డుపై కెఏ పాల్ పొలిశెట్టి.. ఊహించని కాంబో..

ఇద్దరు సెలబ్రిటీ ఒక చోట కలిసినా, ఒకే స్టేజ్​ పంచుకున్నా అక్కడ ఎంతటి సందడి ఉంటుందో తెలిసిన విషయమే. అభిమానులు, అక్కడి జనాలు గూమిగుడిపోయి సందడి వాతావరణం క్రియేట్ అవుతోంది. ఇప్పుడు వైజాగ్​లోని ఓ పబ్లిక్ ప్లేస్​లో ఇదే జరిగింది. టాలీవుడ్ యంగ్ హీరో నవీన్ పోలిశెట్టి- ప్రజాశాంతి పార్టీ అధ్యక్షుడు కేఏ పాల్‌ ఒకేచోట కనిపించి అభిమానుల్లో జోష్ నింపారు. దీంతో అక్కడ ఉన్న వారంతా రచ్చ రచ్చ చేశారు.

నవీన్​ పోలిశెట్టి.. యూత్‌లో క్రేజ్‌ ఉన్న హీరోల్లో ఆయన ఒకరు. ఈ యంగ్ హీరో ఆన్​ స్క్రీన్​పై ఏ రేంజ్​లో సందడి చేస్తారో.. ఆఫ్​ స్క్రీన్​పైనా అదే రేంజ్​లో నవ్వులు పంచుతుంటారు. ఇప్పుడు తన కొత్త చిత్రం మిస్‌ శెట్టి మిస్టర్‌ పొలిశెట్టి ప్రమోషన్స్​లో భాగంగా కొన్ని రోజుల నుంచి ఆంధ్రప్రదేశ్‌లోని పలు నగరాల్లో ఆయన పర్యటిస్తున్నారు. అలా అక్కడి మాల్స్‌, కాలేజ్‌లీకు వెళ్లి ఫ్యాన్స్​ను కలిసి ముచ్చటిస్తున్నారు. అక్కడ కూడా తనదైన శైలి కామెడీతో వారిని ఫుల్​గా నవ్విస్తున్నారు.

అలానే ఆంధ్రప్రదేశ్​ రాజకీయాల్లో బిజీగా ఉంటున్న కేఏ పాల్​.. ప్రస్తుతం అక్కడి పలు సమస్యల గురించి ప్రశ్నిస్తూ పర్యటిస్తున్నారు. ఇందులో భాగంగానే.. విశాఖ ఉక్కు కర్మాగారంపై ఆయన పోరాటం చేస్తున్నారు. ఈ క్రమంలోనే ఆయన వైజాగ్​లో ఉండగా.. ఆ నగరానికే పోలిశెట్టి కూడా ప్రమోషన్స్​కు వెళ్లారు. అలా వారిద్దరు ఎవరి కారులో వారు రోడ్డుపై ప్రయాణిస్తుండగా అనుకోకుండా కలిశారు.

ఓపెన్ టాప్​ కారులో నుంచి నిలబడి అక్కడి ప్రజలకు అభివాదం చేస్తూ ఫ్యాన్స్​తో ముచ్చటించారు. దీనికి సంబంధించిన వీడియో బయటకు వచ్చి సోషల్​మీడియాలో చక్కర్లు కొడుతోంది. ఈ వీడియోలో మొదట కేఏ పాల్​ తన కారు ఓపెన్​ టాప్​లో నుంచి బయటకు వచ్చి.. ప్రజలకు అభివాదం తెలుపుతుండగా.. అనుకోకుండా అదే రోడ్డుపై ప్రయాణించిన నవీన్ పోలిశెట్టి తన కారును ఆపి.. ఓపెన్ టాప్​లో నుంచి బయటకు కనపడి ఫ్యాన్స్​కు సర్​ప్రైజ్​ ఇచ్చారు. కేఏ పాల్​-పోలిశెట్టి కూడా పలకరించుకున్నారు.

దీంతో ఇద్దరిని ఒకే చోటు చూసిన అభిమానులు ఈలలు, గోలలతో రచ్చ రచ్చ చేశారు. సెల్​ఫోన్​ కెమెరాల్లో ఈ సన్నివేశాలన్ని చిత్రీకరించారు. కాసేపు ట్రాఫిక్ జామ్ కూడా అయింది. అక్కడంతా సందడి వాతావరణం క్రియేట్ అయింది. ఇక ఇది చూసిన నెటిజన్లు.. ఇద్దరు ఫన్నీ పర్సన్స్​ ఒకే చోట అంటూ తెగ కామెంట్లు పెడుతున్నారు. వీడియోను షేర్ చేస్తున్నారు.