సినిమా అంచ‌నాలు అందుకోక‌పోవ‌డం నేర‌మా?

మెగాస్టార్ చిరంజీవి న‌టించిన 'భోళా శంక‌ర్' రిలీజ్ అనంత‌రం సోష‌ల్ మీడియాలో ఎలాంటి కామెంట్లు వైర‌ల్ అయ్యాయో తెలిసింది. చిరంజీవి ని పెద్ద ఎత్తున ట్రోల్ చేసారు. సినిమా ఫ‌లితం సంగ‌తి ప‌క్క‌న‌బెడి తే..ఆయ‌న ఇమేజ్ ని సైతం విమ‌ర్శించే ప్ర‌య‌త్నాలు చేసారు. ఇంత‌వ‌ర‌కూ చిరంజీవి ఇలాంటి అనుభ‌వాన్ని ఫేస్ చేయ‌లేదు. చిరంజీవి కెరీర్ లో విజ‌యాల‌తో పాటు..ఎన్నో ప‌రాజ‌యాలున్నాయి. 'ఆచార్య' కూడా ప్లాప్ అయింది. కానీ ఆ సినిమాపై అంత‌గా వ్య‌తిరేక‌త రాలేదు.

కానీ 'భోళా శంక‌ర్' విష‌యంలో మాత్రం అభిమానులు కూడా నిరూత్సాహ‌ప‌డ‌టంతో ట్రోల‌ర్ మ‌రింత చెల‌రేగారు. తాజాగా ఈ అంశంపై యంగ్ హీరో కార్తికేయ గుమ్మ‌డికోండ స్పందిచారు. 'సినిమా న‌చ్చ‌క‌పోతే న‌చ్చ‌లేద‌ని చెప్పండి. అందులో త‌ప్పు లేదు. కానీ వ్యక్తిగతంగా టార్గెట్ చేయడం భావ్యం కాదు. చిరంజీవి అనే కాదు..ఎవ‌రినీ కూడా అలా విమ‌ర్శించొద్దు. అనుకున్న స్థాయిలో సినిమా ఆడకపోతే నేరం అవుతుందా? చిరంజీవి తన కెరీర్‌లో ఎన్నో కష్టాలు..న‌ష్టాలు చూసొచ్చారు.

ఆయన చూసిన ఒడిదుడుకుల ముందు 'భోళా శంక‌ర్' చాలా చిన్నది. ఇలాంటి వాటిని చిరంజీవి గారు ప‌ట్టించుకోరు. ప్రస్తుతం గురించి ఆలోచించకుండా ఆయన తదుపరి సినిమాపై దృష్టి పెడతారని తనకు అనిపిస్తోంది' అని అన్నారు. చిరంజీవికి -కార్తికేయ వీరాభిమాని. మెగాస్టార్ స్పూర్తితోనే సినిమాల్లోకి వ‌చ్చాడు. ప‌రిశ్ర‌మ‌లో ఎలాంటి స‌పోర్ట్ లేకుండా ఎదిగిన న‌టుడు కార్తికేయ‌.

అందుకే చిరంజీవి కూడా త‌న‌ని గొప్ప అభిమానిగా భావిస్తారు. ఓ ఈవెంట్ లో కార్తికేయ‌- చిరంజీవి ని హ‌త్తుకుని ఎంత భావోద్వేగానికి గుర‌య్యాడో తెలిసిందే. ఇది క‌లా? నిజ‌మా? అన్న‌ట్లు ఆశ్చ‌ర్యానికి గుర‌య్యాడు. ప్ర‌స్తుతం కార్తికేయ సినిమా కెరీర్ సాపీగానే సాగుతోంది. 'ఆర్ ఎక్స్ -100' విజ‌యంతో మంచి పేరొచ్చింది. దీంతో అవ‌కాశాలు బాగానే వ‌స్తున్నాయి. ప్ర‌స్తుతం 'బెదురులంక‌ 2012 'అనే సినిమా చేస్తున్నాడు. ఈ సినిమా ప్ర‌చారానికి మెగా ప‌వ‌ర్ స్టార్ రామ్ చ‌ర‌ణ్ కూడా స‌హ‌క‌రిస్తున్నారు.