షారూఖ్-ర‌ణ్‌వీర్‌తో క‌ర‌ణ్ భారీ యాక్ష‌న్ చిత్రం?

బాలీవుడ్ ప్ర‌ముఖ ద‌ర్శ‌క‌నిర్మాత కరణ్ జోహార్ ఇంత‌కుముందు చేయ‌ని కొత్త ఆలోచ‌న‌లు చేస్తున్నారు. ఇక‌పై అత‌డు భారీ యాక్ష‌న్ సినిమాలు తీయాల‌నుకుంటున్నారు. ట్రెండ్‌ని అనుస‌రించాల‌నుకుంటున్నారు. మునుపెన్న‌డూ చూడ‌ని భారీ యాక్ష‌న్ చిత్రాల‌తో అద‌ర‌గొట్టాల‌ని ప్లాన్ చేస్తున్నాడు. ఫ్యామిలీ సినిమాల ఫిలింమేక‌ర్ మైండ్ సెట్ మారిందంటూ ఇప్పుడు ముంబై మీడియాలో బ‌ల‌మైన టాక్ వినిపిస్తోంది.

త‌దుప‌రి క‌ర‌ణ్ తెర‌కెక్కించ‌నున్న రెండు భారీ చిత్రాల‌కు ఇప్ప‌టికే స్టార్ల‌ను కూడా ఎంపిక చేసాడు. ఒక సినిమాలో షారూఖ్ ఖాన్ - ర‌ణ్ వీర్ లాంటి భారీ తారాగ‌ణం ఉంటుంది. మ‌రో సినిమాలో ఆలియా భ‌ట్- క‌రీనా క‌పూర్ లాంటి క్రేజీ నాయిక‌ల‌ను ఎంపిక చేసాడు. వీళ్ల‌తో అద్భుతాలు చేయాల‌నేది క‌ర‌ణ్ ప్లాన్. రొటీన్ గా కాకుండా కొంత వైవిధ్యం ఉన్న భారీ యాక్ష‌న్ చిత్రాల‌ను చేయాల‌నేది అత‌డి ప్లాన్ అని కూడా హిందీ మీడియా క‌థ‌నాలు ప్ర‌చురిస్తోంది. ముఖ్యంగా ఖాన్-ర‌ణ్ వీర్ ల‌ను `ఇంతకు ముందు చూడని` యాక్షన్ ఫిల్మ్‌లో చూసే వీలుంద‌న్న క‌థ‌నాలు వ‌స్తున్నాయి. కరణ్ జోహార్ 2017 చిత్రం `ఏ దిల్ హై ముష్కిల్‌`లో అతిధి పాత్ర పోషించిన షారూఖ్ తో ఇప్పుడు మ‌రో భారీ ప్ర‌య‌త్నం చేస్తున్నాడు. ఈ క‌ల‌యిక‌లో మై నేమ్ ఈజ్ ఖాన్ త‌ర్వాత మ‌ళ్లీ భారీ విజ‌యం కోసం ప్ర‌య‌త్న‌మిద‌ని కూడా టాక్ వినిపిస్తోంది.

కరణ్ జోహార్ మొదటి సారి పూర్తి స్థాయి యాక్షన్ చిత్రానికి దర్శకత్వం వహించ‌నున్నాడు. ఖాన్ కి ఇది యూనిక్ గా నిలుస్తుంద‌ని కూడా టాక్ వినిపిస్తోంది. ఒక సోర్స్ ప్ర‌కారం.. ``క‌రణ్ ఇంతకు ముందు పూర్తి యాక్షన్ చిత్రానికి దర్శకత్వం వహించలేదు. అతడు తన మొదటి పూర్తి యాక్షన్ చిత్రాన్ని షారుఖ్ ఖాన్‌తో తీయాలనుకుంటున్నాడు`` అయితే క‌ర‌ణ్ రాంగ్ టైమ్ లో ఇలా ఆలోచిస్తున్నాడ‌ని అనుకోవాలా? ఇటీవ‌లి కాలంలో యాక్ష‌న్ సినిమాలు కొత్తేమీ కాదు. షారూఖ్‌ అభిమానులు ఇంతకు ముందు త‌న‌ని ఆ ఫార్మాట్ లో చూసారు. కాబ‌ట్టి క‌ర‌ణ్ అంత‌కంటే కొత్త‌గా ఏం చూపిస్తార‌న్న‌ది కూడా ఆలోచించాలి.

కరీనా- అలియాతో మూవీ?

కాఫీ విత్ క‌ర‌ణ్ సీజ‌న్ 8లో ఎప్పుడు కరీనా - అలియాలు కలిసి నటిస్తారు? అని ప్ర‌శ్నించ‌గా ఆలియా స్పందిస్తూ.. అవును.. క‌ర‌ణ్‌ సినిమాను ప్లాన్ చేస్తున్నారు అని అన్నారు. ఇంతకు ముందు అలియా- కరీనా కలిసి ఉన్న‌ ఫోటోలను ఇన్‌స్టాగ్రామ్‌లో షేర్ చేస్తూ ``ఈ తారాగణంతో మాకు సినిమా కావాలి`` అని కరణ్ వ్యాఖ్యానించారు. అందుకే ఇప్పుడు ఈ క‌ల‌యిక‌లో కూడా క‌ర‌ణ్ ఒక సినిమాని ప్లాన్ చేస్తున్నార‌ని భావిస్తున్నారు.