క‌న్న‌డ ఇండ‌స్ట్రీలో సంక్షోభం.. దోష నివార‌ణ పూజ‌లు!

బాక్సాఫీస్ విజయాలు తగ్గిపోవడం.. రాష్ట్ర వ్యాప్తంగా చాలా థియేటర్లు మూసివేయడం.. OTT ప్లాట్‌ఫారమ్‌ల నుండి తీవ్రమైన పోటీ వంటి అనేక సవాళ్లతో క‌న్న‌డ చిత్ర‌ప‌రిశ్ర‌మ పోరాడుతోంది. ఇటీవలి సీనియర్ నటుల మరణాలు.. ప్రముఖ నటుడు దర్శన్ తూగుదీప్ అరెస్ట్ పరిశ్రమలో స్ఫూర్తిని మరింత దిగజార్చింది. అయితే ప‌రిశ్ర‌మ‌ను ఆవ‌హించిన చెడును వ‌దిలించుకునేందుకు పరిశ్రమలోని సీనియర్ సభ్యులు బుధవారం చామ్‌రాజ్‌పేటలోని కర్ణాటక చలనచిత్ర కళావిదార సంఘంలో ప్రత్యేక పూజలు నిర్వహించారు. ఏదైనా దురదృష్టాన్ని దూరం చేసి మంచికి శ్రేయస్సుకు ప‌రిస్థితులు అనుకూలంగా మారేలా చేయ‌డ‌మే దీని ఉద్ధేశం.

ఈ పూజా కార్యక్రమాల‌లో టీవీ మూవీ తార‌లు పాల్గొన్నారు. ప్రముఖ నటుడు దొడ్డన్న, సంఘ కోశాధికారి, అతని భార్య, తోటి పరిశ్రమ సభ్యులతో కలిసి పూజ‌లు- ఆచారాల విష‌యంలో బాధ్య‌త‌లు తీసుకున్నారు. ఈ కార్యక్రమంలో భాగంగా ఆశ్లేష బలి, కాలసర్ప దోషం నివార‌ణ కోసం వివిధ పూజలు నిర్వహించారు. కన్నడ సినిమా ప్రస్తుత స్థితి గురించి పలువురు పరిశ్రమలోని వ్యక్తులు తమ ఆందోళనలను వ్య‌క్తం చేసారు.

ద‌ర్శ‌క‌ నిర్మాత పన్నగ భరణ ఏవైనా సినిమా విడుదలలకు మరింత వ్యూహాత్మక విధానం అవసరాన్ని నొక్కిచెప్పారు. మార్కెట్ ను అర్థం చేసుకోవాల‌ని అన్నారు. ప్రతి వారం దాదాపు 10 సినిమాలు విడుదలవుతున్నాయి. కానీ అన్నీ KGF లేదా కాంతారావు వంటి హిట్‌లు కావు. డిమాండ్ - సరఫరా మధ్య అసమతుల్యత ద‌ర్శ‌కులు, నిర్మాతలను దెబ్బతీస్తున్నాయి అని ఆయన అన్నారు. చాలా సినిమాలు బాగా ఆడటం లేదు.. మ‌న‌మంతా విచారకరమైన కాలంలో ఉన్నాము అని కన్నడ ఫిల్మ్ ప్రొడ్యూసర్స్ అసోసియేషన్ సభ్యుడు ఉమేష్ భ‌ణాకర్ తన అభిప్రాయాన్ని వ్యక్తం చేశారు. పరిశ్రమలో చాలా సినిమాలు బాగా ఆడటం లేదు. నటీనటులు, ఫిలింమేక‌ర్స్ ముఖాలు ఈ దుఃఖాన్ని ప్రతిబింబిస్తున్నాయి! అని ఆయన వ్యాఖ్యానించారు.

కోవిడ్ -19 మహమ్మారి స‌మ‌యంలోనే పూజ చేయాలనే ఆలోచన ఉంద‌ని కన్నడ ఫిల్మ్ ఆర్టిస్ట్స్ అసోసియేషన్ సెక్రటరీ రాక్‌లైన్ వెంకటేష్ వివరించిన‌ట్టు టైమ్స్ ఆఫ్ ఇండియా తన క‌థ‌నంలో పేర్కొంది. మొదట మహమ్మారి సమయంలో దీన్ని ప్లాన్ చేసాము. కానీ రెండవ వేవ్ .. చాలా మంది సీనియర్ కళాకారులను కోల్పోవ‌డం కారణంగా ఇది వాయిదా పడింది. గత ఏడాది కాలంగా పరిశ్రమ చాలా అధ్వాన్న స్థితిలో ఉంది. కార్మికులు -కళాకారులు వేతనాల పెంపును ఆశించారు. ఇది పేలవమైన బాక్సాఫీస్ ఫ‌లితాల‌ కారణంగా మేం కొనసాగించలేని ప‌రిస్థితి అని రాక్ లైన్ వెంకటేష్ తెలిపారు. పరిశ్రమ తీవ్ర సంక్షోభాన్ని ఎదుర్కొంటోందని రాక్ లైన్ వెల్లడించారు.

సంవత్సరానికి దాదాపు 250-300 సినిమాలు విడుద‌ల‌వుతుంటే, 5-10 మాత్రమే మంచి ప్రదర్శన కనబరుస్తున్నాయి. కన్నడ చిత్రాలను కొనుగోలు చేయడంలో OTT ప్లాట్‌ఫారమ్‌లు ఆసక్తి చూపకపోవడం పరిస్థితిని మరింత దిగ‌జార్చింది. పరిశ్రమ మనుగడ కష్టంగా చేసింది. తమిళం- తెలుగు పరిశ్రమలు బాగా అభివృద్ధి చెందుతున్నా కానీ ఈ కష్ట సమయాల్లో మాకు సహాయం చేయడానికి దైవిక జోక్యం అవసరం అని రాక్‌లైన్ వెంకటేష్ అన్నారు.