డిజాస్ట‌ర్‌ని చూసి కూడా రౌడీతో సినిమా చేస్తాడా?

కొన్ని ప్రారంభంలో క్రేజీ కాంబినేష‌న్‌లు అనిపించుకుంటాయి. ఆ త‌రువాత అవి ఓ పీడ‌క‌ల‌గా మారుతుంటాయి. మ‌ళ్లీ వారి క‌ల‌యిక‌లో సినిమా అంటే అంద‌రిలోనూ ఆశ్చ‌ర్యాన్ని క‌లిగిస్తూ ఉంటుంది. వివ‌రాల్లోకి వెళితే.. రౌడీ స్టార్‌గా భారీ క్రేజ్‌ని సొంతం చేసుకున్న విజ‌య్ దేవ‌ర‌కొండ తొలి సారి వెర్స‌టైల్ డైరెక్ట‌ర్ పూరి జ‌గ‌న్నాథ్‌తో క‌లిసి చేసిన పాన్ ఇండియా మూవీ 'లైగ‌ర్‌'. పూరి క‌నెక్ట్‌తో క‌లిసి బాలీవుడ్ ఫిల్మ్ మేక‌ర్ క‌ర‌ణ్ జోహార్ ఈ మూవీని నిర్మించారు. గ‌త ఏడాది డిసెంబ‌ర్ 25న పాన్ ఇండియా మూవీగా విడుద‌లైంది.

ఈ సినిమాపై భారీ ఆశ‌లు పెట్టుకుని విజ‌య్ దేవ‌ర‌కొండ‌కు ఊహించ‌ని షాక్ ఇచ్చింది. ఈ ప్రాజెక్ట్‌తో పాన్ ఇండియా స్టార్‌ల జాబితాలో చేరాల‌నుకున్న రౌడీ స్టార్‌కు 'లైగ‌ర్‌' తిరుగులేని షాక్ ఇచ్చింది. ఒక్క‌సారిగా త‌న క్రేజ్‌ని ప్ర‌శ్నార్థ‌కంలో ప‌డేసింది. విజ‌య్‌ని హీరోగా ప‌దిమెట్లు కిందికి లాగేస్తే, ద‌ర్శ‌కుడు పూరి జ‌గ‌న్నాథ్‌ను ఆర్థికంగా ఇబ్బందుల్లోకి నెట్టేసింది. కేసుల దాకా వెళ్లేలా చేసింది. నిర్మాత‌గా చార్మిని కూడా తీవ్ర ఇబ్బందులకు గురి చేసిన 'లైగ‌ర్‌' చేదు జ్ఞాప‌కాల్ని ఇప్ప‌టికీ ఈ ముగ్గురు మ‌రిచిపోలేక‌పోతున్నారు. రానీ క‌ర‌న్ మాత్రం విజ‌య్ దేవ‌ర‌కొండ కోసం ముందడుగు వేస్తున్నార‌ని వార్త‌లు వినిపిస్తున్నాయి.

'లైగ‌ర్‌' సినిమాకు స‌మ‌ర్ప‌కుడిగా వ్య‌వ‌హ‌రించిన క‌ర‌ణ్ జోహార్ ఆ చేదు జ్ఞాప‌కాన్ని ప‌క్క‌న పెట్టి విజ‌య్ దేవ‌ర‌కొండ‌తో ఓ రొమాంటిక్ ల‌వ్ స్టోరీని తెర‌పైకి తీసుకురావాల‌నే ఆలోచ‌న‌లో ఉన్నార‌ట‌. ఇందు కోసం ఇప్ప‌టికే ఓ ప్రేమ‌క‌థ‌ని సిద్ధం చేయించిన క‌ర‌ణ్ జోహార్ ఈ రొమాంటిక్ ల‌వ్ స్టోరీని ప‌క్కాగా అనుకున్న విధంగా తెర‌పై ఆవిష్క‌రించే ద‌ర్శ‌కుడి కోసం ఎదురు చూస్తున్నాడ‌ట‌. అయితే ఈ సినిమా కోసం క‌రణ్ బాలీవుడ్ డైరెక్ట‌ర్ల‌ని కాకుండా సౌత్ డైరెక్ట‌ర్‌నే వెతుకుతున్నాడ‌ట‌.

ఇప్ప‌టికే చాలా మంది సౌత్ డైరెక్ట‌ర్ల‌తో చ‌ర్చ‌లు కూడా జ‌రిపాడ‌ని, అయితే ఇప్ప‌టికి ఏ ఒక్క ద‌ర్శ‌కుడు కూడా ఫైన‌ల్ కాలేద‌ని తెలుస్తోంది. ఇండ‌స్ట్రీ వ‌ర్గాలు మాత్రం 'లైగ‌ర్‌'తో దిమ్మ‌దిరిగే డిజాస్ట‌ర్‌ని ఎదుర్కొన్న క‌ర‌ణ్ జోహార్ ఆ విష‌యం తెలిసి కూడా విజ‌య్ దేవ‌ర‌కొండ‌తో ఇంకా సినిమా చేయాల‌ని ప్ర‌య‌త్నాలు చేయ‌డం ఏంటో అర్థం కావ‌డం లేద‌ని ప‌లువురు సెటైర్లు వేస్తున్నారు. ఇదిలా ఉంటే రొమాంటిక్ ల‌వ్ స్టోరీకి త‌గ్గ ద‌ర్శ‌కుడు దొరికితే విజ‌య్ దేవ‌ర‌కొండ సినిమాని వ‌చ్చే ఏడాది సెట్స్ పైకి తీసుకెళ్లాల‌నే ఆలోచ‌న‌లో క‌ర‌ణ్ జోహార్ ఉన్నాడ‌ని బాలీవుడ్ టాక్‌.