సౌత్ సూపర్ స్టార్ సీక్రెట్ ఫిలిం

బాలీవుడ్ బిగ్గెస్ట్ ప్రొడ్యూసర్ కం డైరెక్టర్లలో కరణ్ జోహార్ ఒకడు. బ్లాక్ బస్టర్ మూవీ కుచ్ కుచ్ హోతా హైతో దర్శకుడిగా బ్యాంగ్ బ్యాంగ్ ఎంట్రీ ఇచ్చిన కరణ్.. కొంత కాలానికే నిర్మాతగా అవతారమెత్తి చాలా పెద్ద రేంజికి వెళ్ళాడు. హిట్లు ఫ్లాపులతో సంబంధం లేకుండా ఆయన ప్రొడక్షన్ హౌస్ నుంచి సినిమాలు వస్తూనే ఉంటాయి. తాజాగా కరణ్.. ఒక ఇంట్రెస్టింగ్ ప్రాజెక్టును అనౌన్స్ చేశాడు. కానీ దాని వివరాలు పూర్తిగా వెల్లడించలేదు. ఇది ఒక సీక్రెట్ ఫిలిం అన్నట్లుగా సంకేతాలు ఇచ్చాడు. ఈ సినిమాలో ఓ సౌత్ సూపర్ స్టార్ హీరోగా నటిస్తున్నట్లు వెల్లడించాడు.

ఈ మధ్య పాన్ ఇండియా స్థాయిలో పెద్ద హిట్ ఇచ్చిన సౌత్ సూపర్ స్టార్ అంటూ ఊరించాడు కరణ్ జోహార్. అలాగే అందరూ మెచ్చిన హీరోయిన్ అంటూ కథానాయక పేరును కూడా సస్పెన్స్ లో పెట్టాడు. ఈ చిత్రాన్ని ఓ కొత్త దర్శకుడు రూపొందిస్తున్నాడని.. తన కోరిక మేరకే హీరో హీరోయిన్లు ఎవరో చెప్పలేదని.. ఈ సినిమాలో లీడ్ రోల్ చేసేది ఎవరో.. ఈ సినిమా టైటిల్ ఏంటో చెబితే మూవీ ఫస్ట్ టీజర్ వారికి ప్రత్యేకంగా చూపిస్తామని కరణ్ జోహార్ చెప్పాడు. పాన్ ఇండియా స్థాయిలో బ్లాక్ బాస్టర్ ఇచ్చిన సౌత్ సూపర్ స్టార్ అనేసరికి.. నెటిజన్లు గెస్సింగ్ లో పడిపోయారు. ప్రభాస్, యశ్, అల్లు అర్జున్, పృథ్వీరాజ్ సుకుమారన్.. ఇలా రకరకాల పేర్లను ప్రస్తావించారు. అయితే ప్రభాస్, అల్లు అర్జున్ లాంటి హీరోలు ఇలా సైలెంట్ గా సినిమా చేసే అవకాశం లేదు కాబట్టి.. వేరే ఆప్షన్ అయి ఉంటుంది. త్వరలోనే ఈ సినిమా పూర్తి వివరాలు వెల్లడిస్తానని కారణం చెబుతున్నాడు. మరి బాలీవుడ్ మెగా బ్యానర్లో సినిమా చేసే ఆ సౌత్ సూపర్ స్టార్ ఎవరో?